༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་བ་ ༡༢ ཚེས་ ༢༩ ཉིན་བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་དུ་ཕྱི་གསར་གྱི་དུས་ཚོད་སླེབས་ལ་ཉེ་བ་དང་བསྟུན། བོད་རྒྱའི་དགོང་ཚོགས་ཏེ་བོད་རྒྱའི་མི་མང་དབར་འབྲེལ་བ་ཡར་རྒྱས་དང་བོད་ཀྱི་གནས་དོན་རྒྱ་རིགས་མང་ཚོགས་ནས་ཤེས་རྟོགས་ཡོང་བའི་རེ་བ་བཟུང་ནས་མཛད་རིམ་སྟབས་བདེ་ཞིག་བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་དང་འོད་གསལ་གསར་ཁང་ (IPK Media) མཉམ་འབྲེལ་ཐོག་གོ་སྒྲིག་ཞུས་ཡོད་པ་རེད།

དགོངས་ཚོགས་སྟེང་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཞིབ་འཇུག་འགན་འཛིན་བུ་ཆུང་ཚེ་རིང་སོགས་ཕེབས་ཡོད་པ་དང་། ཨ་རིའི་རྒྱལ་སའི་མངའ་ཁུལ་དུ་བཞུགས་པའི་རྒྱ་རིགས་རྩོམ་པ་པོ་གྲགས་ཅན་སྐུ་ཞབས་སུའུ་ཞོའོ་ཁང་ལགས་དང་འོད་གསལ་གསར་ཁང་གི་འགན་འཛིན་སྐུ་མཁྱེན་མ་ཝང་རོས་ཆིན་ལགས། སྐུ་ཞབས་ཀོ་བའོ་ཧྲེང་ལགས། སྐུ་ཞབས་ཤ་ཡེ་ལཡང་ལགས་སོགས་རྒྱ་རིགས་གྲོགས་པོ་གསར་རྙིང་མང་པོ་ཞིག་ནས་མཉམ་བཞུགས་གནང་ཡོད། སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ནས་དགོང་ཚོགས་འདིའི་ཐོག་ཕེབས་པའི་སྐུ་མགྲོན་རྣམས་ལ་བྱང་ཨ་རི་སྐུ་ཚབ་དོན་གཅོད་ཁང་གི་ལས་དོན་བྱེད་ཕྱོགས་འགྲེལ་བཤད་གནང་བ་དང་། བོད་རྒྱ་གཉིས་ནི་ལོ་རྒྱུས་ཡུན་རིང་ལྡན་པའི་ཁྱིམ་མཚེས་ཡིན་ཞིང་། དམག་འཁྲུག་ཁ་ཤས་ཕུད་ལོ་རྒྱུས་ནང་དུས་ཡུན་ཕལ་མོ་ཆེར་ཞི་བདེ་མཉམ་གནས་བྱས་ཡོད་པ་དང་། ད་ལྟའི་ཆར་བོད་ནང་གི་གནས་ཚུལ་ཛ་དྲག་བྱུང་དང་འབྱུང་བཞིན་པ་ལ་རྒྱ་རིགས་ཚོས་ཤེས་རྟོགས་དགོས་གལ་ཆེ་བ། དེ་བས་རྒྱ་རིགས་གྲོགས་པོ་རྣམས་ནས་བོད་དོན་ཐད་ལ་རྩོམ་རིགས་ཐོག་ནས་དངོོོོས་ཡོད་གནས་ཚུལ་རྣམས་རྒྱ་ནག་མི་མང་ལ་རྒྱུད་སྤེལ་ཐུབ་པའི་འབོད་སྐུལ་ཞུས་ཡོད། 

རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོས་དགོང་ཚོགས་ལ་ཕེབས་པའི་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་དང་བུ་ཆུང་ལགས་རྣམ་གཉིས་ནི་ལོ་རབས་བརྒྱད་ཅུའི་ནང་བོད་ལ་ལྟ་ཞིབ་ཚོགས་ཆུང་ཕེབས་སྐབས་ཀྱི་སྐུ་ཚབ་དང་། ཕྱི་ལོ་ ༢༠༠༢ ནས་ ༢༠༡༠ བར་བོད་རྒྱ་གྲོས་མོལ་བྱུང་སྐབས་སྐུ་ཚབ་ལ་ཕེབས་མཁན་ཡིན་པ་འགྲེལ་བརྗོད་དང་། ད་ལྟའི་ཆར་གཞུང་འབྲེལ་གྱི་གྲོས་མོལ་མེད་ཀྱང་རྒྱ་རིགས་ཤེས་ཡོན་ཅན་གྱི་དབུས་པའི་རྒྱ་རིགས་མང་ཚོགས་ནས་བོད་ཀྱི་གནས་དོན་མཁྱེན་རྟོགས་དགོས་པ་གལ་ཆེན་ཡིན་སྟབས། རྒྱ་རིགས་གྲོགས་པོ་ཤེས་ཡོན་ཅན་རྣམས་ནས་མུ་མཐུད་རྒྱབ་སྐྱོར་དང་རོགས་རམ་གནང་ནས་རྒྱ་རིགས་གང་མང་གིས་བོད་ཀྱི་དངོས་ཡོད་གནས་ཚུལ་ཤེས་རྟོགས་ཐུབ་པའི་སྐུལ་མ་བྱས། དེ་བཞིན་རྒྱ་རིགས་རྩོམ་པ་པོ་གྲགས་ཅན་སྐུ་ཞབས་སུའུ་ཞོའོ་ཁང་ལགས་ནས་རྒྱ་ནག་གི་གནས་བབ་ནི་འགྱུར་བ་འགྲོ་ལ་ཉེ་བའི་དུས་སྐབས་ཞིག་ལ་སླེབས་ཡོད་པ་དང་། རྒྱ་ནག་གི་རྒྱལ་རབས་རིམ་བྱོན་གྱི་ལོ་རྒྱུས་ལ་ཕྱི་མིག་ལྟ་སྐབས་རྒྱ་རིགས་ནི་རྟགས་ཏུ་གཉའ་གནོན་འདི་ལྟ་བུའི་རང་བཞིན་ནང་ཡང་བསྐྱར་དུ་འགྱུར་བའི་བརྒྱུད་རིམ་དེ་མྱོང་བཞིན་ཡོད་པ། དེར་བརྟེན་ལོ་རྒྱུས་ཀྱི་འགྱུར་བའི་རང་བཞིན་ལྟར་རྒྱ་ནག་འགྱུར་བ་འགྲོ་བའི་དུས་ཚོད་སླེབས་ཡོད་པ་དང་། བོད་ཀྱི་མདུན་ལམ་དང་མ་འོངས་པའི་གནས་སྟངས་ཡར་རྒྱས་འགྲོ་རྒྱུ་ངེས་པ་ཡིན་པ་གསུང་གནང་སོང་།  སྐུ་མཁྱེན་མ་ཝང་རོས་ཆིན་ལགས་ནས་ཁོང་བོད་ནང་དུ་བོད་མི་མང་པོ་ལྷན་དུ་བོད་པའི་ཁོར་ཡུག་ནང་ལོ་མང་སྡོད་པའི་གོ་སྐབས་བྱུང་བ་དང་། བོད་མི་རྣམས་ནི་གཤིས་རྒྱུད་བཟང་ལ་སྙིང་སྟོབས་ཞུམ་པ་མེད་པའི་མི་རིགས་ཞིག་ཡིན་པ་ནི་ལོ་མང་བོད་མི་དང་བཤིབས་ནས་ཤེས་རྟོགས་བྱུང་བ་གསུང་གནང་བ་དང་། བོད་མི་ཚོས་ལོ་ངོ་དྲུག་བཅུ་འགལ་བའི་འཐབ་རྩོད་མུ་མཐུད་རྒྱུན་འཁྱོངས་གནང་ནས་ཧུར་བརྩོན་བྱེད་བཞིན་པ་ནི་ཚང་མས་སློབ་སྦྱོང་བྱེད་དགོས་པ་གསུང་། དེ་མཚུངས་རྒྱ་རིགས་ཁག་གཅིག་ནས་ཁོ་ཚོ་རྒྱ་ནག་ནང་ཡོད་སྐབས་བོད་ལ་བསྐྱོད་པའི་སེམས་ཚོར་དང་བོད་མིའི་བྱམས་བརྩེའི་རང་བཞིན་ནི་གཞན་དང་མི་འདྲ་བ་ཁྱད་པར་ཅན་ཞིག་ཡོད་པ་བཅས་ལ་བསྔགས་བརྗོད་གནང་སོང་། དགོང་ཚོགས་སྟེང་ཕེབས་པའི་སྐུ་མགྲོན་རྣམས་དེ་རྗེས་དགོང་བཟས་ལ་རོལ་ནས་ཕན་ཚུལ་བཀའ་མོལ་ལྷུག་པོ་དང་བསམ་ཚུལ་བརྗེ་ལེན་དང་བཅས་མཛད་རིམ་རྒྱལ་ཁའི་ངང་ལེགས་གྲུབ་བྱུང་། །