༸སྐྱབས་རྗེ་རྡོ་བུམ་བློ་བཟང་བསྟན་འཛིན་རིན་པོ་ཆེ་མཆོག་ཕྱི་ལོ་ ༢༠༢༤ ཟླ་ ༠༡ ཚེས་ ༢༩ ཉིན་དགོངས་པ་གཞན་དོན་དུ་གཤེགས་པའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་བཀའ་ཤག་ལྷན་རྒྱས་ནས་ཡིད་གདུང་དྲག་པོས་མྱ་ངན་དང་བཅས་རྗེས་བཞུགས་བླ་བྲང་གི་ལས་སྣེ་དང་། སློབ་འབངས་ཡོངས་ལ་ཐུགས་གསོའི་འཕྲིན་ཡིག་ཕུལ་འདུག
དཔལ་ལྡན་སྲིད་ཚབ་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གི་མཚན་ཐོག་ཕུལ་བའི་ཐུགས་གསོའི་འཕྲིན་ཡིག་ནང་༸སྐུ་གཤེགས་དམ་པ་ཁོང་ནི་སྐུ་ཚེ་ཧྲིལ་པོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་འཛིན་སྐྱོང་སྤེལ་གསུམ་ཐོག་ཐུགས་ཁུར་དང་ཞབས་འདེགས་རླབས་ཆེན་འཇོག་གནང་མཁན་ཞིག་ཡིན་པར་བཀའ་དྲིན་རྗེས་དྲན་དང་། ༸སྐུ་གཤེགས་དམ་པ་ཁོང་གི་ཐུགས་ཀྱི་དགོངས་པ་ཟབ་མོ་རྣམས་ཡོངས་སུ་རྫོགས་ཏེ། སླར་ཡང་བསྟན་འགྲོའི་དོན་དུ་ཡང་སྲིད་ཉི་གཞོན་མྱུར་དུ་བྱོན་ནས་དམ་པའི་མཛད་འཕྲིན་འཕྲོ་སྐྱོང་ཐུབ་པའི་གསོལ་འདེབས་ཞུས་འདུག
༸སྐྱབས་རྗེ་རྡོ་བུམ་བློ་བཟང་བསྟན་འཛིན་རིན་པོ་ཆེ་དམ་པ་དེ་ཉིད་ཕྱི་ལོ་ ༡༩༤༡ ལོར་མདོ་ཁམས་སྒ་སྐྱེ་རྒུ་མདོར་སྐུ་འཁྲུངས་ཏེ། དགུང་ལོ་གཉིས་ཙམ་སོན་སྐབས་ཕུར་ལྕོག་ཡངས་སྤྲུལ་ཐུབ་བསྟན་བྱམས་པ་ཚུལ་ཁྲིམས་བསྟན་འཛིན་གྱིས་རྡོ་བུམ་སྐུ་གོང་མའི་ཡང་སྲིད་དུ་ངོས་འཛིན་དང་། དགུང་ལོ་བཅུ་གཉིས་ཙམ་ལ་དཔལ་ལྡན་འབྲས་སྤུངས་བློ་གླིང་གྲྭ་ཚང་དུ་ཆོས་ཞུགས་མཛད།
ཕྱི་ལོ་ ༡༩༥༩ ལོར་རྒྱ་གར་དུ་བཙན་བྱོལ་དུ་ཕེབས་ཏེ་བྱེས་ཀྱི་ཆོས་སྡེ་དང་པོ་སྦག་ས་ཆོས་སྒར་དུ་བཞུགས། ཕྱི་ལོ་ ༡༩༧༢ ལོར་ཝཱ་ཎ་ལེགས་སྦྱར་གཙུག་ལག་སློབ་ཁང་ནས་ཨ་ཙཱརྱ་ཕྱག་འཁྱེར་བཞེས།
ཕྱི་ལོ་ ༡༩༧༣ ལོ་མཇུག་ཏུ་བཞུགས་སྒར་བོད་ཀྱི་དཔེ་མཛོད་ཁང་གི་བཀའ་བསྟན་གསུང་རབ་ཀུན་དགའ་ར་བའི་དབུ་འཛིན་དང་ཉམས་ཞིབ་པའི་ཐུགས་འགན་གཅིག་ལྕོགས་བཞེས་ཡོད་པ་དང་། ཕྱི་ལོ་ ༡༩༧༥ ལོར་འབྲས་སྤུངས་བློ་གླིང་གྲྭ་ཚང་ནས་དགེ་བཤེས་ལྷ་རམས་པའི་མཚན་རྟགས་བཀའ་བསྒྱུར་གནང་བ་བདག་གིར་བཞེས། དེ་ནས་ཕྱི་ལོ་ ༡༩༧༧ ལོར་༸གོང་ས་མཆོག་གི་བཀའ་བཀོད་བཞིན་སྐུ་སྒེར་དྲུང་ཆེའི་ཕྱག་རོགས་ཀྱི་མཚན་གནས་བཞེས་པ་དང་། ཕྱི་ལོ་ ༡༩༨༡ ལོར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་བོད་ཁང་གི་འགན་འཛིན་ཐུགས་འགན་བཞེས་ཏེ་ཁྱོན་མི་ལོ་ ༣༠ ཙམ་གྱི་རིང་བོད་ཀྱི་ཐུན་མོང་མ་ཡིན་པའི་རིག་གནས་ཐོག་ཞིབ་འཇུག་དང་། མཁས་དབང་མཉམ་འཛོམས་ཀྱི་བགྲོ་གླེང་ཞིབ་འཇུག དཔྱད་གཏམ་དང་དེབ་ཕྲེང་དུ་མ་སྤེལ་བ་ཡོད་པ་སོགས་མཛད་རྣམ་སྙིང་བསྡུས་སུ།
