༄༅། །འདི་གའི་ཆེད་གཉེར་གསར་འགོད་པ་བློ་བཟང་སྒྲོལ་དཀར་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༡ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བར་ཝཱ་རཱ་ཎ་སཱི་བོད་ཀྱི་གཙུག་ལག་སློབ་གཉེར་ཁང་དང་ཝཱ་རཱ་ཎ་སཱི་སློབ་ཟུར་ཐུན་མོང་། སྤོན་ཊ་ཆོལ་གསུམ་བོད་མིའི་གཞིས་ཆགས་དང་དཔལ་ཞ་ལུ་དགོན་པ། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དང་དགེ་ལྡན་སྤྱི་ལས་ཁང་བཅས་ཚོགས་ཁག་གསུམ་ནས་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་ཞུགས་བསྟར་འབུལ་ཞུས་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཙམ་ལ་རྡོ་རྗེ་གདན་གྱི་དགའ་ལྡན་འཕེལ་རྒྱས་གླིང་ནས་དུས་དབང་གསུང་ཆོས་ར་བར་ཆིབས་བསྒྱུར་སྐབས་ཕེབས་ལམ་དུ་དགེ་འདུན་པ་དང་། ཝཱ་རཱ་ན་སཱིའི་སློབ་སློབ་ཕྲུག བརྟན་བཞུགས་གོ་སྒྲིག་ཞུ་མཁན་ཚོགས་པ་ཁག་གི་འཐུས་ཚབ་བཅས་ནས་སྤོས་གནས། སྤྱན་རྒྱ། སྤོས་འཛིན་དང་བཅས་གདན་འདྲེན་ཞུས་ཏེ་བཞུགས་ཁྲིར་འཁོད་མཚམས་དགའ་ལྡན་ཁྲི་རིན་པོ་ཆེ་མཆོག་གིས་མཇལ་དར་རྐྱང་འབུལ་ཞུས་པ་དང་། མཎྜལ་ཚོམ་བུ་འདེགས་འབུལ། ཞལ་འདོན་ཚིག་བསྟུན་གྱིས་སྐུ་དང་། གསུང་། ཐུགས། བུམ་པ། རིགས་ལྔའི་མཚན་མ། ཚེ་ཆང་། ཚེ་རིལ། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་དང་རྫས་བརྒྱད་བཅས་རིམ་པར་ཕུལ་ཞིང་། བྱང་རྩེ་ཆོས་རྗེས་མཇལ་ཁ་ཞུས་པ་དང་། དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས་མཎྜལ་འདེགས་འབུལ། དེ་བཞིན་བརྟན་བཞུགས་གོ་སྒྲིག་ཚོགས་ཆུང་གི་འཐུས་མི་བཅོ་ལྔ་ནས་མཇལ་ཁ་ཞུས་མཚམས་སྤྱི་ནོར་་གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་རྩལ་དོན། ཆོས་གྲོགས་ཚང་མར་ཞུ་རྒྱུར། གནས་ཁྱད་པར་ཅན་རྡོ་རྗེ་གདན་དུ་བོད་རིགས་སེར་སྐྱ་གཙོ་བོར་གྱུར་པའི་སངས་རྒྱས་ཀྱི་བསྟན་པ་ལ་དོ་སྣང་ཡོད་པ་དང་། ཡང་སྒོས་ངོས་རང་སྒེར་ལ་དགའ་མོས་བྱེད་མཁན་འཛམ་གླིང་ཐོག་མི་མང་པོ་ཞིག་ཡོད་པ་རེད། དེ་དག་ལས་སེམས་ཤུགས་འཁྱེར་ཏེ་དེ་རིང་བརྟན