༄༅། །ཕྱི་ལོ་ ༢༠༢༤ ཟླ་བ་ ༡ ཚེས་ ༡༠ ནས་ ༢༠ བར་ཉིན་བཅུའི་རིང་ཕྱི་དྲིལ་བོད་ཀྱི་འགྲེམས་སྟོན་ཁང་གི་ལས་བྱེད་ཀྱི་ནུས་པ་གོང་མཐོར་ཆེད་འབྲེལ་ཡོད་ལས་བྱེད་རྣམས་རྒྱ་གར་ལྷོ་ཕྱོགས་སུ་ཤེས་རིག་སྐོར་བསྐྱོད་དུ་ཕེབས་ཡོད་པ་རེད།

སྐབས་དེར་རྒྱ་གར་གྱི་རྒྱལ་ས་ལྡི་ལི་དང་། མུམ་བྷེ། གྷོ་ཝ་གྲོང་ཁྱེར་གྱི་འགྲེམས་སྟོན་ཁང་བརྒྱད་དང་། ལོ་རྒྱུས་ཀྱི་གནས་ཆེན་གསུམ་བཅས་ལ་བལྟ་སྐོར་ལ་ཕེབས་ཡོད་ཅིང་། ཐེངས་འདིའི་ཤེས་རིག་ལྟ་སྐོར་གྱི་དགོས་དམིགས་གཙོ་བོ་ནི་བོད་ཀྱི་འགྲེམས་སྟོན་ཁང་གི་ལས་བྱེད་རྣམས་ཀྱི་འགྲེམས་སྟོན་གནང་ཕྱོགས་དང་། འཛིན་སྐྱོང་སོགས་དང་འབྲེལ་བའི་གོ་རྟོགས་དང་ནུས་པ་གོང་མཐོར་གཏོང་ཆེད་ཡིན་པ་རེད།

སྐོར་བསྐྱོད་འདིའི་རིང་མུམ་བྷེའི་( Chhatrapati Shivaji Maharaj Vastu Sangrahalaya) འགྲེམས་སྟོན་ཁང་དུ་ལས་བྱེད་རྣམས་ལ་འགྲེམས་སྟོན་ཁང་གི་ཡིག་ཚགས་སྡེ་ཚན་དང་། དྲོད་ཚད་ལ་སྟངས་འཛིན་བྱེད་སའི་ཁང་པ་སོགས་ཀྱི་གནས་བཤད་རྒྱས་པར་གནང་ཡོད་པ་མ་ཟད། འགྲེམས་སྟོན་ཁང་གི་འགན་འཛིན་དང་དོ་དམ་པ་སོ་སོས་འགྲེམས་སྟོན་ཁང་གི་ལས་དོན་གནང་ཕྱོགས་དང་། འཛིན་སྐྱོང་གནང་སྟངས། འགྲེམས་སྟོན་ཁང་ནང་ལས་དོན་གལ་ཆེ་རིགས་ཇི་ལྟར་སྒྲུབ་ཀྱི་ཡོད་མེད་བཅས་ཀྱི་སྐོར་ཞིབ་ཕྲ་འགྲེལ་བརྗོད་གནང་ཡོད་པ་བཅས།།