༄༅། །འདི་གར་བྱང་ཨ་རིའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བྱང་ཨ་རིའི་སྐུ་ཚབ་དོན་གཅོད་ལས་ཁུངས་སུ་ས་གནས་ནས་གནས་ཚུལ་འབྱོར་བ་ལྟར་ན།  ཨ་རིའི་མངའ་སྡེ་ལྦར་མོཎ་ཊ་(Vermont) ནང་ཡོད་པའི་ལྦར་མོཎ་ཊ་བོད་རིགས་སྤྱི་མཐུན་ཚོགས་པས་ཉེ་ཆར་ <<བོད་ཀྱི་དུས་སྟོན་ཐེངས་བཅུ་དགུ་པ།>> གོ་སྒྲིག་གིས་བོད་དོན་དྲིལ་བསྒྲགས་གནང་འདུག

བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་རིང་དབྱངས་སྐྱིད་ལགས་ནས་འདི་གར་ངོ་སྤྲོད་གནང་བར་གཞིགས་ན།  ལྦར་མོཎ་ཊ་བོད་རིགས་སྤྱི་མཐུན་ཚོགས་པས་ལོ་ལྟར་བོད་ཀྱི་དུས་སྟོན་གོ་སྒྲིག་གིས་བོད་དོན་དྲིལ་བསྒྲགས་བྱེད་ཀྱི་ཡོད་པ་ལྟར།  བོད་ཀྱི་དུས་སྟོན་ཐེངས་ ༡༩ པ་དེ་ཉེ་ཆར་གོ་སྒྲིག་བྱེད་ཐུབ་པ་བྱུང་ཞིང་།  དེའི་དམིགས་ཡུལ་གཙོ་བོ་ནི།  བོད་ཀྱི་ཆོས་དང་རིག་གཞུང་གི་རིན་ཐང་ངོ་སྤྲོད་ཀྱི་ལམ་ནས་བོད་མི་རིགས་ནི་མི་རིགས་གཞན་སུ་དང་ཡང་མི་འདྲ་བའི་དམིགས་བསལ་གྱི་མི་རིགས་ཤིག་ཡིན་པ་དང་།  ཡིག་ཆ་འགྲེམས་སྤེལ་གྱི་ལམ་ནས་བོད་ནང་གི་ད་ལྟའི་དཀའ་ངལ་ངོ་སྤྲོད་བྱེད་རྒྱུ་དེ་ཡིན།  ཞེས་གསུང་གི་འདུག

ས་གནས་ནས་འབྱོར་བའི་གནས་ཚུལ་ལ་གཞིགས་ན།  ཐེངས་འདིའི་དུས་སྟོན་སྐབས་བྱེད་སྒོ་སྣ་ཚོགས་ཡོད་པའི་ཁྲོད་ནས་ཡར་ཀླུང་བཀྲ་ཤིས་ཞོལ་པ་དང་།  གཡག  སེང་གེ  བོད་མིའི་ཆས་གོས་སོགས་འཁྲབ་སྟོན་ཞུས་པ་དང་།  རྒྱལ་སྤྱིའི་བོད་དོན་ལས་འགུལ་ཁང་ནས་མཁོ་སྤྲོད་གནང་བའི་བོད་སྐོར་གྱི་ཨིན་ཡིག་ཡིག་ཆ་འགྲེམས་སྤེལ་ཞུས་པ་དེ་དག་ལ།  དུས་སྟོན་ལ་ཕེབས་མཁན་ས་གནས་ཡུལ་མིས་དམིགས་བསལ་གྱི་དོ་སྣང་གནང་འདུག 

ས་གནས་བོད་རིགས་སྤྱི་མཐུན་ཚོགས་པས་ <<བོད་ཀྱི་དུས་སྟོན་ཐེངས་བཅུ་དགུ་པ།>> གྲ་སྒྲིག་གནང་བའི་སྐོར་ས་གནས་ཀྱི་ (WCAX-TV) བརྙན་འཕྲིན་ཁང་ནས་རྒྱང་བསྲིངས་དང་འབྲེལ་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ཚེ་རིང་དབྱངས་སྐྱིད་ལགས་ལ་བཅར་འདྲི་གནང་འདུག

ཤེས་རྟོགས་བྱུང་བར་གཞིགས་ན།   ལྦར་མོཎ་ཊ་བོད་རིགས་སྤྱི་མཐུན་ཚོགས་པས་བོད་ཀྱི་དུས་སྟོན་གོ་སྒྲིག་གནང་ནས་ལོ་མང་སོང་ཞིང་།  ད་ཆ་བོད་ཀྱི་དུས་སྟོན་ནི་ལྦར་མོཎ་ཊ་བོད་རིགས་སྤྱི་མཐུན་ཚོགས་པའི་ལོ་ལྟར་གྱི་འཆར་ཅན་ལས་འགུལ་ཞིག་ཏུ་གྱུར་ཟིན་པ་དང་།  དུས་སྟོན་ག་དུས་གོ་སྒྲིག་གནང་ཡང་།  བོད་དོན་དྲིལ་བསྒྲགས་ཡག་པོ་ཡོང་བའི་ཁར།  ཞོར་ལ་བོད་རིགས་སྤྱི་མཐུན་ཚོགས་པའི་དཔལ་འབྱོར་འདུ་འགོད་ལ་ཡང་ཕན་ཐོགས་ཡོང་གི་ཡོད་ཅིང་།  དེ་ནི་གཙོ་བོ་ས་གནས་མང་ཚོགས་དང་བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་ཀྱིས་ནུས་པ་མཉམ་སྤུངས་གནང་བའི་གྲུབ་འབྲས་ཤིག་ཡིན་པ་རེད།།