་བཞུགས་གནང་བ་རེད། ངོས་རང་ལ་ཆ་བཞག་ན་གང་ལྟར་ད་ལྟའི་བར་དུ་འཛམ་གླིང་འདིར་ཕན་ཐོགས་བྱས་པ་ལ་བསལ་བློ་གཏོང་དུས་རྗེས་སུ་ཡི་རངས་ཐོབ་སྡོད་པ་ཞིག་དང་། ཕྱིན་ཆད་ཡིན་ནའང་ད་དུང་ལོ་བརྒྱ་ཕྲག་གི་རིང་འཛམ་གླིང་འདིར་ཕན་ཐོགས་བྱེད་ཐུབ་པ་ཞིག་ཡོང་རྒྱུ་གསལ་པོ་རེད།
ལྷག་དོན་འཛམ་གླིང་འདིར་རང་ཕྱོགས་དང་གཞན་ཕྱོགས་ཟེར་བའི་ཐོག་ནས། འཛམ་གླིང་སྤྱི་ཡོངས་ཀྱི་ཆ་ནས་འཛམ་གླིང་ཤར་ནུབ་དང་ལྷོ་བྱང་གི་ཐོག་ནས་ང་ཚོ་དང་ཁྱོད་ཚོ་ཟེར་བའི་བསམ་བློ་ཤུགས་ཆེན་པོ་ཡོད་པ་གསར་འགྱུར་ནང་མཐོང་སྡོད་པ་དེ་རེད། འཛམ་གླིང་གང་སར་མི་གཅིག་གྱུར་གྱི་འདུ་ཤེས་དེ་ཙམ་མེད་པར་ལྟ་གྲུབ་འདྲ་མིན་དང་། ཆོས་ལུགས་འདྲ་མིན། ས་བབ་ཀྱི་གནས་སྟངས་འདྲ་མིན་ཐོག་ནས་ང་ཚོ་དང་ཁྱོད་ཚོ་ཞེས་ཕྱོགས་དང་ཕྱོགས་འཛིན་བྱེད་པ་ཤུགས་ཆེན་པོ་རེད། འཛམ་གླིང་འདིར་མི་དུང་ཕྱུར་བདུན་ཅུ་ལྷག་ཡོད་པ་མི་གཅིག་གྱུར་ཆགས་ཡོད་པས་དེའི་འདུ་ཤེས་ཐོག་ནས་རིམ་བཞིན་ཚང་མ་མཐུན་པོ་ཞིག་དང་། གཅིག་གིས་གཅིག་ལ་རོགས་བྱེད་པའི་འཛམ་གླིང་ཞིག་ཡོང་ཐུབ་པ་ཞིག་ངོས་ཀྱིས་རེ་བ་རྒྱག་གི་ཡོད་ལ། ག་ཚོད་ཐུབ་ཐུབ་ཀྱིས་མི་གཅིག་གྱུར་ཡིན་པ་བཤད་ཀྱི་ཡོད། འཛམ་གླིང་འདིའི་སྟེང་མི་ཚང་མ་སྐྱེས་པའི་སྐབས་སུ་མའི་ནུ་ཞོས་གསོས་པ་གཅིག་པ་ཡིན་པས་མི་ཚེ་འདིའི་རིང་ལ་མི་གཅིག་གྱུར་གྱི་འདུ་ཤེས་ཐོག་ནས་ཕན་ཚུན་རོགས་རམ་དང་ཕན་ཐོགས་བྱེད་པ་མ་གཏོགས་ང་ཚོ་དང་ཁྱོད་ཚོ་ཞེས་པའི་སྐད་ཆ་དེ་མི་དགོས་པ་རེད།
ངོས་ཀྱིས་འཛམ་གླིང་གང་སར་མི་གཅིག་གྱུར་ཞེས་པ་བཤད་ཀྱི་ཡོད། དེ་རིང་འདིར་ཆོས་ལུགས་འདྲ་མིན་དང་། ལུང་པ་འདྲ་མིན། འཛམ་གླིང་གི་མི་རིགས་ཀྱི་ཁ་དོག་ཐོག་ནས་བཤད་ནའང་སྣ་ཚོགས་པ་ཡོད་ཀྱང་། ང་ཚོ་ཚང་མ་འདིར་མི་གཅིག་གྱུར་གྱི་གནས་སྟངས་ཐོག་ནས་སྤྲོ་སེམས་འཁོལ་བའི་ངང་རུབ་རུབ་བྱས་པ་རེད། ཚང་མ་ལྷག་བསམ་རྩེ་གཅིག་བྱས་ཏེ་འདིར་འཁོད་པ་དེ་ལ་ཐུགས་རྗེ་ཆེ་ཞུས་ཞུ་རྒྱུ་ཡིན། ངོས་ལ་མཚོན་ན་མདོ་སྨད་ཙོང་ཁའི་ཡུལ་ནས་ཡོང་བ་རེད། དབུས་གཙང་ཁུལ་དུ་བསྡད་པ་དང་། དེ་ནས་བཙན་བྱོལ་བ་ཆགས