༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག རྒྱ་གར་ནང་གི་ཨ་རིའི་རོགས་ཚོགས་ཀྱི་སྐུ་ཚབ་ལྕམ་བྷ་ལ་ཀ་དཱེ་(Balaka Dey)ལགས་དང་ལྕམ་ར་དཱ་ར་ནི་ཋ་ཀུ་རི་ཡ་(Radharani Thakuria)ལགས། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་དྲུང་ཆེ་ཆུང་རྣམ་པ། སྤྱི་ཚོགས་ཡར་རྒྱས་ཐེབས་རྩའི་འབྲེལ་ཡོད་ལས་བྱེད། དེ་བཞིན་འབྲེལ་ཡོད་ཚོགས་སྡེ་ཁག་གི་སྐུ་ཚབ་བཅས་ལྷན་ཞུགས་ཐོག་བོད་མིའི་སྒྲིག་འཛུགས་ཀྱི་ནུས་པ་གོང་མཐོར་གཏོང་ཕྱོགས་དང་འབྲེལ་བའི་ལས་གཞི་འབྲེལ་མཐུད་ཚོགས་ཆུང་གི་ཚོགས་འདུ་ཐེངས་ལྔ་པ་དེ་བཀའ་ཤག་ཚོགས་ཁང་དུ་བསྐོང་ཚོགས་གནང་ཡོད་པ་རེད།

དེ་ཡང་ཐེངས་འདིའི་ཚོགས་འདུའི་ཐོག་ལས་གཞི་འཆར་འགོད་དང་། ལས་འཆར་ཡར་རྒྱས། མཉམ་འབྲེལ་ལས་དོན་སྤེལ་ཕྱོགས་སྐོར་བགྲོ་གླེང་ཞིབ་ལྷུག་གནང་སྟེ་བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་སྤྱི་ཡོངས་ཀྱི་དབུ་ཁྲིད་ནུས་རྩལ་དང་། ལས་གཞི་འཆར་འགོད་གོང་སྤེལ་གཏང་རྒྱུའི་དམིགས་ཚད་བཟུང་ཡོད།

གོང་ཚེས་ཉིན་གྱི་ཉིན་རྒྱབ་ལ་སྤྱི་ཚོགས་ཡར་རྒྱས་ཐེབས་རྩའི་གོ་སྒྲིག་འོག་བོད་མིའི་སྒྲིག་འཛུགས་དང་མཉམ་འབྲེལ་གནང་མཁན་སྒྲིག་འཛུགས་ཕན་ཚུན་དབར་བོད་མིའི་སྒྲིག་འཛུགས་ཀྱི་བརྡ་འཕྲུལ་ལས་གཞི་ཚགས་ཚུད་གོང་མཐོར་གཏོང་ཕྱོགས་སྐོར་གྲོས་མོལ་གནང་ཞིང་། གྲོས་མོལ་ནང་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་དང་། དཔལ་འབྱོར་ལས་ཁུངས་ཀྱི་དྲུང་ཆེ། ཆོས་རིག་ལས་ཁུངས་ཀྱི་དྲུང་འཕར། བོད་ཀྱི་ཐེབས་རྩ། ཨ་རིའི་རོགས་ཚོགས་(National Democratic Institute) དེ་བཞིན་(zeropoint) བོད་མིའི་སྒྲིག་འཛུགས་ཀྱི་ཀམ་པུ་ཊར་སྡེ་ཚན། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་། (Wadhwani AI) བོད་དོན་ལས་འགུལ་བསྟི་གནས་ཁང་གི་སྐུ་ཚབ་མཉམ་ཞུགས་གནང་ཡོད།

དེ་རྗེས་བཙན་བྱོལ་བོད་མིའི་གཞིས་ཆགས་ཡར་རྒྱས་གཏོང་ཕྱོགས་དང་འབྲེལ་བའི་གྲོས་མོལ་ཚོགས་འདུ་ཞིག་བསྐོང་ཚོགས་གནང་སྟེ་གཞིས་ཆགས་ཁག་ཏུ་ཚོང་ལས་ཡར་རྒྱས་གཏོང་ཕྱོགས་དང་། ཡུལ་སྐོར་སྤྲོ་འཆམ་པའི་ས་ཁུལ་དུ་སྒྱུར་ཐབས། མཉམ་འབྲེལ་ཁག་ཡར་རྒྱས་གཏོང་ཕྱོགས་སྐོར་གྲོས་བསྡུར་གནང་ཞིང་། སྐབས་དེར་ནང་སྲིད་ལས་ཁུངས་དང་། ཤེས་རིག་ལས་ཁུངས། འཕྲོད་བསྟེན་ལས་ཁུངས། བོད་ཀྱི་ཐེབས་རྩ། ཨ་རིའི་རོགས་ཚོགས་(National Democratic Institute)བཅས་ཀྱི་སྐུ་ཚབ་མཉམ་ཞུགས་གནང་ཡོད་པ་བཅས།།