༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༢༥ ནས་ ༢༨ བར་དུ་བྱང་ཨ་རི་སྐུ་ཚབ་དོན་ཁང་དང་མི་ནི་སོ་ཊ་ཨ་རི་བོད་མིའི་སྤྱི་མཐུན་ཚོགས་པ་ཟུང་སྦྲེལ་ཐོག་ན་གཞོན་ནུས་སྟོབས་གོང་སྤེལ་དང་འགོ་ཁྲིད་ཟབ་སྦྱོང་ཞིག་གོ་སྒྲིག་གནང་ཡོད་པ་རེད།
དེ་ཡང་ཐེངས་འདིའི་འགོ་ཁྲིད་ཟབ་སྦྱོང་ཐོག་ཨ་རི་དང་ཁེ་ན་ཊའི་མངའ་སྡེ་ཉི་ཤུ་ལྷག་གི་གཞོན་སྐྱེས་གྲངས་དྲུག་བཅུ་ལྷག་མཉམ་ཞུགས་ཀྱིས་བོད་དོན་སྤྱི་དང་། ཡང་སྒོས་བོད་མིའི་སྒྲིག་འཛུགས་ཀྱི་སྲིད་བྱུས། བོད་རྒྱ་འབྲེལ་མོལ་སོགས་ཀྱི་སྐོར་གྲོས་མོལ་སྦྱང་བཤད་གནང་ཡོད། སྐབས་དེར་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པའི་ཕུགས་དམིགས་ཡིག་ཆ་དང་། བོད་རིགས་གཞོན་སྐྱེས་རྣམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་དགོངས་གཞི་ལྟར་འདབས་ཤོག་གཉིས་ལྡན་ཞིག་ཏུ་གྱུར་ཐབས་སྐོར་ལམ་སྟོན་གནང་རྗེས་ཨི་མོ་རི་གཙུག་ལག་སློབ་གཉེར་ཁང་གི་སློབ་སྟོན་པ་བསྟན་འཛིན་བསོད་ནམས་ལགས་ཀྱིས་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་སློབ་སྟོན་གནང་ཡོད།
དེ་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་སྡེ་ཚན་གྱི་འགན་འཛིན་བུ་ཆུང་ཚེ་རིང་ལགས་ཀྱིས་བོད་རིགས་གཞོན་སྐྱེས་རྣམས་ནས་བོད་མིའི་ངོ་བོ་སྲུང་སྐྱོབ་དང་། གཞིས་བཞུགས་བོད་མིའི་མངོན་འདོད་གྲུབ་ཐབས་སྐོར་གསུངས་ཤིང་། འབུམ་རམས་པ་ཟླ་བ་བློ་སྐྱིད་ཚང་དང་འབུམ་རམས་པ་ཚེ་དབང་རིག་འཛིན་ལགས་ནས་རང་ཉིད་ཀྱི་མི་ཚེའི་འགྲུལ་བཞུད་དང་། བོད་ཕྲུག་རྣམས་ནས་བོད་དོན་འཐབ་རྩོད་ཐོག་ཞབས་ཞུ་སྒྲུབ་ཐབས་ཇི་དགེའི་སྐོར། འབུམ་རམས་པ་བསྟན་འཛིན་བྱང་ཆུབ་ལགས་དང་འཇིགས་མེད་ཨུ་རྒྱན་ལགས་གཉིས་ནས་འགོ་ཁྲིད་ནུས་རྩལ་དང་སྤྱི་ཚོགས་ཞབས་ཞུའི་སྐོར་གསུང་བཤད་གནང་ཡོད།
ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ནས་མི་དང་མིའི་འབྲེལ་ལམ་བརྒྱུད་དེ་བོད་རྒྱ་འབྲེལ་མོལ་གནང་ཐབས་སྐོར་དང་། དམིགས་བསལ་རྒྱ་རིགས་སློབ་ཕྲུག་དང་མཁས་པ་མཉམ་དུ་འབྲེལ་བ་མཐུད་རྒྱུའི་གལ་གནད་སྐོར་གསུངས། དེ་བཞིན་ས་གནས་མི་ནི་སོ་ཊ་ཨ་རི་བོད་མིའི་སྤྱི་མཐུན་ཚོགས་པའི་བསྟན་འཛིན་ཀུན་སྐྱིད་ལགས་དང་། རོགས་པ་ཚོགས་པ། སོན་རྩ། དབུ་མའི་ལམ་གཞོན་སྐྱེས་ཚོགས་པ། དང་བླངས་བོད་དོན་ཞུ་གཏུག་ལས་འགུལ་ཚོགས་མི་རྣམས་ནས་མ་འོངས་མདུན་ལམ་དང་། ས་གནས་སུ་ཞུ་གཏུག་གནང་ཕྱོགས་སོགས་ཀྱི་སྐོར་བསམ་ཚུལ་བརྗེ་ལེན་གནང་།
ཕྱོགས་མཚུངས་ཨ་རིའི་བོད་མི་ཁྲིམས་དཔོན་ཚེ་རིང་ཀོར་ནལ་ལགས་ནས་རང་ཉིད་ཀྱི་མི་ཚེའི་མྱོང་བའི་སྐོར་དང་། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས་བོད་ཀྱི་སྐད་ཡིག་གི་རིན་ཐང་སྤྱི་དང་། ཡང་སྒོས་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་བོད་སྐད་ཚིག་མཛོད་དང་། ཡིག་གཟུགས། མཉེན་ཆས། མི་བཟོས་རིག་ནུས་སོགས་ཀྱི་ལས་གཞིའི་སྐོར་ངོ་སྤྲོད་གནང་། ཉིན་མཐའ་མར་ཚོགས་བཅར་བ་རྣམས་ནས་ལེགས་སྤེལ་ཉེས་འགོག་གི་བསམ་ཚུལ་བརྗེ་ལེན་གནང་ཞིང་། སྐབས་དེར་ཚོགས་བཅར་བ་ཐུན་མོང་ནས་སླད་མར་དེ་མཚུངས་ཀྱི་ཟབ་སྦྱོང་མུ་མཐུད་གོ་སྒྲིག་གནང་གལ་ཆེ་བའི་སྐོར་གསུངས་ཡོད་པ་བཅས།། 