་པ་རེད། ངོས་ཀྱི་བསམ་བློའི་ནང་དུ་ངོས་རས་མདོ་སྨད་པ་ཡིན་བསམ་པ་ལྟ་བུའི་བསམ་བློའི་དབྱེ་བ་གཏན་ནས་མེད། མི་གཅིག་གྱུར་གྱི་འདུ་ཤེས་ཐོག་ནས་ཚང་མར་ག་ཚོད་ཐུབ་ཐུབ་ཀྱིས་དངོས་དང་ཤུགས་ནས་ཕན་ཐོགས་བྱེད་ཐུབ་པའི་སེམས་ཤུགས་འཁྱེར་གྱི་ཡོད། ཆོས་གྲོགས་ཚང་མས་མི་གཅིག་གྱུར་གྱི་འདུ་ཤེས་ཐོག་ནས་གཅིག་གིས་གཅིག་ལ་ཕན་འདོགས་པ་དང་། འཛམ་གླིང་ལ་དོན་དམ་གྱི་ཞི་བདེ་ཡག་པོ་ཞིག་ཡོང་ཐུབ་རྒྱུ་དགོངས་པར་ཆོངས། དེ་རིང་བརྟན་བཞུགས་ཕུལ་མཁན་ཁྱོད་ཚོ་དང་། ༸བདག་ཁྲི་རིན་པོ་ཆེས་མཚོན་པའི་འདིར་བཞུགས་རྣམས་དད་པ་དམ་ཚིག་གཡོ་བ་མེད་པའི་ཐོག་ནས་བརྟན་བཞུགས་གསུང་པ་དེར་ཐུགས་རྗེ་ཆེ་ཞུ་རྒྱུ་ཡིན།
དེ་རིང་སྤྱི་ལོའི་ལོ་གསར་ལ་འཁེལ་ཡོད། ལོ་གསར་པ་འདིའི་རིང་ལ་འཛམ་གླིང་འདིར་ང་ཚོ་དང་ཁྱོད་ཚོ་ཟེར་བའི་འཐེན་འཁྱེར་ལོ་རྙིང་པའི་ནང་རྫོགས་པར་ཆ་བཞག་སྟེ། ལོ་གསར་པའི་ནང་དུ་མི་གཅིག་གྱུར་གྱི་འདུ་ཤེས་ཐོག་ནས་གཅིག་གིས་གཅིག་ལ་རོགས་བྱེད་པ་མ་གཏོགས་འཐེན་འཁྱེར་གྱི་སྐད་ཆ་མེད་པ་བྱོས། འཛམ་གླིང་འདི་ནི་མི་དུང་ཕྱུར་བདུན་ཅུ་ལྷག་ཡོད་པ་ཚང་མའི་སྤྱི་བའི་འཛམ་གླིང་ཆགས་ཡོད། དེའི་ནང་ང་ཚོ་དང་ཁྱོད་ཚོ་ཞེས་རྩོད་རྒྱག་པ་དང་ཕྱོགས་དང་ཕྱོགས་འཐེན་བྱེད་པའི་གཞི་རྩ་ཁོ་རང་མི་འདུག ང་ཚོ་སངས་རྒྱས་པའི་ཆོས་པ་ཚོས་སེམས་ཅན་ཐམས་ཅད་ཟེར་གྱི་ཡོད། སྔོན་ལ་སྲིད་པ་གསུམ་གྱིས་མཚོན་པའི་སེམས་ཅན་ཐམས་ཅད་བསམ་མ་ཐུབ་ནའང་། འཛམ་གླིང་འདིའི་མི་དུང་བདུན་ཅུ་ལྷག་ཡོད་པ་ལ་གཅིག་འགྱུར་གྱི་འདུ་ཤེས་ཐོག་ནས་ཕན་ཚུན་འཆམ་པོ་དང་རོགས་བྱེད་དགོས་བཅས་ཞུ་སྙིང་འདོད་བྱུང་། དེ་རིང་སྤྱི་ལོའི་ལོ་གསར་ཆགས་ཡོད་པས་ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན། 
འཛམ་གླིང་འདིར་ཧ་ཅང་ཚ་བ་རྒྱས་པ་དང་། ཡང་ས་ཆ་ཁ་ཤས་ལ་ས་འགུལ་བརྒྱབ་པའི་འབྱུང་བའི་གནོད་པའི་གནས་ཚུལ་ཡོང་གི་ཡོད། དེ་དག་ཚང་མའི་ཆེད་དུ་སྨོན་ལམ་རྒྱག་པ་དང་། ག་ཚོད་ཐུབ་ཐུབ་ཀྱིས་རོགས་བྱེད་དགོས། རྒྱ་ནག་ལ་ཆ་བཞག་ན་ས་ཆ་ཁ་ཤས་ལ་ཆར་བ་ཧ་ཅང་དཀོན་པོ་དང་། ས་ཆ་ཁ་ཤས་ལ་གངས་ཆར་ཤུགས་ཆེན་བབ་ནས་དཀའ་ངལ་འཕྲད་ཀྱི་འདུག