༄༅། །ཕྱི་ལོ ༢༠༢༤ ཟླ་བ་ ༡ ཚེས ༢༥ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ནས་ཨེ་སི་ཊོ་ནི་ཡ་གྲོས་ཚོགས་ནང་བོད་ཀྱི་ཁྲིམས་དོན་གནས་བབ་སྐོར་ཉན་ཞིབ་གནང་ཡོད།
དེ་ཡང་གྲོས་ཚོགས་འཐུས་མི་ཇུཀྐལ་ལེ་རེཌ་ལགས་ནས་ཉན་ཞིབ་འགོ་འཛུགས་སྐབས་ཚོགས་འདུའི་རྒྱབ་ལྗོངས་དང་གལ་གནད་སྐོར་གསུང་བཤད་གནང་རྗེས་དཔལ་ལྡན་སྲིད་སྐྱོང་མཆོག་གིས་ཐོག་མར་བོད་ཀྱི་རྒྱབ་ལྗོངས་ལོ་རྒྱུས་དང་། དེ་ནས་དབུ་མའི་ལམ་གྱི་སྲིད་བྱུས་སྐོར། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ལ་བཙན་འཛུལ་མ་བྱས་གོང་བོད་དེ་རང་བཙན་རྒྱལ་ཁབ་ཡིན་པའི་ལོ་རྒྱུས་བདེན་དོན་གསལ་སྟོན་ནན་བརྗོད་དགོས་པའི་སྐོར་གསུང་བཤད་གནང་འདུག
སློབ་དཔོན་ལའོ་ལགས་ཀྱིས་རྒྱ་ནག་མིང་རྒྱལ་རབས་དང་ཆིང་རྒྱལ་རབས་ཀྱི་སྐབས་སུ་བོད་དེ་རྒྱ་ནག་ཁོངས་གཏོགས་རྩ་བ་ནས་མིན་པ་རྒྱ་ནག་གོང་མའི་ཡིག་ཆའི་བརྒྱུད་ཁུངས་སྐྱེལ་ར་སྤྲོད་གནང་འདུག་པ་མ་ཟད། དེའི་ཐོག་མཁས་དབང་མེ་ཁལ་ཝན་ལྦལ་ཊི་ལགས་ཀྱིས་ཁྲིམས་ལུགས་ཐོག་ནས་རྒྱ་ནག་གཞུང་གིས་བོད་དེ་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ཚུལ་ཤོད་བཞིན་པ་དེ་བདེན་པ་མིན་པའི་གནས་ཚུལ་གསལ་བཤད་གནང་འདུག དེ་ནས་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ལགས་ཀྱིས་བོད་ཀྱི་ལོ་རྒྱུས་དང་ཡིག་ཆ་ཁག་བརྒྱུད་བོད་རྒྱལ་ཁབ་ཀྱི་འབྱུང་ཁུངས་སྐོར་ལ་ཁུངས་སྐྱེལ་འགྲེལ་བརྗོད་གནང་ཡོད་པ་རེད། 
ཨེ་སི་ཊོ་ནི་ཡའི་རྒྱལ་ཁབ་ཀྱི་སྲིད་བློན་ཐོག་མ་སྐུ་ཞབས་མརཊ་ལར་མཆོག་གིས་ཀྱང་ཉན་ཞིབ་ཀྱི་ཚོགས་འདུ་དེར་རྒྱབ་སྐྱོར་གྱི་གསུང་འཕྲིན་ཞིག་གནང་ཡོད་པ་དེ་གྲོས་ཚོགས་འཐུས་མི་ཇུ་ཀུ་ཀལླེ་རེ་ཌི་ལགས་ཀྱིས་ཨེ་སི་ཊོ་ནི་ཡའི་སྐད་ཐོག་ནས་སྒྲོག་སྦྱངས་གནང་ཞིང་། བོད་ལ་ཡུན་རིང་ནས་རྒྱབ་སྐྱོར་ཤུགས་ཆེན་གནང་མཁན་རོ་ཡ་སི་ཌ་རི་ཌར་ལགས་ཀྱིས་ཨིན་སྐད་ཐོག་ལྗངས་ཀློག་གནང་ཡོད།
ཐེངས་འདིའི་ཉན་ཞིབ་དེ་བཞིན་ཨེ་སི་ཊོ་ནི་ཡ་གྲོས་ཚོགས་འཐུས་མི་ཇུ་ཀུ་ཀལླེ་རཱེཌ་ལགས་ནས་གཙོ་སྐྱོང་གནང་ཡོད་པ་དང་། ཁོང་ནི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་། ཨེ་སི་ཊོ་ནི་ཡ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་ཡང་ཡིན། ཉན་ཞིབ་སྐབས་གྲོས་ཚོགས་འཐུས་མི་སུམ་ཅུ་སོ་ལྔ་ཙམ་དང་། གསར་འགོད་པ། ཤེས་ཡོན་ཅན་དང་མཁས་དབང། བོད་དོན་རྒྱབ་སྐྱོར་བ་སོགས་ཚོགས་ཞུགས་གནང་འདུག
ཉན་ཞིབ་ཀྱི་རྗེས་སུ་གྲོས་ཚོགས་ཁང་དུ་ཕེབས་བསུའི་མཛད་སྒོ་ཞིག་ཚོགས་ཤིང་། དེར་སྲིད་སྐྱོང་མཆོག་ནས་གསུང་བཤད་པ་དང་ཚོགས་བཅར་བ་ལྷན་མཇལ་མོལ་གནང་ཡོད་པ་མ་ཟད། གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་མི་རྣམ་པ་དང་ས་གནས་བོད་དོན་རྒྱབ་སྐྱོར་བ་ཚོས་དཔལ་ལྡན་སྲིད་སྐྱོང་མཆོག་དབུས་པའི་བོད་མིའི་སྐུ་ཚབ་རྣམས་ལ་ཕེབས་བསུའི་སྣེ་ལེན་གཟབ་རྒྱས་དང་། གྲོས་ཚོགས་ཀྱི་ཚོགས་ཁང་གཟིགས་སྐོར་དུ་འཁྲིད་གནང་ཡོད་པ་རེད།
དཔལ་ལྡན་སྲིད་སྐྱོང་མཆོག་གྲོས་ཚོགས་སུ་ཕེབས་པའི་སྐབས་ས་གནས་ཀྱི་གསར་འགོད་པའི་བཅར་འདྲིར་དང་ལེན་གནང་ཞིང་། གསར་ཁང་གཉིས་ནས་གནས་ཚུལ་འགྲེམས་སྤེལ་གནང་ཡོད་པ་བཅས།། 
