༄༅། །ཕྱི་ལོ་ ༢༠༢༤ ཟླ་ ༡ ཚེས་ ༢༦ ཉིན་གྱི་ཞོགས་པ་རྒྱ་གར་མང་གཙོའི་དུས་ཆེན་ཐེངས་ ༧༥ པའི་གཞུང་འབྲེལ་མཛད་སྒོ་གྲུབ་རྗེས། ཆུ་ཚོད་ ༡༠།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་འཚེ་མེད་ཞི་བའི་ལམ་ལུགས་ཀྱི་ཐེབས་རྩའི་སྐུ་ཚབ་རེ་བོན་བན་ནེར་ཇི་ (Rebon Banerjee, one of the trustees of the Foundation for Non-Violent alternative (FNVA)) གཙོས་པའི་མི་སྣ་ཁག་ཅིག་དང་མཇལ་འཕྲད་གནང་ཡོད་པ་རེད། ཐོག་མར་སྐུ་མགྲོན་རྣམས་བོད་ཀྱི་འགྲེམས་སྟོན་ཁང་གི་འགན་འཛིན་སྟོབས་ལྡན་ལགས་ཀྱིས་སྣེ་ཤན་འོག་བོད་ཀྱི་འགྲེམས་སྟོན་ཁང་དུ་གཟིགས་སྐོར་གནང་རྗེས། ཁོང་རྣམ་པ་བོད་མི་མང་སྤྱི་འཐུས་ལྷན་ཁང་དུ་ཕེབས་ནས་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་བོད་ཀྱི་ལོ་རྒྱུས་དང་། ད་ལྟའི་བོད་ནང་གི་ཛ་དྲག་གནས་སྟངས། བཙན་བྱོལ་བོད་མིའི་སྤྱི་ཚོགས། བོད་ཀྱི་གྲོས་ཚོགས་འགྲོ་སྟངས་སོགས་ངོ་སྤྲོད་གནང་བ་མ་ཟད། ཁོང་རྣམ་པའི་འདྲི་བར་ལན་འདེབས་ཀྱང་གནང་ཡོད་པ་རེད། སྐབས་དེར་ཚོགས་དྲུང་ལས་ཁུངས་ཀྱི་སྤྱི་ཁྱབ་དྲུང་ཆེ་བསོད་ནམས་རྡོ་རྗེ་ལགས་དང་ཚོགས་དྲུང་ལས་ཁུངས་ཀྱི་ཟུང་དྲུང་ཚེ་རིང་ལྷ་མོ་ལགས་ཀྱང་མཉམ་བཅར་ཞུས་ཡོད་པ་བཅས།།