༄༅། །ཕྱི་ལོ་ ༢༠༢༤ ཚེས་ ༠༡ ཚེས་ ༣ ནས་ ༤ བར་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཁྱབ་ཁོངས་ཀམ་པུ་ཊར་སྡེ་ཚན་གྱི་གོ་སྒྲིག་འོག་རྒྱ་གར་ལྷོ་ཕྱོགས་བྷེང་ལོར་གྲོང་ཁྱེར་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་བསྐོང་ཚོགས་ཞུས་པའི་བོད་མིའི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་གཉིས་པ་ལེགས་པར་མཇུག་སྒྲིལ་ཡོད་པ་རེད།

དེ་ཡང་ཐེངས་འདིའི་ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཆེད་ཕེབས་ཀྱིས་བོད་ཕྲུག་བརྡ་འཕྲིན་འཕྲུལ་ལས་སློབ་གཉེར་གནང་བཞིན་པ་དང་སློབ་མཐར་སོན་པ་རྣམས་དང་མཇལ་འཕྲད་ཀྱིས་བོད་མི་བརྡ་འཕྲིན་འཕྲུལ་ལས་ཆེད་ལས་པའི་གལ་གནད་དང་། དེང་སྐབས་འཕྲུལ་རིག་ཡར་རྒྱས་ཚད་མཐོ་འགྲོ་བཞིན་པའི་སྐབས་སུ་གོ་སྐབས་དམ་འཛིན་གྱིས་མདུན་སྐྱོད་གནང་དགོས་པའི་འབོད་སྐུལ་གནང་བ་མ་ཟད། བོད་མིའི་སྒྲིག་འཛུགས་ངོས་ནས་གྲངས་ཐོ་ཇི་ཡོད་གློག་འཕྲུལ་ངོ་བོར་འབེབས་བཞིན་པའི་ལས་འཆར་ངོ་སྤྲོད་གནང་ཡོད་པ་རེད། གཞན་ཡང་ཚོགས་འདུའི་ཐོག་ཨ་རིའི་རོགས་ཚོགས་ཀྱི་ར་ད་ར་ནི་ཋ་ཀུ་རི་(Radharani Thakuria)ལགས་ནས་བཙན་བྱོལ་བོད་མི་རྣམས་ནི་འཛམ་གླིང་ནང་གི་སྐྱབས་བཅོལ་བ་ཚགས་ཚུད་ཤོས་ཡིན་པ་དང་། སྐྱབས་བཅོལ་བོད་མིའི་བདེ་དོན་ལ་དོ་ཁུར་རྒྱབ་སྐྱོར་མུ་མཐུད་གནང་རྒྱུའི་ཞལ་བཞེས་གནང་ཡོད།

རྒྱ་གར་ལྷོ་ཕྱོགས་སུ་གོ་སྒྲིག་ཞུས་པའི་བོད་མིའི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུའི་དམིགས་ཡུལ་གཙོ་བོ་ནི་བོད་ཕྲུག་བརྡ་འཕྲིན་འཕྲུལ་ལས་སློབ་མཐར་སོན་པ་རྣམས་ཀྱི་ནུས་པ་སྐྱེད་སྲིང་དང་། བོད་མིའི་སྒྲིག་འཛུགས་དང་འབྲེལ་མཐུད་ཀྱིས་མཉམ་ལས་ཡོང་ཐབས། བརྡ་འཕྲིན་འཕྲུལ་ལས་ཆེད་ལས་པ་ནང་ཁུལ་འབྲེལ་ལམ་འཛུགས་རྒྱུ། དེ་བཞིན་ལས་ཀའི་གོ་སྐབས་མཁོ་སྤྲོད་གནང་ཐབས་ལ་དམིགས་ཡོད་པ་བཅས།།