༄༅། །ཕྱི་ལོ་ ༢༠༢༤ ཟླ་ ༡ ཚེས་ ༢༨ ཉིན་བེལ་ཇི་ཡམ་གྱི་གྲོང་ཁྱེར་ལུ་ཝན་དུ་བེལ་ཇི་ཡམ་མདོ་སྨད་ཚོགས་པའི་ངོས་ནས་ལོ་གསར་སྔ་སྣུར་གྱི་མཛད་སྒོ་ཞིག་གོ་སྒྲིག་ཞུས་ཡོད་པ་རེད།
དེ་ཡང་མཛད་སྒོའི་སྐུ་མགྲོན་དུ་སྟག་ལུང་མ་སྤྲུལ་རིན་པོ་ཆེ་མཆོག་དང་། བེ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས། བོད་རིགས་སྤྱི་མཐུན་ཚོགས་པ་ཁག་གི་ཚོགས་གཙོ་རྣམ་པ་བཅས་ཕེབས་བཞུགས་ཀྱི་ཐོག་མར་ས་གནས་མདོ་སྨད་ཚོགས་པའི་ཚོགས་གཙོ་ཨ་མཆོག་འཇིགས་མེད་ལགས་ཀྱིས་མི་མང་རྣམས་མཛད་སྒོར་མཉམ་ཞུགས་གནང་བར་ཐུགས་རྗེ་ཆེ་ཞུས་པ་དང་སྦྲགས། བོད་མིའི་སྒྲིག་འཛུགས་ཀྱིས་ཆབ་སྲིད་ཀྱི་ལས་འགུལ་གང་འདྲ་ཞིག་སྤེལ་ནའང་མི་མང་གིས་རྒྱབ་སྐྱོར་གནང་གལ་ཆེན་པོ་ཡིན་པའི་སྐོར་ནན་བརྗོད་གནང་ཡོད།
དེ་རྗེས་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ལོ་གསར་གྱི་འཚམས་འདྲི་ཞུས་པ་དང་འབྲེལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་ལ་བརྟེན་ནས་བོད་དོན་འཐབ་རྩོད་དེ་འཛམ་གླིང་གི་སྡིངས་ཆའི་སྟེང་ཁྱབ་འཕེལ་ཐུབ་པ་ཞིག་བྱུང་ཡོད་པའི་སྐོར་དྲན་སྐུལ་གནང་བ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་མི་བཟང་པོ་ཞིག་ཏུ་འགྱུར་ཐབས་བྱེད་དགོས་པའི་ཁར། བོད་མིའི་ངོ་བོ་རྒྱུན་འཛིན་གནང་ཐབས་ལ་འབད་བརྩོན་བྱེད་དགོས་པའི་དྲན་སྐུལ་གནང་ཡོད།
ཕྱི་ཟླ་ ༡ ཚེས་ ༢ ཉིན་བེལ་ཇི་ཡམ་གྱི་གྲོང་ཁྱེར་ཨན་ཊི་ཝར་པི་རུ་མདོ་ཁམས་ཆུ་བཞི་སྒང་དྲུག་གིས་སོ་ནམ་པའི་ལོ་གསར་གྱི་དགའ་སྟོན་ཞིག་གོ་སྒྲིག་ཞུས་ཡོད་པ་དང་། སྐབས་དེར་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་། གནད་ཡོད་མི་སྣ་ཁག་ཅིག་ཕེབས་ཞུགས་གནང་ཡོད། སྐབས་དེར་མདོ་ཁམས་ཆུ་བཞི་སྒང་དྲུག་གི་ཚོགས་གཙོ་པདྨ་རྡོ་རྗེ་ལགས་ཀྱིས་ལོ་གསར་པའི་འཚམས་འདྲི་ཞུས་པ་དང་། བོད་མི་རྣམས་མུ་མཐུད་མཐུན་སྒྲིལ་དགོས་པའི་ནན་སྐུལ་གནང་ཡོད།
དེ་རྗེས་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་ཉེ་ཆར་ཡུ་རོབ་གྲོས་ཚོགས་ཀྱིས་རྒྱ་ནག་གཞུང་གིས་འཛིན་སྐྱོང་བྱེད་པའི་མི་སེར་སྤེལ་ཡུལ་གཏན་འཇགས་སློབ་གྲྭ་རྣམས་འཕྲལ་དུ་མཚམས་འཇོག་དགོས་པའི་གྲོས་ཆོད་བཞག་པ་དེ་དྲན་གསོ་གནང་ཞིང་། བོད་མིའི་གཞོན་སྐྱེས་ཚོས་བོད་མིའི་རང་དབང་འཐབ་རྩོད་མུ་མཐུད་རྒྱུན་སྐྱོང་བྱེད་པར་འགན་འཁུར་དགོས་པའི་སྐུལ་མ་གནང་ཡོད།
མཛད་སྒོ་འདི་གཉིས་ཀྱི་སྐབས་སུ་བེལ་ཇི་ཡམ་གྱི་གྲོང་ཁྱེར་འདྲ་མིན་དུ་གནས་སྡོད་བོད་མི་རྣམས་ཚང་འཛོམས་གནང་ཡོད་པ་མ་ཟད། རིག་གཞུང་གི་གཞས་སྣ་འཁྲབ་སྟོན་དང་། སྙན་ངག་གྱེར་འདོན་སོགས་གནང་སྟེ་དུས་ཆེན་སྲུང་བརྩི་ཞུས་ཡོད་པ་བཅས།། 
