༄༅། །ཕྱི་ལོ་ ༢༠༢༤ ཟླ་ ༡ ཚེས་ ༢༡ ཉིན་བེལ་ཇི་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་དང་དྲུང་ཆེ་འཕྲིན་ལས་དབང་འདུས་ལགས་གཉིས་བེལ་ཇི་ཡམ་འཇམ་དབྱངས་བློ་འཕེལ་གཟའ་མཇུག་སློབ་གྲྭར་གཟིགས་སྐོར་དུ་ཕེབས་ཡོད་པ་རེད།
དེ་ཡང་ས་གནས་སུ་ཕེབས་འབྱོར་སྐབས་བེལ་ཇི་ཡམ་ཆོས་རིག་འཛིན་སྐྱོང་ཁང་གི་ངེས་སྟོན་པ་དང་། ཤེས་རིག་ངེས་སྟོན་པ། དེ་བཞིན་དགེ་རྒན་ཕ་མའི་ཚོགས་ཆུང་གི་ཚོགས་གཞོན་བཅས་ཀྱིས་ཕེབས་བསུ་ཞུས་པ་དང་སྦྲགས། གཟའ་མཇུག་སློབ་གྲྭའི་རྒན་བདག་གཉིས་ནས་ཕེབས་བསུའི་མཇལ་དར་ཕུལ་ཡོད།
སྐབས་དེར་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་སློབ་གྲྭའི་འཛིན་ཁང་དུ་ཕེབས་ཏེ་ལོ་ན་གསུམ་དང་ཕྱེད་ཀ་ནས་ལོ་ན་བཅོ་ལྔ་བར་གྱི་སློབ་ཕྲུག་རྣམས་དང་ཐུག་འཕྲད་གནང་ཞིང་། སློབ་ཕྲུག་རྒན་པ་རྣམས་ལ་བོད་མིའི་སྒྲིག་འཛུགས་དང་བེལ་ཇི་ཡམ་སྐུ་ཚབ་དོན་ཁང་གི་ལས་དོན་སྐོར་དང་། བོད་ནང་མི་སེར་སྤེལ་ཡུལ་གཏན་འཇགས་སློབ་གྲྭ་བརྒྱུད་བོད་ཕྲུག་རྣམས་རང་གི་ཕ་མ་དང་ཁ་བྲལ་དུ་གཏོང་གི་ཡོད་པ་སོགས་ཀྱི་སྐོར་ངོ་སྤྲོད་གནང་བ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ལྟར་བྱམས་བརྩེ་ལྡན་པའི་མི་ཞིག་ཏུ་བསྒྱུར་ཐབས་ལ་འབད་བརྩོན་བྱེད་དགོས་པའི་རེ་བསྐུལ་གནང་ཡོད་པ་རེད།
དེ་བཞིན་སློབ་གྲྭའི་འཛིན་སྐྱོང་དང་། དགེ་རྒན། དགེ་རྒན་ཕ་མའི་ཚོགས་ཆུང་གི་ཚོགས་གཞོན་དང་ལྷན་ཐུག་འཕྲད་གནང་སྟེ། བོད་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་དང་གོང་འཕེལ་གཏོང་བར་གཟའ་མཇུག་སློབ་གྲྭ་གལ་གནད་ཆེན་པོ་ཡིན་པའི་སྐོར་དང་། སློབ་གྲྭའི་དགེ་རྒན་དང་ལས་བྱེད་རྣམས་ནས་ལྷག་བསམ་གཡོ་བ་མེད་པའི་ཐོག་ནས་ཞབས་ཞུ་གནང་བར་བསྔགས་བརྗོད་གནང་བ་མ་ཟད། ཕ་མས་ཀྱང་དེ་དོན་ཧུར་བསྐྱེད་གནང་དགོས་པའི་འབོད་སྐུལ་གནང་ཡོད།
དེ་རྗེས་སློབ་གྲྭའི་འགན་འཛིན་གྱིས་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཕེབས་པར་ཐུགས་རྗེ་ཆེ་ཞུས་པ་དང་ཆབས་ཅིག་མ་འོངས་པར་སློབ་གྲྭ་གཞན་ལའང་དེ་ལྟར་ཕེབས་རྒྱུའི་རེ་སྐུལ་ཞུས་ཡོད། སྤྱིར་བེལ་ཇི་ཡམ་ཆོས་རིག་འཛིན་སྐྱོང་ཁང་གིས་བེལ་ཇི་ཡམ་གྱི་ས་གནས་མི་འདྲ་བ་དྲུག་ཏུ་གཟའ་མཇུག་སློབ་གྲྭ་བཙུགས་ཡོད་པ་དང་། སློབ་ཕྲུག་བརྒྱ་ཕྲག་ཁ་ཤས་སློབ་གྲྭ་དེ་དག་ཏུ་སློབ་སྦྱོང་བྱེད་བཞིན་ཡོད་པ་བཅས།། 
