༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༡༨ ཉིན་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ཀྱི་སློབ་གྲྭ་དབུ་བརྙེས་ནས་མི་ལོ་ཧྲིལ་པོ་ལྔ་བཅུ་འཁོར་བའི་དུས་སྟོན་སྲུང་བརྩི་གཟབ་རྒྱས་ཞུས་ཡོད།
དེ་ཡང་ཀོ་ལེ་གྷལ་དོན་ལྡན་གླིང་སཾ་བྷོ་ཌ་ཉིན་སློབ་ཁང་དབུ་བརྙེས་ནས་ལོ་ངོ་ ༥༠ འཁོར་བའི་དུས་སྟོན་མཛད་སྒོའི་ཐོག་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་སྐུ་མགྲོན་གཙོ་བོ་ཕེབས་གནང་ཡོད། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ནི་དེ་སྔ་ཀོ་ལེ་གྷལ་དོན་ལྡན་གླིང་སློབ་གྲྭའི་སློབ་མ་དང་། ཀོ་ལེ་གྷལ་དོན་ལྡན་གླིང་གཞིས་ཆགས་ཀྱི་གཞིས་མི་ཞིག་ཀྱང་ཡིན།
སྐབས་དེར་བཀའ་བློན་ནོར་འཛིན་སྒྲོལ་མ་མཆོག་གིས་དགེ་ཆེ་རྣམ་པ་དང་། དགེ་རྒན། ལས་བྱེད་སོགས་ཀྱིས་མི་ལོ་ལྔ་བཅུ་ལྷག་གི་རིང་སློབ་ཕྲུག་ཚོར་སྤུས་ཚད་ལྡན་པའི་ཤེས་ཡོན་སློབ་ཁྲིད་གནང་བའི་མཛད་རྗེས་ལ་རྗེས་སུ་ཡི་རང་དང་བསྔགས་བརྗོད་གནང་ཡོད།
མཛད་སྒོའི་སྐབས་མདུན་ལམ་དང་འབྲེལ་བའི་འགྲེམས་སྟོན་དང་། རྩེད་རིགས། རིག་གཞུང་འཁྲབ་སྟོན་སོགས་གོ་སྒྲིག་གནང་ཡོད།
མཛད་སྒོའི་ཐོག་ཀོ་ལེ་གྷལ་དོན་ལྡན་གླིང་ས་གནས་འགོ་འཛིན་དགེ་ལེགས་འབྱུང་གནས་ལགས་དང་། ཁྲིམས་ཞིབ་པ་ཆེ་བ་ཟུར་པ་རྒན་ཆེན་པ་ངག་དབང་འཕེལ་རྒྱལ་མཆོག དགོན་སྡེ་ཁག་གི་སྐུ་ཚབ། ས་གནས་ཀྱི་གཞུང་དང་གཞུང་ཁོངས་མ་ཡིན་པའི་སྐུ་ཚབ་རྣམ་པ། སློབ་སྤྱི་ཟུར་པ། དགེ་རྒན་དང་སློབ་ཕྲུག མི་མང་བཅས་མཉམ་ཞུགས་གནང་ཡོད།
སྤྱིར་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་དབུ་བརྙེས་ཏེ་ལོ་ངོ་ ༥༠ འཁོར་བའི་དུས་སྟོན་སྲུང་བརྩི་དང་སྟབས་བསྟུན་སཾ་བྷོ་ཌ་ཉིན་སློབ་ཀྱང་ལོ་ངོ་ལྔ་བཅུ་འཁོར་བའི་དུས་སྟོན་སྲུང་བརྩི་ཞུས་ཡོད་པ་དང་། ལྔ་བཅུའི་དུས་སྟོན་ཆེད་ཀོ་ལེ་གྷལ་དོན་ལྡན་གླིང་གི་གཞུས་ཟུར་རྣམས་ནས་དཔལ་འབྱོར་འདུ་འགོད་དང་། ས་གནས་འགོ་འཛིན་ལས་ཁུངས། ས་གནས་ཀྱི་གཞུང་དང་གཞུང་ཁོངས་མ་ཡིན་པའི་ཚོགས་པ་ཁག སཾ་བྷོ་ཊ་སློབ་གྲྭ། དོན་ལྡན་གླིང་གི་གཞིས་མི་བཅས་ཀྱིས་མཐུན་འགྱུར་གནང་བ་བརྒྱུད་ཐེངས་འདིའི་དུས་སྟོན་སྲུང་བརྩི་ལེགས་གྲུབ་བྱུང་ཡོད། །
