༄༅། །ཕྱི་ལོ་ ༢༠༢༤ ཟླ་ ༡ ཚེས་ ༨ ཉིན་བསུ་ན་མདའ་བཀྲ་ཤིས་གླིང་བོད་མིའི་གཞིས་ཆགས་སུ་རྒྱང་བཅོས་སྨན་གཏུག་ལས་གཞི་དབུ་འཛུགས་གནང་ཡོད་པ་རེད།
དེ་ཡང་གོང་ཚེས་ཉིན་རྡོར་གླིང་ས་གནས་འགོ་འཛིན་པདྨ་ལགས་ཀྱིས་ལས་གཞི་དངོས་སུ་དབུ་འཛུགས་གནང་ཡོད་པ་དང་། སྐབས་དེར་ལས་དྲུང་བཀྲ་ཤིས་ལགས་དང་སྨན་ཞབས་ཀུན་དགའ་ལགས་གཉིས་ཀྱིས་ས་གནས་བོད་མི་རྣམས་ལ་རྒྱང་བཅོས་སྨན་གཏུག་ཞབས་ཞུའི་མཐུན་རྐྱེན་དང་དེའི་ཁེ་ཕན་སོགས་ཀྱི་སྐོར་ངོ་སྤྲོད་གནང་ཡོད་པ་རེད།
བསུ་ན་མདའ་བོད་མིའི་གཞིས་ཆགས་ནི་རྒྱང་བཅོས་སྨན་གཏུག་ཞབས་ཞུ་དབུ་འཛུགས་གནང་ཡུལ་གཞིས་ཆགས་ལྔ་པ་དེ་ཆགས་ཡོད་པ་བཅས།། 
