༄༅། །ཕྱི་ལོ་ ༢༠༢༤ ཟླ་ ༡ ཚེས་ ༡༢ ཉིན་ནིའུ་ཛི་ལེནྚ་གྱི་ཨོག་ལེན་ཊི་ས་གནས་བོད་རིགས་མཐུན་ཚོགས་ཀྱིས་འགྲོ་བ་མིའི་ཐོབ་ཐང་རྩོད་ལེན་པ་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ལ་སྣེ་ལེན་དང་། ཆེ་བསྟོད་དགོང་ཚིགས་གསོལ་སྟོན་ཞིག་གོ་སྒྲིག་ཞུས་ཡོད་པ་རེད།
སྐབས་དེར་ཨོག་ལེན་ཊི་ས་གནས་བོད་རིགས་མཐུན་ཚོགས་ཀྱིས་མི་མང་ལ་གསུང་བཤད་ལས་རིམ་ཞིག་ཀྱང་གོ་སྒྲིག་ཞུས་ཡོད་པ་དང་། ཆབ་སྲིད་བཙོན་ཟུར་གོ་ལོག་འཇིགས་མེད་ལགས་ཀྱིས་སྐབས་དེར་ཕྱི་ལོ་ ༡༩༩༠ ཙམ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུམ་བཅུའི་དུས་དྲན་སྐབས་ཀྱི་གསུང་འཕྲིན་རྣམས་འགྲེམས་སྤེལ་བྱས་པ་སོགས་གསང་བའི་བྱ་བ་གནང་འགོ་ཚུགས་པའི་སྐོར་དང་། ཕྱི་ལོ་ ༢༠༠༤ ནས་ ༢༠༠༥ རིང་བོད་དོན་དང་འབྲེལ་བའི་ལས་འགུལ་ཤུགས་ཆེར་སྤེལ་སྐོར་ངོ་སྤྲོད་གནང།
ཁོང་ནི་བོད་རིགས་ཁྲོད་ལྷག་བསམ་ཅན་གྱི་སྤྱི་ཚོགས་ཞབས་ཞུ་བ་ཞིག་ལ་ངོས་འཛིན་བྱེད་ཀྱི་ཡོད་ཅིང། ཕྱིས་སུ་ཕྱི་ལོ་ ༢༠༠༨ ལོའི་བོད་ནང་དུ་གསུམ་བཅུའི་དུས་དྲན་གྱི་སྒེར་ལངས་སྐབས་མཉམ་ཞུགས་གནང་ཡོད་པ་མ་ཟད། དོན་འགྲུབ་དབང་ཆེན་དང་ལྷན་དུ་འཇིགས་བྲལ་ (Leaving Fear Behind) ཞེས་པའི་དངོས་བྱུང་གློག་བརྙན་ཞིག་ཀྱང་བཟོ་སྐྲུན་གནང་ཡོད་པ་རེད། དེས་རྐྱེན་གྱིས་རྒྱ་ནག་གཞུང་གིས་ ཕྱི་ལོ་ ༢༠༠༨ ནས་ ༢༠༡༢ བར་ཁོང་ཐེངས་གསུམ་བཙོན་འཇུག་བྱས་ཡོད་པ་དང་མཐར་མཚན་གཅིག་བྲོས་བྱོལ་དུ་ཕེབས་ཐུབ་པ་བྱུང་ཡོད།
དེའི་རྗེས་ཨོག་ལེནྚ་ས་གནས་བོད་རིགས་ཚོགས་པའི་ངོས་ནས་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱི་སེམས་ཤུགས་དང་བོད་དོན་ཆེད་བློས་གཏང་གནང་བར་ཐུགས་རྗེ་ལེགས་འབུལ་ཞུས་པ་དང་སྦྲགས། ཚོགས་མི་གཅིག་གིས་མགོ་ལོག་འཇིགས་མེད་ལགས་ནི་རང་གི་མཚན་དང་མཐུན་པར་འཇིགས་སྣང་མེད་པའི་ཐོག་ནས་བོད་དོན་འཐབ་རྩོད་གནང་ཡོད་པ་གསུངས།
མཐར་མགོ་ལོག་འཇིགས་མེད་ལགས་ཀྱིས་བཙན་བྱོལ་དུ་ཡོད་པའི་བོད་མི་རྣམས་ཆིག་སྒྲིལ་དགོས་གལ་ཆེན་པོ་ཡིན་པ་དང་། གལ་ཏེ་ཆིག་སྒྲིལ་མེད་ཚེ་ང་ཚོས་རྒྱ་ནག་གཞུང་གིས་དམིགས་དོན་སྒྲུབ་ཀྱི་ཡོད་ཅེས་གསུངས།
མགོ་ལོག་འཇིགས་མེད་ལགས་རང་གི་ནང་མི་དང་ལྷན་འབྱུང་འགྱུར་གྱི་བདུན་ཕྲག་ཁ་ཤས་རིང་ནིའུ་ཛི་ལེནྚ་དང་ལྷོ་གླིང་བརྒྱུད་ཕྱོགས་བསྐྱོད་གནང་གི་ཡོད་པ་དང་། ཁོང་ལྷོ་ཞི་བདེའི་རྒྱལ་མཚོའི་གླིང་ཕྲན་རྒྱལ་ཁབ་ཏུ་ཕེབས་པ་ཐེངས་གཉིས་པ་དེ་ཆགས་ཡོད་པ་བཅས།།
