༄༅། །འདི་གར་ཨོ་གླིང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨོསྟྲེ་ལི་ཡཱའི་ས་གནས་མདོ་ཁམས་ཆུ་བཞི་སྒང་དྲུག་གིས་གོ་སྒྲིག་འོག་ཕྱི་ལོ་ ༢༠༢༣ ཟླ་ ༡༢ ཚེས་ ༢༩ དང་ ༣༠ ཉིན་གྲངས་གཉིས་རིང་གྲོང་ཁྱེར་སིཌ་ནི་ལ་བོད་ཀྱི་རིག་གཞུང་དུས་སྟོན་ཞིག་སྲུང་བརྩི་གནང་ཡོད་པ་དེའི་ཉིན་དང་པོའི་མཛད་སྒོའི་ཐོག་སྐུ་མགྲོན་གཙོ་བོར་སྐུ་ཚབ་དོན་གཅོད་ཀརྨ་སེངྒེ་ལགས་གདན་ཞུ་གནང་དོན་ལྟར་ཆེད་ཕེབས་གནང་ཡོད།
སྐབས་དེར་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་བོད་ཀྱི་ཆབ་སྲིད་དང་མི་རིགས་ཀྱི་གནས་སྟངས་ཛ་དྲག་གཉན་འཕྲང་གི་དུས་བབ་འདི་འདྲའི་སྐབས་སུ་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་འོག་ཤར་བསྐྱོད་དང་བོད་མི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་དགོས་པ། བོད་ཀྱི་བདེན་མཐའ་མ་གསལ་བར་བོད་མིའི་འཐབ་རྩོད་ཀྱི་ངོ་བོ་རྒྱུན་བསྲིངས་གནས་ཐུབ་པའི་བཙན་བྱོལ་བོད་མིའི་སྒྲིག་འཛུགས་སྲ་བརྟན་འཐུས་ཚང་ཡོང་བར་ཚང་མས་ཕྱར་གྲུ་མཉམ་འདེགས་དགོས་པ། དེ་བཞིན་ད་ཆ་བོད་ཕྱི་ནང་གཉིས་ཀྱི་མི་རབས་རྒན་པ་རྣམས་རིམ་གྱིས་རྫོགས་བཞིན་ཡོད་སྟབས་། ༸གོང་ས་མཆོག་གིས་རེ་བ་བཟང་ས་དང་། གྲ་སྒྲིག་སྡུག་ས་ནས་བྱེད་དགོས་པའི་ལམ་སྟོན་དེ་བཞིན་སྙིང་ལ་བཅངས་ནས་བོད་པའི་མི་རབས་གསར་པ་ཚོས་བོད་སྤྱི་བའི་རྩ་དོན་ཐོག་འགན་ཁུར་ཆེ་བཞེས་གནང་རྒྱུའི་འོས་འགན་བབས་ཡོད་པ་བཅས་ལམ་སྟོན་གནང་ཡོད། གཞན་ཡང་ཆེད་བསྟོད་སྐུ་མགྲོན་ས་སྐྱ་ཐེག་པ་གླིང་ཆོས་ཚོགས་ཀྱི་འགན་འཛིན་སྤྲུལ་སྐུ་གདུང་རྒྱུད་རིན་པོ་ཆེ་མཆོག་དང་། དམིགས་བསལ་སྐུ་མགྲོན་སིཌ་ནི་བོད་རིགས་མཐུན་ཚོགས་ཀྱི་ཚོགས་གཙོ་རྔ་པ་ཆོས་འཛིན་ལགས་ནས་ཀྱང་མང་ཚོགས་ལ་ལམ་སྟོན་གསུང་བཤད་གནང་ཡོད།
ད་ཐེངས་ཀྱི་རིག་གཞུང་དུས་སྟོན་དེའི་ཐོག་བོད་ཀྱི་རིག་གཞུང་གཞས་སྣ་གཟིགས་འབུལ་དང་། བོད་ཀྱི་ས་ཁུལ་སོ་སོའི་ཐུན་མོངས་མ་ཡིན་པའི་གྱོན་གོས་གཟིགས་འབུལ་གོམ་བགྲོད་སོགས་གོ་སྒྲིག་གནང་ཡོད་པ་རེད། །
