༄༅། །ཨི་ཊ་ལིར་རྟེན་གཞི་བྱས་པའི་འོད་ཟེར་རོགས་ཚོགས་ཀྱི་འབུམ་རམས་པ་ར་ཕེ་ལ་ཅི་ནོ་ན་ (Raffaella Chionna) ལགས་ཀྱིས་སྣེ་ཁྲིད་པའི་སྐུ་ཚབ་ཚོགས་ཆུང་ཞིག་བོད་མིའི་སྒྲིག་འཛུགས་སུ་ཆེད་ཕེབས་ཀྱིས་འབྲེལ་ཡོད་ལྷན་ཁང་ཁག་གི་བཀའ་བློན་དང་། དྲུང་ཆེ་ལྷན་མཇལ་འཕྲད་གནང་སྟེ་མ་འོངས་ལས་འཆར་ཁག་གི་སྐོར་བཀའ་བསྡུར་གནང་ཡོད་པ་རེད།
དེ་ཡང་ཕྱི་ལོ་ ༢༠༡༤ ཟླ་བ་ ༠༡ ཚེས་ ༠༣ ཉིན་ཁོང་རྣམས་འཕྲོད་བསྟེན་ལས་ཁུངས་སུ་ཆེད་ཕེབས་ཀྱིས་འཕྲོད་བསྟེན་དྲུང་ཆེ་ཟླ་བ་ཚུལ་ཁྲིམས་ལགས་དང་། འབྲེལ་ཡོད་ལས་བྱེད་ལྷན་དུ་མཇལ་འཕྲད་གནང་སྟེ་འོད་ཟེར་རོགས་ཚོགས་ནས་སྨན་ལྷ་སྨན་ཁང་བསྐྱར་བཟོའི་སླད་དཔལ་འབྱོར་མཐུན་འགྱུར་ཞུ་ཕྱོགས་སྐོར་གྲོས་མོལ་གནང་ཡོད། དེ་བཞིན་གོང་ཚེས་ཉིན་རོགས་ཚོགས་ཀྱི་སྐུ་ཚབ་ཚོགས་ཆུང་བོད་མིའི་སྒྲིག་འཛུགས་ཤེས་རིག་ལས་ཁུངས་སུ་ཆེད་ཕེབས་གནང་སྟེ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། འབྲེལ་ཡོད་ལས་བྱེད་ལྷན་དུ་མཇལ་འཕྲད་གནང་སྟེ་ཡར་རྒྱས་འཛུགས་སྐྲུན་ལས་འཆར་ཁག་ཅིག་སྐོར་གྲོས་མོལ་གནང་ཡོད་པ་རེད།
དེ་རྗེས་སྐུ་ཚབ་རྣམ་པ་མེས་དབོན་གཙུག་ལག་དཔེ་སྟོན་སློབ་གྲྭར་ཕེབས་ཏེ་སློབ་གྲྭའི་འཛིན་ཁང་དང་། ཚོགས་ཁང་། དཔེ་མཛོད་ཁང་། སྐྱེད་ཚལ་བཅས་སུ་གཟིགས་སྐོར་གནང་སྟེ་རོགས་ཚོགས་ངོས་ནས་སློབ་གྲྭའི་ལས་འཆར་ཁག་ལ་རོགས་སྐྱོར་གང་ཐུབ་གནང་རྒྱུའི་ཞལ་བཞེས་གནང་ཡོད་པ་བཅས།། 
