དཔལ་ལྡན་སྲིད་སྐྱོང་མཆོག་གིས་ལི་ཐུ་ནི་ཡཱའི་གྲོས་ཚོགས་ཀྱི་ཚོགས་གཞོན་ལྕམ་སྐུ་རཊ་ཝི་ལེ་ (Radvilė Morkūnaitė-Mikulėnienė) མཆོག་དང་མཇལ་འཕྲད་གནང་བཞིན་པ།
༄༅། །ཕྱི་ལོ ༢༠༢༤ ཟླ་ ༡ ཚེས་ ༣༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལི་ཐུ་ནི་ཡཱའི་གྲོས་ཚོགས་ཁང་དུ་གྲོས་ཚོགས་འཐུས་མི་རྣམ་པ་དང་མཇལ་འཕྲད་གནང་བ་མ་ཟད། གསར་འགོད་ལྷན་ཚོགས་དང་། སྒོར་སྡོད་ཚོགས་འདུ་(round table meeting)སོགས་ལ་མཉམ་ཞུགས་གནང་ཡོད་པ་རེད།
དེ་ཡང་ལི་ཐུ་ནི་ཡཱའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨེན་དྲི་ཡས་ན་ཝི་ཀ་སི་ (Andrius Navickas) མཆོག་གིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ལ་ཕེབས་བསུ་ཞུས་པ་དང་ཆབས་ཅིག ཁོང་རྣམ་པ་གཉིས་ནས་ལི་ཐུ་ནི་ཡཱའི་གྲོས་ཚོགས་ཀྱི་ཚོགས་གཞོན་ལྕམ་སྐུ་རཊ་ཝི་ལེ་ (Radvilė Morkūnaitė-Mikulėnienė) མཆོག་དང་མཇལ་འཕྲད་གནང་ཡོད། དེ་རྗེས་དཔལ་ལྡན་སྲིད་སྐྱོང་མཆོག་གཙོས་པའི་སློབ་དཔོན་ཊེ་ནི་ཡ་སི་ (Dainius Žalimas) ལགས་དང་། ཝི་ཊིས་ཝི་དུ་ན་སི་ (Vytis Vidunas) ལགས། དེ་བཞིན་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ལགས་ཀྱིས་གསར་འགོད་གསལ་བསྒྲགས་བསྐྱངས་ཡོད་པ་དང་། དེ་ཉིད་གྲོས་ཚོགས་འཐུས་མི་ཨན་དྲུ་རུ་སུ་(MP Andrius Navickas)ལགས་ཀྱིས་གཙོ་སྐྱོང་གནང་ཡོད་པ་རེད།
ལི་ཐུ་ནི་ཡཱའི་གྲོས་ཚོགས་ནང་གསར་འགོད་ལྷན་ཚོགས་གནང་བཞིན་པ།
དེ་ནས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལི་ཐུ་ནི་ཡཱའི་གྲོས་ཚོགས་འཐུས་མི་རྣམ་པ་ལྷན་དུ་ཚོགས་འདུ་འཚོག་གནང་ཡོད་པ་དང་། སྐབས་དེར་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ཛེ་གི་མན་ཏ་སི་(Žygimantas Pavilionis)ལགས་དང་། གྲོས་ཚོགས་ཀྱི་དཔལ་འབྱོར་ལས་དོན་ཚོགས་ཆུང་གི་ཚོགས་མི་གྲོས་ཚོགས་འཐུ་མི་ཁག་ཅིག དེ་བཞིན་སྔ་ལོ་བཞུགས་སྒར་རྡ་རམ་ས་ལར་བོད་མིའི་རང་དབང་སྒེར་ལངས་ཉིན་མོའི་གཞུང་འབྲེལ་སྐུ་མགྲོན་དུ་ཕེབས་མཁན་གྲོས་ཚོགས་འཐུས་མི་ཨ་རུ་ན་སི་ཝ་ལིན་ཀ་སི་(Arūnas Valinskas)ལགས། ལི་ཐུ་ནི་ཡཱའི་ཨུ་རུ་སུ་ནས་རང་བཙན་ཐོབ་པའི་རྗེས་ཀྱི་སྲིད་འཛིན་ཐོག་མ་སྐུ་ཞབས་ལན་བྷར་གི་སི་(Landsbergis)ལགས་ཕེབས་ཞུགས་ཀྱིས་བོད་དོན་ལ་རྒྱབ་སྐྱོར་གྱི་གསུང་བཤད་གནང་ཡོད།
