༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༡༦ ཉིན་རྡ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་རྡ་རམ་སའི་གྲོང་སྡེ་སྤྱི་ཁྱབ་གསར་པ་ནཱི་ནུ་ཤར་མ་(Neenu Sharma)ལགས་དང་མཇལ་འཕྲད་གནང་ཡོད།

དེ་ཡང་མཇལ་མོལ་སྐབས་ས་གནས་འགོ་འཛིན་དཀོན་མཆོག་མིག་དམར་ལགས་ནས་ལྕམ་སྐུ་མཆོག་ཉེ་ལམ་གྲོང་སྡེ་སྤྱི་ཁྱབ་ཀྱི་འོས་བསྡུའི་ནང་རྒྱལ་ཁ་ཐོབ་པར་རྡ་ས་ས་གནས་བོད་མིའི་ཚབ་ཞུས་ཏེ་འཚམས་འདྲི་དང་སྦྲགས། སྟོན་པའི་སྐུ་ཐང་དང་དཀར་གཙང་མཇལ་དར་ཕུལ་ཏེ་ཡོང་འགྱུར་ལས་དོན་མཐའ་དག་ལམ་ལྷོངས་ཡོང་བའི་སྨོན་འདུན་ཞུས་ཡོད། དེ་དང་ཆབས་ཅིག་ས་གནས་འགོ་འཛིན་ནས་གྲོང་སྡེའི་སྤྱི་ཁྱབ་ངོས་ནས་བཞུགས་སྒར་རྡ་རམ་ས་ལར་ཡར་རྒྱས་ལས་གཞི་ཇི་འོས་སྤེལ་གནང་ཡོང་བ་དང་། ལྷག་པར་བོད་མིའི་བདེ་དོན་དང་འབྲེལ་བའི་གནད་དོན་ཐོག་ཐུགས་ཁུར་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས་པར། གྲོང་སྡེའི་སྤྱི་ཁྱབ་མཆོག་ནས་དེ་ལྟར་གང་ཐུབ་གནང་རྒྱུའི་ཞལ་བཞེས་བཟང་པོ་གནང་ཡོད་པ་བཅས།།