དཀའ་ངལ་དེ་དག་རིམ་བཞིན་ཇེ་ཉུང་དུ་འགྲོ་བར་ང་ཚོ་ཚང་མས་སྨོན་ལམ་རྒྱག་རྒྱུ་ཧ་ཅང་གལ་ཆེན་པོ་རེད། ང་ཚོ་ཆོས་པ་རེད། འཛམ་གླིང་འདིར་འགྲོ་བ་མིའི་རིགས་ལ་དཀའ་ངལ་འཕྲད་པ་སེལ་བའི་ཆེད་དུ་སྐབས་སུ་བབ་པ་འཕགས་པ་སྤྱན་རས་གཟིགས་ལ་གསོལ་བ་བཏབ་སྟེ་མ་ཎི་ཕྲེང་སྐོར་གཅིག་བསག་ཤོག ཅེས་མ་ཎི་ཕྲེང་སྐོར་རེ་བསགས་པ་དང་། དེ་རྗེས་སེམས་པ་བཟང་པོ་བློ་གྲོས་ཀྱི་རྣམ་དཔྱོད་དང་ཟུང་དུ་འབྲེལ་ན་ཡག་པོ་འདུག དེ་མིན་སེམས་པ་བཟང་པོ་གཅིག་པུས་དེ་ཙམ་གྱིས་ནུས་པ་ཐོན་ཐུབ་པ་ཁག་པོ་འདུག ཤེས་རབ་ཧ་ཅང་གལ་ཆེན་པོ་རེད། དེར་བརྟེན། ཨ་ར་པ་ཙ་ཏོག་ཙམ་གསོག་ཅེས་བཀའ་སློབ་དང་འབྲེལ་ཨ་ར་པ་ཙ་བགྲང་གསོང་མཛད་དེ་མུ་མཐུད་བཀའ་སློབ་སྩལ་དོན། སེམས་པ་བཟང་པོ་བྱེད་པ་དང་ཆོས་རིག་པའི་རྣམ་འབྱེད་ཀྱི་ཤེས་རབ་ཀྱིས་འཕྲལ་ཕུགས་རྒྱང་གསུམ་གྱི་གནས་ཚུལ་ལ་ཞིབ་འཇུག་བྱས་ཏེ། རང་གཞན་ཚང་མ་ཕུང་ལ་སྦྱོར་བའི་བརྣབ་སེམས་གནོད་སེམས་སོགས་ཇེ་ཉུང་ལ་བཏང་། ཀུན་ལ་ཕན་ཐོགས་བྱེད་པའི་གཞན་ཕན་གྱི་བློ་གོང་ནས་གོང་དུ་སྤེལ་དགོས། དེ་ཡང་གླེན་པ་གཏི་མུག་གི་སྐད་ཆ་མིན་པར་ཆོས་རིག་པའི་རྣམ་འབྱེད་ཀྱི་ཤེས་རབ་ཀྱི་གྲོགས་དང་བཅས་པའི་ཐོག་ནས་གཞན་ཕན་སྒྲུབ་རྒྱུ་ང་ཚོ་ཚང་མར་སྐབས་སུ་བབ་པའི་ལས་འགན་རེད་ལ། མི་ལུས་ཐོབ་པའི་གོ་ཆོད་པ་ཞིག་བྱེད་དགོས་པ་རེད། ཅེས་བཀའ་སློབ་སྩལ།
མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་འདིར་དཔལ་ས་སྐྱ་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་། དགའ་ལྡན་ཁྲི་པ་བརྒྱ་དང་བཞི་པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག ས་སྐྱ་ཁྲི་འཛིན་མཆོག ཇོ་ནང་རྒྱལ་ཚབ་རིན་པོ་ཆེ། བྱང་རྩེ་ཆོས་རྗེ། ཀུན་བདེ་གླིང་རིན་པོ་ཆེ། གླིང་རིན་པོ་ཆེ། ཀིརྟི་སྐྱབས་མགོན་རིན་པོ་ཆེ། རྣམ་གྲྭ་མཁན་རིན་པོ་ཆེ། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་སོགས་ཀྱིས་གཙོས་སེར་སྐྱ་སྟོང་ཕྲག་མང་པོ་བཅར་གནང་ཡོད་པ་བཅས།།
