༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ནས་རྒྱ་གར་མངའ་སྡེ་འདྲ་མིན་ནང་བོད་དོན་ཞུ་སྐུལ་གྱི་ལས་རིམ་ཡོད་པ་ལྟར། ཕྱི་ལོ་ ༢༠༢༤ ཟླ་ ༡ ཚེས་ ༡༥ ནས་ ༣༡ བར་བོད་མི་མང་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་དང་། སྤྱི་འཐུས་ཙ་ནེ་ཚང་དོན་འགྲུབ་བཀྲ་ཤིས་ལགས། སྤྱི་འཐུས་ཀརྨ་དགེ་ལེགས་ལགས། སྤྱི་འཐུས་ཚེ་རིང་དབྱངས་ཅན་ལགས་བཅས་ལས་གྲུབ་པའི་ཚོགས་ཆུང་ཞིག་རྒྱ་གར་མངའ་སྡེ་མ་ཧྰ་ར་ཤི་ཊྲ་ (Maharashtra) དང་། གྷོ་ཝ་ (Goa) ཏེ་ལང་གྷ་ན་ (Telangana) བཅས་སུ་མངའ་སྡེ་སོ་སོའི་སྲིད་སྐྱོང་དང་། གྲོས་ཚོགས་ཀྱི་ཚོགས་གཙོ། སྤྱི་ཁྱབ་བློན་ཆེན། དབུས་དང་མངའ་སྡེའི་བློན་ཆེན་ཁག གྲོས་ཚོགས་འཐུས་མི་རྣམ་པ། བོད་དོན་རྒྱབ་སྐྱོར་ཚོགས་པ་ཁག རྒྱ་གར་མང་ཚོགས་བཅས་ལ་བོད་ཀྱི་གནས་སྟངས་ངོ་སྤྲོད་དང་། བོད་དོན་ཞུ་སྐུལ་ཆེད་ཕེབས་གཏན་འཁེལ་ཡོད། 

དེ་ཡང་ཕྱི་ཟླ་ ༡ ཚེས་ ༡༥ ཉིན་སྤྱི་འཐུས་རྣམ་པ་སོ་སོའི་བཞུགས་གནས་ནས་ཕེབས་ཐོན་གནང་སྟེ། ཕྱི་ཟླ་ ༡ ཚེས་ ༡༥ ནས་ ༢༠ བར་རྒྱ་གར་མངའ་སྡེ་མ་ཧྰ་ར་ཤི་ཊྲ་ (Maharashtra) རུ་མཛད་རིམ་བསྐྱང་གནང་རྒྱུ་དང་། དེ་རྗེས་རྒྱ་གར་མངའ་སྡེ་ཏེ་ལང་གྷ་ན་ (Telangana) ས་གནས་སུ་ཕེབས་ཐོན་གནང་སྟེ། ཕྱི་ཟླ་ ༡ ཚེས་ ༢༢ ནས་ ༢༥ བར་མཛད་རིམ་བསྐྱང་གནང་རྒྱུ། ཕྱི་ཟླ་ ༡ ཚེས་ ༢༦ ཉིན་རྒྱ་གར་མངའ་སྡེ་གྷོ་ཝ་ (Goa) རུ་མུ་མཐུད་མཛད་རིམ་བསྐྱང་གནང་རྒྱུ་ཡིན་པ་བཅས། །