ལི་ཐུ་ནི་ཡཱའི་གྲོས་ཚོགས་འཐུས་མི་ཁག་ཅིག་དང་ལྷན་ཚོགས་འདུ་གནང་བཞིན་པ།
གོང་ཚེས་ཉིན་གྱི་ཉིན་རྒྱབ་དཔལ་ལྡན་སྲིད་སྐྱོང་མཆོག་གིས་ལི་ཐུ་ནི་ཡཱའི་ཕྱི་སྲིད་ལྷན་ཁང་གི་དཔོན་རིགས་ཁག་མཇལ་འཕྲད་དང་། གསར་འགོད་པའི་བཅར་འདྲིར་དང་ལེན། ཝིལ་ནི་སིའི་བོད་ཀྱི་བཞི་མདོར་སྐོར་བསྐྱོད། དེ་བཞིན་ས་གནས་བོད་དོན་རྒྱབ་སྐྱོར་བ་ཁག་ཅིག་དང་མཇལ་འཕྲད་གནང་ཡོད་པ་རེད། དེ་མཚུངས་དཔལ་ལྡན་སྲིད་སྐྱོང་མཆོག་གིས་ལི་ཐུ་ནི་ཡཱའི་གཞུང་ནས་ཉེ་འཆར་འཛམ་གླིང་མཉམ་འབྲེལ་རྒྱལ་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་ཐོག་དུས་བཀག་བསྐྱར་ཞིབ་གནང་བའི་སྐབས་བོད་དོན་ཐོག་རྒྱབ་སྐྱོར་གནང་བ་མ་ཟད། ཁོང་ཉིད་ལ་ལི་ཐུ་ནི་ཡཱའི་རྒྱལ་ཁབ་ཏུ་ཕེབས་བསུ་སྣེ་ལེན་ཞུས་པར་ཐུགས་རྗེ་ཆེ་ཞུས་ཡོད།
དཔལ་ལྡན་སྲིད་སྐྱོང་མཆོག་གི་ལི་ཐུ་ནི་ཡཱའི་མཛད་འཆར་ཁག་ལེགས་པར་གྲུབ་རྗེས་ལོན་ཌོན་དུ་མ་ཐོན་གོང་ཁོང་གི་གྲོགས་པོ་རྙིང་པ་དང་བོད་དོན་རྒྱབ་སྐྱོར་བ་འབུམ་རམས་པ་ལེ་མ་ཨན་ཌི་རི་ཀེན་ (Laima Andrikiene) ལགས་དང་མཇལ་འཕྲད་ཞུ་རྒྱུ་ཡིན་པ་རེད། འབུམ་རམས་པ་ལེ་མ་ཨན་ཌི་རི་ཀེན་ལགས་ནི་བོད་ལ་རྒྱབ་སྐྱོར་ཡུན་རིང་གནང་མཁན་ཞིག་དང་། ལི་ཐུ་ནི་ཡའི་གྲོས་ཚོགས་འཐུས་མི་ཟུར་པ། ད་ལྟ་ཡོ་རོབ་རྩིས་ཞིབ་ལྷན་ཚོགས་ཀྱི་ཚོགས་མི་ཞིག་ཡིན།
བོད་མི་དང་ལི་ཐུ་ནི་ཡའི་མི་མང་གཉིས་ཀ་དྲག་གནོན་འོག་དཀའ་སྡུག་མྱོང་མཁན་དང་། རྒྱ་ནག་གི་དྲག་སྤྱོད་ལ་ངོ་རྒོལ་བྱེད་མཁན་གཅིག་པ་ཡིན་པས་ཕྱོགས་གཉིས་བར་ཐུན་མོང་མ་ཡིན་པའི་འབྲེལ་བ་ཡོད་པ་བཅས།།
གྲོས་ཚོགས་ཀྱི་ཚོགས་གཞོན་མཆོག་དང་མཇལ་མོལ་གནང་བཞིན་པ།
གསར་འགོད་པའི་བཅར་འདྲིར་དང་ལེན་གནང་བཞིན་པ།
ལི་ཐུ་ནི་ཡའི་ཕྱི་སྲིད་ལྷན་ཁང་གི་གནད་ཡོད་མི་སྣ་དང་མཇལ་འཕྲད་གནང་བ།
ལི་ཐུ་ནུ་ཡའི་བོད་དོན་རྒྱབ་སྐྱོར་ཚོགས་པས་དཔལ་ལྡན་སྲིད་སྐྱོང་མཆོག་ལ་དགོང་ཚིགས་འདེགས་འབུལ་ཞུས་པ།
