༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༢༦ ཉིན་བོད་མིའི་སྒྲིག་འཛུགས་ཀྱིས་རྒྱ་གར་མང་གཙོའི་དུས་ཆེན་ཐེངས་བདུན་ཅུ་དོན་ལྔ་པ་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ ༩: ༣༠ བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་སྲི་ཟློག་མཆོད་རྟེན་མདུན་ཐང་དུ་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་སྲིད་ཚབ་ལྕང་ར་ཐར་ལམ་སྒྲོལ་མ་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་དྲུང་ཆེ་ཆུང་རྣམ་པ། དྲུང་ལས་ཡན་གྱི་སྲི་ཞུའི་ལས་བྱེད་པ་བཅས་ཚང་འཛོམས་ཐོག་རྒྱ་གར་མང་གཙོའི་དུས་ཆེན་ཐེངས་ ༧༥ པ་སྲུང་བརྩི་ཞུས་ཡོད་པ་རེད།
སྐབས་དེར་དཔལ་ལྡན་སྲིད་ཚབ་ལྕང་ར་ཐར་ལམ་སྒྲོལ་མ་མཆོག་གིས་གསར་འགོད་པའི་བཅར་འདྲིར་བཀའ་ལན་གནང་སྐབས། རྒྱ་གར་མང་གཙོའི་དུས་ཆེན་ཉིན་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་རྒྱ་གར་གཞུང་དམངས་གཉིས་ལ་འཚམས་འདྲི་གནང་བ་དང་སྦྲགས། རྒྱ་གར་གཞུང་དམངས་གཉིས་ནི་བཙན་བྱོལ་བོད་མིར་ཧ་ཅང་བཀའ་དྲིན་ཆེན་པོ་ཡིན་པས་བོད་མི་རྣམས་ནས་བཀའ་དྲིན་བསམ་ཤེས་དགོས་རྒྱུ་གལ་ཆེན་པོ་ཡིན་པ་གསུངས་ཡོད། དེ་དང་འབྲེལ་ཏེ་སྲིད་ཚབ་མཆོག་ནས་རྒྱ་གར་རང་བཙན་ཐོབ་རྗེས་རྩ་ཁྲིམས་གཏན་འབེབས་གནང་རིམ་དང་། མང་གཙོའི་སྤྱི་ཚོགས་ནང་དུ་ཆབ་འབངས་ཚང་མར་ཐོབ་ཐང་དང་ལས་འགན་འདྲ་མཉམ་ཡོད་པས། ཐོབ་ཐང་འདྲ་མཉམ་ཡོད་པ་གཞིར་བཟུང་ལས་འགན་ཡང་འདྲ་མཉམ་ཁུར་རྒྱུ་གལ་གནད་ཆེན་པོ་ཡིན་པ་གསུངས་ཡོད།
དེ་བཞིན་ཁོང་མོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་བོད་མི་ཁྲི་ཕྲག་འགའ་ཤས་བཙན་བྱོལ་དུ་འབྱོར་མ་ཐག་མགོན་པོ་མཆོག་ནས་བོད་མི་རྣམས་ལ་མང་གཙོའི་ལམ་ལུགས་གསོལ་སྩལ་གྱིས་བཙན་བྱོལ་ནང་དུ་མང་གཙོའི་རང་གཞིན་ལྡན་པའི་སྒྲིག་འཛུགས་གསར་འཛུགས་གནང་བ་མ་ཟད། གོམ་པ་རིམ་སྤོས་ཀྱིས་མང་གཙོའི་ལམ་བུའི་སྟེང་ཤར་བསྐྱོད་གནང་ཡོད་པ་དྲན་གསོ་དང་སྦྲགས་བཀའ་དྲིན་རྗེས་དྲན་ཞུས་པའི་ཐོག བོད་མི་རྣམས་ནས་མགོན་པོ་གང་ཉིད་མཆོག་གིས་གསོལ་སྩལ་གནང་བའི་མང་གཙོའི་ལམ་ལུགས་ནང་ཐོབ་ཐང་ཡོད་པ་གཞིར་བཟུང་ལས་འགན་ཡང་ཁུར་ན་མང་གཙོའི་ལམ་ལུགས་ཚད་ལྡན་ཞིག་ཡོང་གི་རེད་ཅེས་སོགས་གསུངས་ཡོད་པ་བཅས།།
