༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༡༧ རེས་གཟའ་སྤེན་པ་ཉིན་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་ཉིན་གསུམ་རིང་དྷ་ས་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ་ ༢༠༢༤ ལོའི་བོད་མིའི་སྒྲིག་འཛུགས་ཀྱི་ཁྱིམ་ཐོ་ཞིབ་བཤེར་གྱི་ལས་གཞི་དང་འབྲེལ་བའི་སྦྱོང་བརྡར་ཞིག་དབུ་འཛུགས་གནང་ཡོད་པ་རེད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩:༣༠ ཐོག་ནང་སྲིད་དྲུང་ཚབ་བྱམས་པ་ཕུན་ཚོགས་ལགས་དང་། ནང་སྲིད་ཟུང་དྲུང་བཀྲ་ཤིས་བདེ་སྐྱིད་ལགས། རྒྱ་གར་སམ་བྷོ་དི་ཚོགས་པའི་མཁས་ལས་པ་འབུམ་རམས་པ་ཨཀ་ཤེ་ཡ་པཏྲོ་ལགས། སའི་ཀཏ་གྷོཤ་ལགས་བཅས་དབུ་ཞུགས་ཐོག་ཟབ་སྦྱོང་དབུ་འཛུགས་གནང་ཞིང་། ཐོག་མར་ནང་སྲིད་དྲུང་ཚབ་བྱམས་པ་ཕུན་ཚོགས་ལགས་ཀྱིས་སྣང་གསལ་མར་མེ་ཞལ་ཕྱེ་འཚམས་ཁྱིམ་ཐོ་ཞིབ་བཤེར་གྱི་ལས་གཞིའི་དགོས་དམིགས་ངོ་སྤྲོད་གནང་ཡོད། ཁོང་གིས་ཐོག་མར་སྦྱོར་བརྡར་འདིའི་ནང་མཉམ་ཞུགས་གནང་མཁན་ཡོངས་ལ་དགའ་བསུ་དང་བསྔགས་བརྗོད་ཞུས་པ་དང་འབྲེལ། སྐབས་བབ་ཀྱི་ཁྱིམ་ཐོ་ཞིབ་བཤེར་འདི་ནི་དེང་དུས་དང་མཐུན་པའི་འཕྲུལ་ལས་ཀྱི་ཞིབ་བཤེར་ཡིན་པ་གང་ཞིག་ལས་གཞི་འདིའི་ཐོག་མཉམ་ཞུགས་གནང་མཁན་ཡོངས་ནས་བཟོད་བསྲན་ཐོག་ལག་ལེན་གནང་རྒྱུའི་རེ་བསྐུལ་ཞུས་ཡོད།དེ་རྗེས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱི་ལས་གཞི་འདི་དང་འབྲེལ་བའི་གསུང་བཤད་ཞིག་བརྙན་ཐུང་བརྒྱུད་ཚོགས་བཅར་བ་ཡོངས་ལ་གཟིགས་འབུལ་ཞུས་འཚམས། ནང་སྲིད་ཟུང་དྲུང་དང་རྒྱ་གར་བྱང་ཕྱོགས་བོད་མིའི་གཞིས་ཆགས་ཀྱི་འགན་འཛིན་བཀྲ་ཤིས་བདེ་སྐྱིད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད།ཟབ་སྦྱོང་འདིར་རྡ་རམ་ས་ལའི་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་གཙོས་ས་གནས་ཁག་གི་ལས་བྱེད་དང་། དེ་བཞིན་དང་བླངས་བཅས་ཁྱོན་བསྡོམས་མི་གྲངས་ ༤༢ མཉམ་ཞུགས་གནང་འདུག ལས་གཞི་འདི་ནི་ཨ་རིའི་རོགས་ཚོགས་ (USAID) དང་བོད་ཀྱི་ཐེབས་རྩ་ཁང་གཉིས་ཀྱིས་མཐུན་འགྱུར་གནང་ཡོད་པ་བཅས།།