༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༢༡ ཉིན་བལ་ཡུལ་འཇོ་ལ་ཁེལ་བསམ་གྲུབ་གླིང་བཟོ་གཞིས་ལས་ཁུངས་ཀྱི་ས་གནས་འགོ་འཛིན་གསར་རྙིང་བར་གྱི་རྩིས་སྤྲོད་རྩིས་ལེན་ལེགས་པར་གྲུབ་ཡོད་པ་རེད།

དེ་ཡང་འཇོ་ལ་ཁེལ་བསམ་གྲུབ་གླིང་བཟོ་གཞིས་ལས་ཁུངས་ཀྱི་གཞིས་འགོ་བློ་གྲོས་བཟང་པོ་ལགས་དང་ཚབ་གསར་གཞིས་འགོ་ཚེ་རིང་སྒྲོལ་མ་ལགས་བར་གྱི་རྩིས་སྤྲོད་རྩིས་ལེན་ཕྱི་ལོ་ ༢༠༢༤ ཟླ་ ༡ ཚེས་ ༡༨ རེས་གཟའ་ཕུར་བུ་ཉིན་འགོ་འཛུགས་ཞུས་ཏེ། སྔ་དྲོ་ཚོུད་ ༩།༣༠ ཙམ་ལ་བཟོ་གཞིས་ལས་ཁུངས་སུ་ས་གནས་འཐུས་ཚོགས་ཀྱི་ཚོགས་གཙོ་དང་། ས་གནས་རང་བདེན་ཚོགས་ཆུང་གི་ཚོགས་གཙོ། བཟོ་གྲྭའི་འགན་འཛིན་ལྷན་ཚོགས་ཀྱི་ཚོགས་གཙོ་བཅས་འདུ་འཛོམས་ཐོག་རྩིས་སྤྲོད་ལེན་གྱི་ལས་རིམ་གསལ་བཤད་གནང་རྗེས་ས་གནས་འགོ་འཛིན་གསར་རྙིང་གཉིས་དབར་རྩིས་སྤྲོད་རྩིས་ལེན་གྱི་ལས་དོན་རྣམས་དངོས་སུ་འགོ་འཛུགས་ཡོད་པ་དང་། སྐབས་དེར་ས་གནས་འགོ་འཛིན་གྱི་བདག་ཉར་འོག་ཡོད་པའི་གལ་ཆེའི་ཡིག་སྣོད་ཁག་དང་ལས་ཁུངས་ཀྱི་ཅ་དངོས་རིགས་རེ་རེ་བཞིན་རྩིས་སྤྲོད་གནང་ཡོད།

ཉིན་རྒྱབ་རྒྱ་དཔོན་རྣམས་ཀྱི་འགན་འཁུར་འོག་ཡོད་པའི་གཞིས་དགོན་ནང་གི་ལྷ་སྐུ་རྟེན་གསུམ་དང་། ཆོས་རྫས་རིགས་དང་གཞན་ཅ་དངོས་རྣམས་རེ་རེ་བཞིན་གཟིགས་ཞིབ་དང་། ཕྱི་ཚེས་ ༡༩ ཉིན་བཟོ་གཞིས་གཉིས་ཀྱི་ལས་ཁུངས་དང་ཚན་པ་སོ་སོའི་ཁྱབ་ཁོངས་ལས་བྱེད་རྣམས་ཀྱི་བདག་གཉེར་འོག་ཡོད་པའི་ཡིག་སྣོད་དང་འཛིན་ཆས་རྣམས་རྩོས་སྤྲོད་ལེན་གནང་། དེ་བཞིན་གཞིས་ཆགས་ཀྱི་སྡོད་ཁང་དང་། སློབ་གྲྭ རྒས་གསོ་ཁང་། ལས་བྱེད་ཀྱི་ལས་ཤག འཕྲོད་བསྟེན་སྨན་ཁང་། བུ་བཅོལ་ཁང་། བཟོ་གྲྭའི་ཁང་ཁུངས་སོགས་ལ་ས་འགོ་གསར་པ་ནས་གཟིགས་ཞིབ་གནང་ཡོད། རྩིས་སྤྲོད་ལེན་གྱི་ཉིན་མཐའ་མའམ་ཚེས་ ༢༡ རེས་གཟའ་ཉི་མ་ཉིན་སྔ་དྲོ་ཚོུད་ ༩།༣༠ ཐོག་ས་འཐུས་ཚོགས་གཙོ་དང་ཚོགས་མི་རྣམ་པ། ས་གནས་རང་བདེན་ཚོགས་ཆུང་གི་ཚོགས་གཙོ། བཟོ་གྲྭའི་འགན་ལྷན་གྱི་ཚོགས་གཙོ། མཉམ་འབྲེལ་འགན་འཛིན། སློབ་གྲྭའི་དགེ་ཆེ། རྒྱ་དཔོན་དང་ལས་བྱེད་རྣམ་པ་ཚང་འཛོམས་ཐོག་བཟོ་གཞིས་ལས་ཁུངས་སུ་ས་གནས་འགོ་འཛིན་གསར་རྙིང་གཉིས་དབར་ཞབས་སྟེགས་བརྗེ་ལེན་དང་། དེའི་རྗེས་བཟོ་གྲྭའི་ཚོགས་ཁང་དུ་མང་ཚོགས་ལ་ནང་སྲིད་ལས་ཁུངས་ཀྱི་སྐུ་ཚབ་སྤྲོད་དཔང་ཀརྨ་རྒྱལ་མཚན་ལགས་ནས་རྩིས་སྤྲོད་ལེན་སྐབས་ཀྱི་ལས་རིམ་དང་གཟིགས་ཚུལ་སྐོར་གསལ་བཤད་དང་ས་གནས་འགོ་འཛིན་གསར་རྙིང་གཉིས་ནས་འཚམས་འདྲིའི་གསུང་བཤད་གནང་ཡོད། དེ་བཞིན་ས་གནས་འཐུས་ཚོགས་ཀྱི་ཚོགས་གཙོ་དང་འགན་ལྷན་ཚོགས་གཙོ་བཅས་ནས་ཐུགས་རྗེ་ཆེའི་གསུང་བཤད་གནང་རྗེས་དགོང་དྲོའི་གསོལ་ཚིག་སྟབས་བདེ་ཞིག་བཤམས་ཡོད་པ་བཅས།།