༄༅། །ཕྱི་ལོ་ ༢༠༢༤ ཟླ་ ༡ ཚེས་ ༢༦ ནས་ ༢༩ བར་བཞུགས་སྒར་དྷ་རམ་ས་ལའི་ལེ་མོན་ཏྲི་གསོལ་ཚིགས་ཁང་དུ་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་དོན་ཞུ་གཏུག་ཚན་པའི་གོ་སྒྲིག་འོག་རྒྱ་གར་བྱང་ཕྱོགས་ཁུལ་གྱི་དང་བླངས་བོད་དོན་ཞུ་གཏུག་ལས་འགུལ་ཚོགས་མིའི་ནུས་པ་གོང་མཐོར་གཏོང་ཆེད་བོད་དོན་ཞུ་གཏུགས་སྦྱོང་བརྡར་དང་གཞོན་སྐྱེས་རྣམས་ཀྱི་ནུས་པ་གོང་མཐོར་ཞེས་པའི་ཚོགས་འདུ་ཞིག་བསྐོང་ཚོགས་གནང་ཡོད་པ་རེད།
དེ་ཡང་ཉིན་གཉིས་པའི་སྔ་དྲོར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་སྐུ་མགྲོན་གཙོ་བོར་ཕེབས་ཏེ་གསུང་བཤད་གནང་དོན། བོད་ཀྱི་མི་རབས་རྒན་པ་རྣམས་རིམ་བཞིན་བཙན་བྱོལ་དུ་ཉུང་དུ་འགྲོ་བཞིན་ཡོད་སྟབས། བོད་མིའི་རང་དབང་ལས་འགུལ་གྱི་འགན་དེ་མི་རབས་གཞོན་པས་འཁུར་དགོས་རྒྱུ་གལ་ཆེན་པོ་ཡིན་ཞེས་ནན་བརྗོད་གནང་བ་དང་སྦྲགས། ཚོགས་བཅར་བ་རྣམས་ནས་བོད་དོན་ཞུ་གཏུགས་གྲུབ་འབྲས་སོན་པ་ཡོང་སླད་བོད་ཀྱི་ལོ་རྒྱུས་དང་། ད་ལྟའི་བོད་ཀྱི་སྲིད་ཕྱོགས་ཀྱི་གནས་བབ། དེ་བཞིན་བོད་ནང་གི་བོད་མི་དང་ཕྱི་རྒྱལ་དུ་ཡོད་པའི་བོད་མིའི་གནས་སྟངས་སོགས་རྒྱུས་ལོན་དགོས་པའི་ལམ་སྟོན་གནང་ཡོད། 
དེ་མཚུངས་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ཀྱིས་རྒྱ་ནག་གིས་གོ་རིམ་ལྡན་པའི་སྒོ་ནས་བོད་ནང་གི་བོད་མིའི་ཐོབ་ཐང་རྡོག་རོལ་དང་། བོད་མིའི་ངོ་བོ་རྒྱ་ནག་ཅན་དུ་བཙན་སྒྱུར་གཏོང་བཞིན་པའི་སྐབས་བོད་མིའི་ངོ་བོ་བརླག་ཉེན་ཡོད་པར་བརྟེན། གཞོན་སྐྱེས་རྣམས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མིའི་སྤྱི་ཚོགས་འཛུགས་སྐྲུན་དང་དར་སྤེལ་དང་། བོད་ཀྱི་རང་དབང་ལས་འགུལ་མདུན་སྐྱོད་བསྐྱངས་པའི་བཀའ་དྲིན་ཆེ་བའི་མཛད་རྗེས་རྣམས་ནམ་ཡང་བརྗེད་མི་རུང་ཞེས་ནན་བརྗོད་གནང་ཡོད།
དེ་རྗེས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་གྲུབ་ལགས་དང་། བོད་གནས་ལྟ་ཞིབ་ཁང་གི་ཞིབ་འཇུག་པ་དབང་ལྡན་སྐྱབས་ལགས། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་གཞོན་པ་ཚེ་རིང་སྒྲོལ་མ་ལགས། རྒྱ་གར་རྒྱལ་ཡོངས་བོད་རང་བཙན་སློབ་ཕྲུག་ཚོགས་པའི་འགན་འཛིན་བསྟན་འཛིན་པ་སངས་ལགས་བཅས་གཞུང་འབྲེལ་མ་ཡིན་པའི་ཚོགས་པའི་འགན་འཛིན་དང་ཚོགས་གཙོ་རྣམས་མཉམ་ཞུགས་གནང་བའི་ཐོག་བགྲོ་གླེང་ཞིག་ཚོགས་ཡོད་པ་བཅས།། 
