༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། རྡ་རམ་ས་ལར་ཡོད་པའི་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་འབུམ་རམས་པ་དགེ་བཤེས་བློ་བཟང་སྨོན་ལམ་ལགས་ཞིབ་འཇུག་ཁང་གི་ལས་དོན་ཆེད་ཨ་རིའི་ས་ཁུལ་ཁ་ཤས་ལ་སྐོར་བསྐྱོད་དུ་ཕེབས་རྒྱུ་ཡིན་པའི་སྐོར་སྤྱི་ཁྱབ་འབྲེལ་མཐུད་པ་བསྟན་འཛིན་ནོར་བཟང་ལགས་ནས་བྱང་ཨ་རི་སྐུ་ཚབ་དོན་གཅོད་ལས་ཁུངས་ལ་འབྲེལ་བ་གནང་།

སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་ལས་དོན་ནི།  དེང་རབས་ཀྱི་རྗེས་སྙེག་ཐུབ་པའི་རླབས་ཆེན་གྱི་ལས་དོན་ཞིག་ཡིན་པ་དང་།  ལྷག་པར་སྨོན་ལམ་མིས་བཟོས་རིག་ནུས་ (AI) བོད་པར་ངོ་སྤྲོད་དགོས་རྒྱུ་གལ་ཆེ་མཐོང་ནས་དགེ་བཤེས་ལགས་སྐོར་བསྐྱོད་གནང་སའི་བོད་རིགས་སྤྱི་མཐུན་ཚོགས་པ་ཁག་ལ་སྨོན་ལམ་མིས་བཟོས་རིག་ནུས་ངོ་སྤྲོད་ཀྱི་ལས་རིམ་གྲ་སྒྲིག་ཡོང་བའི་རེ་སྐུལ་ཞུས།    

དེ་ལྟར།  རྒྱལ་སའི་མངའ་ཁུལ་(CATA) དང་།  ནིའུ་ཡོག་དང་ནིའུ་འཇར་སི།  བྱང་ཀ་ལེ་ཕོ་ནི་ཡ།  མི་ནི་སོ་ཊ་བཅས་བོད་རིགས་སྤྱི་མཐུན་ཚོགས་པ་ཆེ་ཁག་བཞི་དང་།  ཧི་མ་ལ་ཡའི་དཔེ་མཛོད་ཁང་ནས་གྲ་སྒྲིག་གནང་བ་ལྟར།  དགེ་བཤེས་བློ་བཟང་སྨོན་ལམ་ལགས་ཀྱིས་གོང་གསལ་ས་གནས་ཁག་གི་མང་ཚོགས་ལ་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་ལས་དོན་སྤྱི་དང་།  ལྷག་པར་ད་ལྟ་ཤུགས་སྣོན་སྐྱོན་བཞིན་པའི་སྨོན་ལམ་མིས་བཟོས་རིག་ནུས་སྐོར་མང་ཚོགས་ལ་ངོ་སྤྲོད་གནང་བར་ཚང་མས་དོ་སྣང་ཆེན་པོ་བྱས།  དྲི་བ་སྣ་ཚོགས་སླེབས་པར་དགེ་བཤེས་ལགས་ནས་སྐབས་དུས་སོ་སོར་ལན་འདེབས་གནང་།    

དགེ་བཤེས་བློ་བཟང་སྨོན་ལམ་ལགས་ནས་ད་དུང་།  གཞུང་ཞབས་ཟུར་པ་དང་། རྩོམ་པ་པོ། དམིགས་བསལ་ཡིག་སྒྱུར་ཐད་ལ་དོ་སྣང་ཆེ་བའི་མི་སྣ་ཁག་ཅིག་ལ་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་མིས་བཟོས་རིག་ནུས་ལ་སྤྱི་ཚོགས་ཁྱོན་ཡོངས་ནས་ནུས་པ་མཉམ་སྤུངས་བྱེད་རྒྱུ་གལ་ཆེན་པོ་ཡིན་པ་དང་།   འབྱུང་འགྱུར་དེབ་གྲངས་ ༥༠༠ ཙམ་བསྒྱུར་རྒྱུའི་ལས་གཞི་ཡོད་པ་དེའི་ཐོག་བྱང་ཨ་རིའི་ཁུལ་དུ་བཞུགས་མཁན་ལོ་མང་གཞུང་ཞབས་གནང་མྱོང་བ་དང་།  སྤྱི་ཚོགས་ཐོག་ལས་ཀ་བྱས་པའི་ཉམས་མྱོང་ལྡན་པའི་བོད་མི་ཤེས་ཡོན་ཅན་ཚོས་ཕྱག་རོགས་གནང་ཐུབ་པའི་རེ་སྐུལ་ཡང་གནང་། 

ཧི་མ་ལ་ཡ་དཔེ་མཛོད་ཁང་གི་འགན་འཛིན་དང་རྒྱུན་ལས་ཀྱིས་དགེ་བཤེས་སྨོན་ལམ་ལགས་དང་ཟུར་དུ་མཇལ་ཏེ།  འབྱུང་འགྱུར་ཧི་མ་ལ་ཡ་དཔེ་མཛོད་ཁང་དང་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་དབར་མཉམ་ལས་བྱེད་ཕྱོགས་སྐོར་གོ་བསྡུར་ཡང་གནང་།  བྱང་ཨ་རི་སྐུ་ཚབ་དོན་གཅོད་འབུམ་རམས་ལ་རྣམ་རྒྱལ་ཆོས་གྲུབ་ལགས་ཀྱིས།  དོན་གཅོད་ལས་ཁུངས་ནས་རེ་སྐུལ་ཞུས་པ་བཞིན་སྤྱི་མཐུན་ཚོགས་པ་ཁག་དང་།  ཧི་མ་ལ་ཡ་དཔེ་མཛོད་ཁང་ནས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་མིས་བཟོས་རིག་ནུས་ངོ་སྤྲོད་ལས་གཞིར་ཕྱར་གྲུ་མཉམ་འདེགས་གནང་བར་ཐུགས་རྗེ་ཆེ་ཞུ་གི་ཡོད།  ཅེས་གསུངས། 

ཨ་རིའི་ནིའུ་ཡོག་གྲོང་ཁྱེར་ནང་དུ།  སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་མི་བཟོས་རིག་ནུས་ངོ་སྤྲོད་ཀྱི་མཇུག་ཏུ།  ཧི་མ་ལ་ཡའི་དཔེ་མཛོད་ཁང་གི་འགན་འཛིན་བླ་མ་ཚེ་དབང་ལགས་ནས་དགེ་བཤེས་བློ་བཟང་ལམ་སྨོན་ལམ་ལགས་ཀྱིས་དོན་སྙིང་ལྡན་པའི་ལས་གཞི་རྒྱ་ཆེར་སྤེལ་བཞིན་པར་གཟེངས་བསྟོད་ཀྱང་གནང་ཡོད་པ་བཅས་ཀྱི་གནས་ཚུལ་དུ།།