༄༅། །ཕྱི་ལོ་ ༢༠༢༤ ཟླ་ ༡ ཚེས་ ༢༨ ཉིན་བསྟན་འཛིན་སྒང་བོད་མིའི་གཞིས་ཆགས་ཀྱི་ས་གནས་འགོ་འཛིན་རབ་བརྟན་ཚེ་རིང་ལགས་ཨ་རུ་ནཱ་ཅལ་གྲོས་ཚོགས་ཀྱི་ཚོགས་གཙོ་ཟུར་པ་སྐུ་ཞབས་བསྟན་འཛིན་ནོར་བུ་ལགས་ཀྱི་མགྲོན་འབོད་ལྟར་ཨ་རུ་ནཱ་ཅལ་ཡོག་མུ་ཛོར་གྱི་ཐུབ་བསྟན་བཤད་སྒྲུབ་དགེ་འཕེལ་གླིང་དགོན་པའི་དབུ་འབྱེད་མཛད་སྒོའི་ཐོག་ཕེབས་ཡོད་པ་རེད།

སྐབས་དེར་མཛད་སྒོའི་སྐུ་མགྲོན་གཙོ་བོར་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་ཕེབས་བཞུགས་གནང་ཡོད། གོང་ཚེས་ཉིན་གྱི་ཕྱི་དྲོར་ཀ་ལག་ཏང་གི་སྐོར་བསྐྱོད་མགྲོན་ཁང་ (Circuit House) དུ་ས་གནས་འགོ་འཛིན་རབ་བརྟན་ཚེ་རིང་ལགས་ནས་སྐུ་ཞབས་པདྨ་མཁའ་འགྲོ་མཆོག་དང་མཇལ་འཕྲད་ཀྱིས་བསྟན་འཛིན་སྒང་བོད་མིའི་གཞིས་ཆགས་ཀྱི་ད་ལྟའི་གནས་སྟངས་ངོ་སྤྲོད་ཞུས་པ་དང་འབྲེལ། གཞིས་ཆགས་ཀྱི་དཀའ་སྡུག་རྣམས་ཡིག་ཐོག་ཏུ་ཕུལ་བས། སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་དེ་བཞིན་རོགས་སྐྱོར་གནང་རྒྱུའི་ཞལ་བཞེས་གནང་ཡོད་པ་རེད།

སྤྱིར་ཐུབ་བསྟན་བཤད་སྒྲུབ་དགེ་འཕེལ་གླིང་ཞེས་པའི་དགོན་པ་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཚན་གནང་ཞིང་། བྱིན་གྱིས་བརླབས་པ་ཞིག་ཡིན་པ་བཅས།།