༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་མངའ་སྡེ་ཁག་ནང་མངའ་སྡེ་སོ་སོའི་སྲིད་སྐྱོང་དང་། གྲོས་ཚོགས་ཀྱི་ཚོགས་གཙོ། སྤྱི་ཁྱབ་བློན་ཆེན། དབུས་དང་མངའ་སྡེའི་བློན་ཆེན་ཁག གྲོས་ཚོགས་འཐུས་མི་རྣམ་པ། བོད་དོན་རྒྱབ་སྐྱོར་ཚོགས་པ་ཁག རྒྱ་གར་མང་ཚོགས་དང་སློབ་ཕྲུག་བཅས་ལ་བོད་ཀྱི་དངོས་ཡོད་གནས་སྟངས་ངོ་སྤྲོད་དང་། བོད་དོན་ཞུ་སྐུལ་གནང་རྒྱུའི་ལས་རིམ་ཡོད་པ་ལྟར། སྤྱི་འཐུས་དགེ་བཤེས་རྔ་བ་གངས་རི་ལགས་དང་། སྤྱི་འཐུས་བསྟན་འཛིན་ཆོས་འཛིན་ལགས་རྣམ་གཉིས་ཕྱི་ལོ་ ༢༠༢༤ ཟླ་ ༡ ཚེས་ ༢༥ ནས་ཟླ་ ༢ ཚེས་ ༨ བར་རྒྱ་གར་མངའ་སྡེ་མདྱ་པྲ་དེཤ་ (Madhya Pradesh) དང་། ཆ་ཏིས་གྷར་ (Chhattisgarh) དུ་གཞུང་འབྲེལ་ཕྱོགས་ཕེབས་ཀྱི་བོད་དོན་ཞུ་སྐུལ་གནང་དང་གནང་བཞིན་པ་ལྟར། ཟླ་འདིའི་ཚེས་ ༢༧ ཉིན་ Bhopal Development Authority གྱི་ཚོགས་གཞོན་སྐུ་ཞབས་ Sunil Pandey མཆོག་ལ་འཚམས་འདྲི་དང་ལྷན་དུ། བོད་དོན་ཞུ་སྐུལ་གྱི་གནད་དོན་སྐོར་དང་། ད་ལྟའི་གནས་བབ་སོགས་ཀྱི་སྐོར་གླེང་མོལ་གནང་ཡོད་འདུག དེ་རྗེས་མདྱ་པྲ་དེཤ་མངའ་སྡེའི་བློན་ཆེན་ལྕམས་སྐུ་ Krishna Gaur མཆོག་མཇལ་འཕྲད་གནང་ནས་འཚམས་འདྲི་དང་། ཁོང་རྣམ་འདིར་ཕེབས་དགོས་དམིགས་སྐོར་གསུངས་ཡོད་འདུག

དེ་ནས་ས་གནས་དབུ་ཁྲིད་ (Counselor/Pradhan for Ward no 2) འཐུས་མི་ལྕམ་སྐུ་ Kusum Chaturvedi མཆོག་ནས་འཚམས་འདྲི་དང་ཉིན་གུང་གསོལ་ཚིགས་ཀྱི་སྣེ་ལེན་ཞུས། དེ་བཞིན་བྷོ་པལ་གྲོང་ཁྱེར་ནང་གི་ནང་པའི་ཆོས་ཚོགས་ཀྱི་སྐུ་ཚབ་རྣམས་སྤྱི་འཐུས་གཉིས་སར་ཕེབས་ནས་བོད་མི་ཡོངས་ཀྱི་ལས་འགུལ་ལ་རྒྱབ་སྐྱོར་ཇི་ལྟར་བྱེད་ཐུབ་མིན་སྐོར་བཀའ་མོལ་ཞུས་པ་དང་ཆབས་ཅིག་ཁོང་ཚོ་བོད་པའི་ནང་པའི་དགོན་པར་ Bodh Vihar རུ་གདན་ཞུའི་མགྲོན་བརྡ་ཡང་གནང་འདུག་པ་བཅས།།