༄༅། །ཕྱི་ལོ་ ༢༠༢༤ ཟླ་བ་ ༠༢ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྦར་སེལ་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གྲུབ་རྗེས་ཨེམ་སི་ཊར་ཌེམ་དུ་ཕེབས་འབྱོར་གནང་ཡོད་པ་རེད།
དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ནི་དར་ལེནྜ་ཕེབས་འབྱོར་སྐབས་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་དང་ཚོགས་མི་རྣམ་པ། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས། ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཟུར་པ་ཚེ་རིང་བྱམས་པ་ལགས། ས་གནས་མང་ཚོགས་དང་དེ་མིན་བོད་དོན་རྒྱབ་སྐྱོར་བ་ཁག་གཅིག་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་རྗེས་དཔལ་ལྡན་སྲིད་སྐྱོང་མཆོག་གིས་ས་གནས་བོད་རིགས་མང་ཚོགས་མཇལ་འཕྲད་ཀྱིས་གསུང་བཤད་གནང་ཡོད། སྐབས་དེར་དཔལ་ལྡན་སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་དང་། བཙན་བྱོལ་བོད་མིའི་མང་གཙོ་འཕེལ་རིམ། དེ་བཞིན་བོད་མིའི་སྒྲིག་འཛུགས་ཀྱི་ལས་དོན་གནང་ཕྱོགས་སོགས་ཀྱི་སྐོར་ངོ་སྤྲོད་དང་སྦྲགས། ཉེ་ཆར་ཨ་རིའི་གྲོས་ཚོགས་འོག་མའི་ནང་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་ཚད་མཐོའི་མང་མོས་ཀྱི་ཐོག་ནས་གཏན་འབེབས་གནང་ཡོད་པའི་སྐོར་སོགས་གསུངས། དེ་བཞིན་ནི་དར་ལེནྜ་བོད་རིགས་གཞོན་སྐྱེས་རྣམས་དང་ཟུར་དུ་མཇལ་འཕྲད་ཀྱིས་བོད་དོན་སྐོར་གསུང་བཤད་དང་དྲི་བར་དྲི་ལན་གནང་ཡོད།
ཕྱི་ཚེས་ ༢༨ ཉིན་གྱི་སྔ་དྲོ་དཔལ་ལྡན་སྲིད་སྐྱོང་མཆོག་གིས་ཇི་ནི་ཝར་ཡོད་པའི་སྦར་ཛིལ་ (UOL) ཞེས་པའི་གསར་ཁང་གི་གསར་འགོད་པ་ཇ་མིལ་ (Jamil Chade) ལགས་ཀྱི་བཅར་འདྲི་དང་ལེན་གནང་རྗེས་སྦེལ་ཇམ་སྐུ་ཚབ་དོན་ཁང་དང་། ནི་དར་ལེནྜ་བོད་དོན་རྒྱབ་སྐྱོར་ཚོགས་པ། ནི་དར་ལེནྜ་བོད་རིགས་ལྷན་ཚོགས་བཅས་ཀྱིས་གོ་སྒྲིག་ཞུས་པའི་གུང་ཚིགས་ཚོགས་འདུར་ཕེབས་ཞུགས་གནང་ཡོད། སྐབས་དེར་བོད་དོན་དང་འབྲེལ་བའི་ཚོགས་པ་ཁག་ ༡༦ ཕེབས་ཡོད། དཔལ་ལྡན་སྲིད་སྐྱོང་མཆོག་གིས་བོད་དོན་དང་འབྲེལ་བའི་ཚོགས་པ་ཁག་གིས་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ལེགས་འབུལ་ཞུས་ཡོད་པ་བཅས། །
