༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༠༨ ཉིན་སཾ་བྷོ་ཊ་བོད་སློབ་ཚོགས་པའི་ཁྱབ་ཁོངས་སློབ་གྲྭ་ཁག་གི་ལོ་འཁོར་འགན་འཛིན་ཚོགས་འདུ་ཐེངས་བཅུ་དྲུག་པའི་མཇུག་སྡོམ་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཕེབས་ཞུགས་ཀྱིས་བོད་སློབ་ཁག་གི་ད་ཡོད་གནས་སྟངས་དང་མ་འོངས་ཁ་ཕྱོགས་སྒྱུར་ཕྱོགས་སོགས་ཀྱི་སྐོར་ལམ་སྟོན་གསུང་བཤད་གནང་ཡོད་པ་རེད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་གཉིས་པའི་ཐོག་སཾ་བྷོ་ཊ་བོད་སློབ་ཚོགས་པའི་གོ་སྒྲིག་འོག་བཞུགས་སྒར་མེག་གྷན་ནོར་བུ་གསོལ་མགྲོན་ཁང་དུ་འཚོག་བཞིན་པའི་སཾ་བྷོ་ཊ་བོད་སློབ་ཁག་གི་འགན་འཛིན་ཚོགས་འདུ་ཐེངས་བཅུ་དྲུག་པའི་མཇུག་སྡོམ་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། སཾ་བྷོ་ཊ་བོད་སློབ་ཚོགས་པའི་ངེས་སྟོན་པ་ཚེ་རིང་དོན་གྲུབ་ལགས་དང་ངེས་སྟོན་པ་གཞོན་པ་བསྟན་འཛིན་ངག་སྒྲོན་ལགས། སཾ་བྷོ་ཊའི་ཁྱབ་ཁོངས་བོད་སློབ་ཁག་གི་སློབ་སྤྱི་དང་དགེ་ཆེ་ལྷན་རྒྱས་ཚང་འཛོམས་ཀྱི་ཐོག་མར་སཾ་བྷོ་ཊ་བོད་སློབ་ཚོགས་པའི་ངེས་སྟོན་པ་ཚེ་རིང་དོན་གྲུབ་ལགས་ཀྱིས་འདི་ཟླའི་ཕྱི་ཚེས་ ༠༦ ནས་སཾ་བྷོ་ཊའི་ཁྱབ་ཁོངས་བོད་སློབ་ཁག་གི་འགན་འཛིན་རྣམ་པས་གྲོས་གཞི་དོན་ཚན་དྲུག་ཐོག་བགྲོ་གླེང་སྦྱངས་བཤད་ལྷུག་པོ་གནང་སྟེ་སློབ་གྲྭ་སྤྱི་ལ་སྨན་པའི་གྲོས་ཆོད་ཁག་ཅིག་གཏན་འབེབས་གནང་ཐུབ་ཡོད་པ་དང་། གཏན་འབེབས་གྲོས་ཆོད་དེ་དག་སློབ་གྲྭ་སོ་སོར་དོན་སྨིན་ལག་བསྟར་ཚགས་ཚུད་ཡོང་ཐབས་འབད་རྩོལ་ཞུ་རྒྱུ་ཡིན་པ་ངོ་སྤྲོད་གནང་ཡོད།
དེ་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སློབ་གྲྭ་ཁག་གི་སློབ་སྤྱི་དང་དགེ་ཆེ་རྣམ་པ་ནི་མི་རབས་གསར་པ་བཟོ་ལྟ་བཟོ་མཁན་སློབ་གྲྭ་ཁག་གི་འགན་འཁུར་མཁན་གཙོ་བོ་ཡིན་པས་ལས་གནས་དེ་ཉིད་གལ་གནད་ཆེན་པོ་ཡིན་པ་དང་། ད་ཡོད་སློབ་གྲྭའི་འགན་འཛིན་རྣམས་ནས་སྤྱི་ཚོགས་ཀྱི་འགྱུར་བ་སྣ་ཚོགས་ལ་གདོང་ལེན་ཞུས་ཏེ་ད་བར་བོད་ཕྲུག་རྣམས་ཀྱི་ཤེས་ཡོན་ཐོག་ཞབས་ཞུ་བསྒྲུབས་པར་ལེགས་གསོལ་བསྔགས་བརྗོད་གནང་བ་དང་སྦྲགས། འབྱུང་འགྱུར་མུ་མཐུད་བོད་བསྟན་སྲིད་མི་རིགས་ཆེད་འགན་ཁུར་ཞབས་ཞུ་སྒྲུབ་པའི་འབོད་སྐུལ་གནང་། དེ་རྗེས་བཀའ་ཤག་སྐབས་བཅུ་དྲུག་པའི་ངོས་ནས་ཤེས་ཡོན་ཐོག་དགོངས་བཞེས་གནང་སྟངས་སྔ་ལོ་བཀའ་ཤག་སྐབས་བཅུ་དྲུག་པའི་ངོས་ནས་འདོན་སྤེལ་ཞུས་པའི་བོད་ཀྱི་མ་འོངས་འགན་སྲུང་ཞེས་པའི་ཕུགས་དམིགས་ཡིག་ཆའི་ནང་གསལ་སྟོན་གནང་ཡོད་པས་དེར་ཐུགས་ཞིབ་གནང་དགོས་པའི་ལམ་སྟོན་དང་སྦྲགས། ད་ལྟའི་བཀའ་ཤག་ངོས་ནས་བཙན་བྱོལ་དུ་བོད་མིའི་གཞི་རིམ་ཤེས་ཡོན་སྲིད་བྱུས་ལག་བསྟར་གནང་ཕྱོགས་དང་། བོད་མིའི་ཤེས་ཡོན་སློབ་གསོ་རྒྱུན་འཁྱོངས་གནང་ཐབས། བཙན་བྱོལ་སྤྱི་ཚོགས་ཀྱི་དགོས་མཁོ་དང་། སློབ་སྡེ་སོ་སོའི་ལག་ལེན་བསྟར་རུང་གི་ཆ་རྐྱེན་གཞིར་བཟུང་སློབ་གྲྭ་རྣམས་རིམ་བཞིན་སློབ་ཁུལ་སོ་སོར་ཟླ་སྒྲིལ་གནང་ཕྱོགས་སོགས་ཀྱི་སྐོར་འགྲེལ་བརྗོད་གནང་།
གཞན་ཡང་དཔལ་ལྡན་སྲིད་སྐྱོང་མཆོག་གིས་བཀའ་ཤག་སྐབས་བཅུ་དྲུག་པའི་ངོས་ནས་ལས་གཞི་ལག་བསྟར་བྱེད་རྒྱུ་དང་། སྤྱི་ཚོགས་ཀྱི་གནས་སྟངས་ཆ་ཚང་བ་རྟོག་ཞིབ་བྱ་བར་གྲངས་ཐོར་གཙིགས་ཆེ་གནང་བཞིན་ཡོད་པ་ལྟར། བོད་སློབ་ཁག་གིས་ཀྱང་གྲངས་ཐོར་གལ་ཆེར་བརྩིས་ཏེ་ཚད་ལྡན་གྲངས་ཐོ་ཉར་ཚགས་དགོས་པ་མ་ཟད། གྲངས་ཐོ་ཉར་ཕྱོགས་ཀྱང་སློབ་སྡེ་ཕན་ཚུན་གཅིག་འགྱུར་ཡོང་ཐབས་ལ་འབད་རྩོལ་གནང་དགོས་པའི་ལམ་སྟོན་གནང་བའི་ཐོག ད་ལྟའི་ཆར་བཙན་བྱོལ་བོད་མིའི་སྤྱི་ཚོགས་སྤྱི་ཡོངས་དང་། བྱེ་བྲག་ཏུ་དགོན་སྡེ་དང་སློབ་གྲྭ་ཁག་ཏུ་བོད་མིའི་གྲངས་འབོར་ལོ་རེ་བཞིན་ཇེ་ཉུང་དུ་འགྲོ་བཞིན་པའི་དངོས་ཡོད་དཀའ་ངལ་ཡོད་པ་དང་། སྤྱི་ཚོགས་ཀྱི་འགྱུར་བའི་དཀའ་ངལ་དེར་ངོས་ལེན་གྱིས་དུས་བསྟུན་བསྒྱུར་བཅོས་ངེས་གཏོང་དགོས་པའི་ལམ་སྟོན་དང། ལྷག་པར་གཞིས་ཆགས་སྲ་བརྟན་ཡོང་ཐབས་སླད་འཛིན་སྐྱོང་ངོས་ཐབས་བརྒྱ་བྱུས་སྟོང་གིས་འབད་རྩོལ་གནང་གི་ཡོད་པ་འགྲེལ་བརྗོད་གནང་ཡོད། དེ་དང་འབྲེལ་ཏེ་དཔལ་ལྡན་སྲིད་སྐྱོང་མཆོག་ནས་སྤྱི་ཚོགས་སྤྱི་ཡོངས་ཚགས་ཚུད་ཡར་རྒྱས་ཡོང་བར་གཞུང་ཁོ་ན་མིན་པར་སྤྱི་ཚོགས་ནང་གི་འབྲེལ་ཡོད་ཀུན་ནས་དོ་ཁུར་དང་ཕྱར་གྲུ་མཉམ་འདེགས་གནང་རྒྱུ་གལ་ཆེན་པོ་ཡིན་པ་ནན་བརྗོད་གནང་ཡོད་པ་བཅས།
