༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༡༩ ནས་ ༢༡ བར་ཉིན་གསུམ་རིང་འཚེ་མེད་ཞི་བའི་འཐབ་རྩོད་དང་། དེང་དུས་འཕྲུལ་ལས་ཡར་ཐོན་ཅན་གྱི་གཅིག་སྡུད་རིང་ལུགས། མ་འོངས་པའི་རྒྱ་ནག་ (The Symposium on Non-Violent Resistance, High-Tech Totalitarianism and China’s Future) ཅེས་པའི་བརྗོད་གཞིའི་སྟེང་བགྲོ་གླེང་ཚོགས་ཆེན་ཞིག་འཚོགས་གནང་བ་དང་། ཚོགས་ཆེན་འདི་བཞིན་ཨ་རིར་བརྟེན་གཞི་བྱས་པའི་དམར་ཤོག་གིས་གནོད་འཚེ་བྱུང་བར་རྗེས་དྲན་ཐེབས་རྩ་ཁང་དང་།( The Victims Communism Memorial Foundation) རྒྱ་ནག་ལས་འགུལ། (The China Action) རྒྱ་ནག་མང་གཙོ་འཕོ་འགྱུར་ལྟེ་གནས་ཁང་། (The Institute for China’s Democratic Transition) བཅས་ནས་མཉམ་འབྲེལ་ཐོག་གོ་སྒྲིག་གནང་བ་རེད་འདུག  རྒྱ་རིགས་མང་གཙོ་དོན་གཉེར་བ་དང་ཁྲིམས་རྩོད་པ་གྲགས་ཅན་སྐུ་ཞབས་ཐེང་པཡོ་ནས་ཚོགས་ཆེན་འདིའི་འགན་འཁུར་གཙོ་བོ་བཞེས་ནས་ཕྱོགས་མཐའ་ཁག་ལ་ཡོད་པའི་རྒྱ་རིགས་མཁས་དབང་དང་། རྩོམ་པ་པོ། དེ་བཞིན་ལས་འགུལ་འདྲ་མིན་གྱི་འགན་འཁུར་མི་སྣ་ཚོགས་ཆེན་འདིར་མགྲོན་འབོད་བྱས་འདུག

དེ་ཡང་རྒྱ་ནག་ཞིབ་འཇུག་པ་གྲགས་ཅན་སྐུ་ཞབས་ཕེ་རི་ལིན། ( Perry Lin) སློབ་དཔོན་ཚའི་ཞྭ།( Caixia ) སྐུ་ཞབས་ཧུ་ཕིང་།  (Mr. Huping) སྐུ་མཁྱེན་མ་ཝང་རོས་ཆིན། (Mrs. Wang Ruiqin) ཡུད་གུར་རང་དབང་འཐབ་རྩོད་པ་སྐུ་ཞབས་ཨི་ལི་ཤཊ།(Mr. Ilshat Kokbore) སྐུ་མཁྱེན་མ་ཐང་ལུ་ (Rose Tang) དང་དེ་མིན་རྒྱ་རིགས་ཚོགས་པ་དང་སྒེར་མང་པོ་ནས་ཚོགས་ཆེན་འདིར་མཉམ་ཞུགས་གནང་སོང་། ཚོགས་ཆེན་འདིའི་ཐོག་མཁས་དབང་རྣམས་ནས་གཏམ་བཤད་དང་མ་འོངས་པའི་ལས་འགུལ་སྤེལ་ཕྱོགས་སོགས་ཀྱི་ཐད་ལ་བགྲོ་གླེང་ལྷུག་པོ་གནང་བ་མ་ཟད། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་གཏམ་བཤད་གནང་བ་དང་མགོན་པོ་མཆོག་ནི་འཚེ་མེད་ཞི་བའི་འཐབ་རྩོད་ཀྱི་ངོ་ཚབ་ཉག་ཅིག་ཡིན་པ་གསུངས་སོང་།

སྐབས་དེར་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱང་མགྲོན་འབོད་ལྟར་ཚོགས་ཆེན་ལ་མཉམ་ཞུགས་གནང་ནས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཟླ་བ་ ༡༢ པའི་ནང་འགྲོ་བ་མིའི་ཐོབ་ཐང་ཡོང་ཁྱབ་གསལ་བསྒྲགས་ཀྱི་དུས་དྲན་ཉིན་སྩལ་བའི་བཀའ་སློབ་ཚོགས་བཅར་བར་སྒྲོགས་སྦྱང་ཞུས་ནས། མགོན་པོ་མཆོག་གི་འཚེ་མེད་ཞི་བའི་ལྟ་གྲུབ་ཀྱིས་འཛམ་གླིང་གི་དཀའ་རྙོག་ཡོངས་ཕན་ཚུན་གྲོས་མོལ་གྱི་ལམ་ནས་སེལ་ཐུབ་དགོས་པ་དང་། བོད་མི་རྣམས་ནས་༸གོང་ས་མཆོག་གི་ལམ་སྟོན་ལྟར་མང་གཙོའི་སྒྲིག་འཛུགས་འོག་འཚེ་མེད་ཞི་བའི་འཐབ་རྩོད་ཀྱི་ལས་འགུལ་སྣ་མང་སྤེལ་བཞིན་ཡོད་པ་འགྲེལ་བརྗོད་གནང་། རྒྱ་ནག་གིས་དེང་དུས་འཕྲུལ་ལས་ཡར་ཐོན་ཅན་དག་བེད་སྤྱད་ནས་བོད་མིར་གཉའ་གནོན་བྱེད་པ་མ་ཟད་སྐད་ཡིག་རིག་གཞུང་དང་བཅས་པ་རྩ་མེད་བཟོ་ཐབས་བྱེད་བཞིན་པའི་སྐབས་འདིར། བོད་མིས་རིག་ནུས་བརྒྱུད་བོད་ཀྱི་སྐད་ཡིག་དང་རིག་གཞུང་བདག་ཉར་ཐུབ་པའི་ལས་གཞི་རྩོམ་བཞིན་ཡོད་པས་རྒྱ་ནག་གི་དམིགས་ཡུལ་ངན་པ་འདི་དག་སྟོང་བསམ་དང་ཉིན་མོའི་རྨི་ལམ་ཡིན་པ་བཤད། 

ཚོགས་ཆེན་འདི་བརྒྱུད་རྒྱ་ནག་མང་གཙོ་དོན་གཉེར་བའི་ཚོགས་པ་འདྲ་མིན་དང་ལས་འགུལ་འདྲ་མིན་དབར་མ་འོངས་པར་མུ་མཐུད་མཉམ་ལས་བྱེད་རྒྱུར་མོས་མཐུན་བྱུང་བའི་ཐོག་ཚོགས་འདུ་མཇུག་བསྡུས་ཡོད་པ་བཅས།།