༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༡༨ ཉིན་ཉི་འོང་སྐུ་ཚབ་དོན་ཁང་དང་། ཉི་འོང་བོད་སྐྱོབ་ཚོགས་པ། ཉི་འོང་བོད་རིགས་ཐུན་མོང་ནས་ཉི་འོང་བོད་དོན་རྒྱབ་སྐྱོར་ཚོགས་པ་ཁག་གིས་ཚོགས་འདུ་ཞིག་དྲྭ་ཐོག་བསྐོང་ཚོགས་གནང་ཡོད།
དེ་ཡང་སྐབས་དེར་བོད་སྐྱོབ་ཚོགས་པའི་ཚོགས་གཙོ་མ་ཀི་ནོ་སེ་ཤུ་ལགས་ཀྱིས་ཚོགས་མི་རྣམས་ལ་འཚམས་འདྲི་ཞུས་པ་དང་ཆབས་ཅིག ཁོང་རང་ཉིད་བོད་ཀྱི་གནད་དོན་དང་འབྲེལ་བ་ཇི་ལྟར་བྱུང་བ་དང་། བོད་མིའི་རང་དབང་འཐབ་རྩོད་དེ་འཛམ་གླིང་ཞི་བདེ་ལ་ཇི་ལྟར་འབྲེལ་བ་ཡོད་པ་སོགས་ཀྱི་སྐོར་ལ་གསུང་བཤད་གནང་ཡོད། དེ་མཚུངས་ཁོང་གིས་ཚོགས་བཅར་བ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚེ་མེད་ཞི་བའི་ལམ་དང་། རྩོད་རྙོག་རྣམས་གྲོས་མོལ་བརྒྱུད་ཐག་གཅོད་དགོས་པའི་བསླབ་བྱ་སོགས་དྲན་བསྐུལ་གནང་ཡོད།
དེ་ནས་ཉི་འོང་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་དྲུང་ཆེ་ཨི་ཤི་ཀ་ཝ་ཨ་ཀི་མཱ་ས་ལགས་ཀྱིས་བོད་དོན་གྱི་གྲོས་གཞིར་རྒྱབ་སྐྱོར་ཡོད་ལུགས་དང་། ཚོགས་བཅར་བ་རྣམས་ལ་བོད་དོན་རྒྱབ་སྐྱོར་ཚོགས་པའི་ལས་དོན་སྐོར་ངོ་སྤྲོད་དང་། དེ་བཞིན་སྔ་ལོར་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཉི་འོང་དུ་ཕེབས་ཏེ་ཉི་འོང་གྲོས་ཚོགས་འཐུས་མི་དང་བོད་མིའི་སྒྲིག་འཛུགས་དབར་འབྲེལ་བ་དམ་ཟབ་ཏུ་ཕྱིན་སྐོར་སོགས་གསུངས།
དེ་རྗེས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་ཚོགས་བཅར་བ་རྣམས་ལ་འཚམས་འདྲི་དང་། བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་མ་ཟད། རྒྱ་ནག་གིས་བོད་ནང་བཙན་གནོན་ཤུགས་ཆེར་བྱས་ཏེ་བོད་ཀྱི་ཆོས་དང་། རིག་གཞུང་། དེ་བཞིན་ངོ་བོ་བཅས་ལ་གཏོར་གཤིག་གཏོང་བཞིན་པའི་སྐོར་འགྲེལ་བརྗོད་གནང་ཡོད།
ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་སྐུ་ཚབ་དོན་ཁང་གི་ལས་དོན་སྐོར་དང་། ད་ལྟའི་བོད་ཀྱི་གནས་སྟངས་སྐོར་ལ་གནས་ཚུལ་ངོ་སྤྲོད་གནང་། དེ་བཞིན་འབྱུང་འགྱུར་སྦར་སེལ་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་འདུ་འཚོགས་འཆར་སོགས་ཀྱི་སྐོར་ལ་གསུང་བཤད་གནང་ཡོད་པ་རེད།
དེ་ནས་བོད་དོན་རྒྱབ་སྐྱོར་ཚོགས་པ་ཁག་ནས་སོ་སོའི་ངོ་སྤྲོད་དང་། ལོ་གཅིག་རིང་གི་ལས་དོན་གང་བསྒྲུབས་སོགས་ཀྱི་སྐོར་ལ་གསུང་བཤད་གནང་། སྐབས་དེར་བོད་དོན་རྒྱབ་སྐྱོར་ཚོགས་པ་ཁག་དགུའི་ཚོགས་མི་རྣམས་མཉམ་ཞུགས་གནང་སྟེ་བོད་དོན་སྐོར་ལ་གྲོས་བསྡུར་གནང་ཡོད།
མཐར་སྐུ་ཞབས་མ་ཀི་ནོ་ལགས་ཀྱིས་མཉམ་ཞུགས་པ་ཚོར་ཐུགས་རྗེ་ཆེ་ཞུས་ཏེ། རྒྱ་ནག་གི་དྲང་བདེན་མིན་པའི་སྲིད་དབང་ལམ་ལུགས་འོག་དཀའ་སྡུག་མྱོང་བཞིན་པའི་མི་མང་ལ་རང་དབང་དང་དྲང་བདེན་ཡོང་བའི་རོགས་རམ་མུ་མཐུད་གནང་རྒྱུའི་རེ་སྐུལ་ཞུས་ཡོད་པ་བཅས།།
