དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལཱཏ་ཝི་ཡཱའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་ཏེ་བོད་དོན་འཐབ་རྩོད་སྐོར་གྲོས་མོལ་གནང་བ།

གསར་ལས་ཁང་གི་གསར་འགོད་པས།

༢༠༢༤-༠༡-༣༠

རི་གྷ་གྲོང་སྡེ་སྤྱི་ཁྱབ་གཞོན་པ་ལིན་ཌ་ཨོ་ཛོ་ལ་ (Linda Ozola)ལགས་ཀྱིས་གྲོང་སྡེ་ལྷན་ཚོགས་སུ་ཕེབས་བསུ་སྣེ་ལེན།

༄༅། །ཕྱི་ལོ་ ༢༠༢༤ ཟླ་ ༡ ཚེས་ ༢༩ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ནས་ལཱཏ་ཝི་ཡཱའི་རྒྱལ་ཡོངས་རླུང་འཕྲིན་ཁང་གཙོས་པའི་བརྒྱུད་ལམ་ཁག་གཉིས་ཀྱི་བཅར་འདྲིར་དང་ལེན་དང་། ཉིན་རྒྱབ་ལཱཏ་ཝི་ཡཱའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་ཡོད།

དེ་ཡང་མཇལ་མོལ་སྐབས་དཔལ་ལྡན་སྲིད་སྐྱོང་མཆོག་གིས་ད་ལྟའི་བོད་ནང་གི་གནས་སྟངས་དང་། བོད་དང་ཡུ་ཀེ་རེན་གཉིས་ཀྱི་མཚུངས་ཆོས། བོད་ལ་རྒྱལ་སྤྱིའི་རྒྱབ་སྐྱོར། ལཱཏ་ཝི་ཡཱའི་གྲོས་ཚོགས་ཀྱིས་བོད་དོན་ལ་རྒྱབ་སྐྱོར་གནང་ཐབས་སོགས་ཀྱི་སྐོར་གྲོས་མོལ་གནང་ཡོད་པ་མ་ཟད། ཕྱི་ལོ ༢༠༢༢ ལོར་འཚོགས་པའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐོག་མཉམ་ཞུགས་གནང་མཁན་གྲོས་ཚོགས་འཐུས་མི་ཐེ་བའི་བོད་དོན་ཐོག་རྒྱབ་སྐྱོར་གནང་མཁན་རྣམས་ལ་ཐུགས་རྗེ་ཆེ་ཞུས། དེ་དང་འབྲེལ་ཏེ་གཟའ་འཁོར་སྔོན་མར་མཉམ་འབྲེལ་རྒྱལ་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་བབ་ཐོག་དུས་བཀག་བསྐྱར་ཞིབ་གནང་བའི་སྐབས་ལཱཏ་ཝི་ཡཱའི་སྲིད་གཞུང་ངོས་ནས་བོད་ནང་རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་སྐྱོན་བརྗོད་བསྒྲགས་གཏམ་མ་སྤེལ་བར་ཐུགས་ཕམ་བྱུང་ཞེས་གསུངས་ཡོད།

ཕྱི་དྲོར་དཔལ་ལྡན་སྲིད་སྐྱོང་མཆོག་གཙོས་པའི་བོད་ཀྱི་སྐུ་ཚབ་རྣམས་ལ་རི་གྷ་གྲོང་སྡེ་སྤྱི་ཁྱབ་གཞོན་པ་ལིན་ཌ་ཨོ་ཛོ་ལ་ (Linda Ozola)ལགས་ཀྱིས་གྲོང་སྡེ་ལྷན་ཚོགས་སུ་ཕེབས་བསུ་སྣེ་ལེན་ཞུས་ཤིང་། སྐབས་དེར་བོད་ཀྱི་དཔའ་བོ་ (Tibetan Warrior) ཞེས་པའི་གློག་བརྙན་ཞིག་གཟིགས་འབུལ་ཞུས་པ་དང་འབྲེལ། གཟིགས་མོ་གྲུབ་མཚམས་ཚོགས་བཅར་བ་རྣམས་ནས་དོགས་དྲི་གནང་བ་མ་ཟད། ཚོགས་བཅར་བ་མང་པོ་ཞིག་གིས་སོ་སོའི་རྒྱལ་ཁབ་ཨུ་རུ་སུ་ནས་རང་བཙན་ཐོབ་པའི་ཉམས་མྱོང་དང་འབྲེལ་ཏེ་བོད་ཀྱི་རྩ་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེ་གནང་ཡོད་པ་བཅས།།