དེ་ཡང་ས་གནས་འགོ་འཛིན་ཚེ་དབང་དབྱངས་མཚོ་ལགས་ཀྱིས་གཞིས་ཆགས་ཀྱི་ངོ་ཚབ་ཞུས་ཏེ་ཁོང་ལ་མངའ་སྡེའི་འོས་བསྡུ་ཆེན་མོའི་རྒྱལ་ཁ་ཐོབ་པར་འཚམས་འདྲི་དང་། སྟོན་པ་ཐུབ་པའི་དབང་པོའི་སྐུ་ཐང་ཕྱག་བྲིས་མ་ཞིག་འཚམས་འདྲིའི་དྲན་རྟེན་གྱི་ཚུལ་དུ་ཕུལ་ཡོད།  སྐབས་དེར་གཞིས་ཆགས་ཀྱི་ས་ཆའི་དཀའ་རྙོག་སྐོར་དང་། བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ དགོངས་དོན་ལྟར། ས་གནས་སུ་དངོས་སུ་ལག་བསྟར་བྱེད་ཕྱོགས་སྐོར་སྙན་སེང་ཞུས་ཡོད། དེ་བཞིན་བོད་མིའི་སྒྲིག་འཛུགས་ཀྱི་དགོངས་དོན་ལྟར་རྒྱུན་གནས་ཐུབ་པའི་དཔལ་འབྱོར་གོ་སྐབས་གསར་བསྐྲུན་ཆེད་བོད་མི་གཞིས་སྒར་ཁག་ཏུ་ཡུལ་སྐོར་སྤྲོ་འཆམ་གྱི་ས་ཚིགས་ཆགས་ཐབས་སུ་མན་སྤར་ས་གནས་མཉམ་འབྲེལ་གྱི་གཟིགས་སྐྱོང་འོག་ད་ལྟ་ལས་གཞི་རྒྱུན་སྐྱོང་བཞིན་པ།   མགྲོན་ཁང་དང་ཟ་ཁང་། ཚོང་ཁང་གསར་རྒྱག་གི་ལས་གཞིར་མ་འོངས་པར་རྒྱ་གར་ཡུལ་མི་སོགས་ནས་འགོག་རྐྱེན་བར་ཆད་མི་ཡོང་ཕྱིར་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་ ( Brij Mohan Agarwal)  ལགས་ལ་སྔོན་ཚུད་ནས་སྙན་སེང་དང་སྦྲགས་རོགས་རམ་སྐྱབས་འཇུག་ཞུས་ཡོད།ཕྱི་ཚེས་ ༥ ཉིན་ཅཱ་ཏིས་གཱར་མངའ་སྡེ་རྒྱལ་ས་རཱེའི་པུར་ ( Raipur) དུ་རྟེན་གཞི་བྱས་པའི་ཅཱ་ཏིས་གཱར་མངའ་སྡེའི་སྤྱི་ཁྱབ་དྲུང་ཆེ་ཨཱ་མི་ཏཱབ་ཇཱེན་ (Amitabh Jain) ལགས་དང་། ཅཱ་ཏིས་གཱར་མངའ་སྡེའི་ཁྲལ་བསྡུ་ལས་ཁུངས་ཀྱི་དྲུང་ཆེ་བྷུ་ནིཤེ་ཡཱ་དྷབ་  (Bhuvnesh Yadav) ལགས་རྣམ་གཉིས་ས་གནས་འགོ་འཛིན་ཚེ་དབང་དབྱངས་མཚོ་ལགས་དང་། ས་འཐུས་ཚོགས་གཙོ་པདྨ་མཐར་ཕྱིན་ལགས། མཉམ་འབྲེལ་དྲུང་ཆེ་བསྟན་འཛིན་དཔལ་འབྱོར་ལགས་བཅས་དང་མཇལ་འཕྲད་གནང་སྟེ་ས་གནས་ཀྱི་ས་ཆའི་དཀའ་རྙོག་སྐོར་གླེང་མོལ་ཞུས་པ་དང་། དེ་བཞིན་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ དགོངས་དོན་ལྟར། ས་གནས་སུ་དངོས་སུ་ལག་བསྟར་བྱེད་ཕྱོགས་སྐོར་སྙན་སེང་ཞུས་ཡོད།

གཞན་ཡང་ཕྱི་ལོ་  ༢༠༢༤ ཟླ་ ༡ ཚེས་ ༤ ཉིན་ཅཱ་ཏིས་གཱར་མངའ་སྡེའི་གྲོས་ཚོགས་འཐུས་མི་གསར་པ་རཱམ་ཀུ་མཱར་ཏོབ་པོ་ (Ram kumar Toppo) ལགས་ས་གནས་སུ་འཚམས་གཟིགས་ཕེབས་པར་ས་གནས་ལས་ཁུངས་དང་གཞིས་མི་རྣམས་ནས་ཕེབས་བསུ་ཟབ་རྒྱས་ཞུས་ཡོད། དེ་བཞིན་ཁོང་གིས་བོད་མི་རྣམས་དང་མཇལ་འཕྲད་གནང་སྟེ་གཞིས་ཆགས་ལ་གང་ཐུབ་ཅི་ཐུབ་ཀྱིས་རོགས་རམ་གནང་རྒྱུའི་གསུང་བཤད་བཀའ་དྲིན་སྩལ་བ་དང་སྦྲགས། ས་གནས་འགོ་འཛིན་གྱིས་འདི་གཞིས་ཀྱི་བདེ་སྡུག་སོགས་སྙན་སེང་ཞུས་ཡོད།།