༄༅། །ཕྱི་ལོ་ ༢༠༢༤ ཟླ་ ༡ ཚེས་ ༢༧ རེས་གཟའ་སྤེན་པའི་ཉིན་བལ་ཡུལ་སྐུ་ཚབ་དོན་ཁང་གི་ཁྱབ་ཁོངས་ཧི་མ་ལ་ཡའི་ནང་པའི་དཔེ་མཛོད་དང་ལེགས་སྦྱང་བསྟི་གནས་ཁང་དང་། བལ་ཡུལ་མཆོད་འཇོར་ས་གནས་འགོ་འཛིན་ལས་ཁུངས་ཐུན་མོང་ཐོག་རྒྱ་གར་དང་བལ་ཡུལ་ཁུལ་གྱི་བོད་མིའི་སློབ་གྲྭ་ཁག་གི་སློབ་ཕྲུག་ཕོ་མོ་རྣམས་ལ་དགུན་ཁའི་གུང་སེང་སྟབས་བསྟུན་གྱི་ཟླ་གཅིག་རིང་བོད་ཀྱི་ཐུན་མོང་མ་ཡིན་པའི་རིག་གཞུང་བོད་ཡིག་སུམ་རྟགས་དང་། གླུ་གཞས་རོལ་དབྱངས་སོགས་རིན་མེད་ཀྱི་སློབ་ཁྲིད་ལེགས་པར་གྲུབ་པའི་མཇུག་སྡོམ་མཛད་སྒོའི་ཐོག་སྐུ་མགྲོན་གཙོ་བོ་ཤྲཱི་ཆུ་བཟང་རིན་པོ་ཆེ་མཆོག་དང་། དམིགས་གསལ་སྐུ་མགྲོན་བལ་ཡུལ་སྐུ་ཚབ་དོན་གཅོད་རྩིབས་རི་ལོ་པཎ་སྤྲུལ་སྐུ་ངག་དབང་མཆོག་གྲུབ་ལགས། སྤྱི་ཟུར་འཇམ་དབྱངས་འཕྲིན་ལས་ལགས། བལ་ཡུལ་དོན་གཅོད་ཁང་གི་དྲུང་ཆེ་ཀརྨ་རྒྱལ་མཚན་ལགས། གཞན་ཡང་བལ་ཡུལ་མཆོད་འཇོར་ས་འཐུས་ཚོགས་གཙོ་སྐལ་བཟང་དོན་གྲུབ་ལགས། མཆོད་འཇོར་ས་འགོ་ཕུར་བུ་བཀྲ་ཤིས་ལགས་སོགས་པའི་བལ་ཡུལ་ཁུལ་གྱི་ས་གནས་འགོ་འཛིན་རྣམ་པ་བཞི། ས་གནས་འགོ་འཛིན་ཟུར་པ་རྣམ་པ། དེ་བཞིན་རང་བདེན་ཚོགས་གཙོ་རྣམས་དང་། གངས་ཅན་བདེ་རྩའི་འགན་འཛིན་དྲུང་ཆེ་དང་འཛིན་སྐྱོང་པ། ས་གནས་གཞུང་འབྲེལ་སྡེ་ཚན་ཁག་གི་འགན་འཛིན་དང་། ཆོལ་ཁ་གསུམ་གྱི་ཚོགས་གཙོ་གསུམ་གྱི་གཙོས་གཞུང་འབྲེལ་མིན་པའི་སྡེ་ཁག་སྤྱི་ཚོགས་ཞབས་ཞུ་བ་དང་། རོགས་ཚོགས་ཁག་གི་འགན་འཛིན། སློབ་ཕྲུག་དང་ཕ་མ་སོགས་སེར་སྐྱ་མི་མང་ལྔ་བརྒྱ་ཙམ་འདུ་འཛོམས་ཀྱིས་ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་གི་དགེ་འདུན་པ་རྣམས་ཀྱི་སྐྱབས་སེམས་ཡན་ལག་བདུན་པ་དང་བཅས་སྐུ་མགྲོན་གཙོ་བོ་དང་། དམིགས་གསལ་སྐུ་མགྲོན། སྤྱི་ཟུར་བཅས་ནས་མཎྜལ་འདེགས་འབུལ་དང་གཞན་སྐུ་མགྲོན་ཁག་ནས་རྒྱལ་བའི་ཞབས་བརྟན་འདོན་བཞིན་མཇལ་དར་ཕུལ། དེ་རྗེས་སློབ་མ་རྣམས་ནས་ཟླ་འདིར་རང་རང་སོ་སོའི་སྦྱང་བརྩོན་བྱས་པའི་གྲུབ་འབྲས་བོད་ཡིག་ལ་དགའ་བའི་རྩོམ་ཡིག་སྒྲོག་སྦྱངས་དང་། གཞན་སློབ་ཕྲུག་ཡོངས་སྡེ་ཚན་ཁག་ཏུ་ཕྱེས་ནས་རོལ་དབྱངས་དང་བཅས་གཞས་སྣ་འཁྲབ་སྟོན་ཞུས་པ་སོགས་མཐའ་སྡོམ་སློབ་ཕྲུག་གཉིས་ནས་ལྷ་མོའི་རྣམ་ཐར་གི་དབྱངས་དང་ཀི་སྭཽ་ལྷ་རྒྱལ་བཅས་མཛད་སྒོ་ལེགས་པར་གྲུབ་ཡོད་པ་བཅས།།