༄༅། །འདི་གར་ཐའི་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཐའེ་ཝན་སྐུ་ཚབ་དོན་གཅོད་ལས་ཁུངས་ཀྱི་ལམ་སྟོན་དང་། ཐའེ་ཝན་རྒྱལ་སྤྱིའི་བོད་རྒྱ་ཆོས་བརྒྱུད་ཤེས་ཡོན་སློབ་གསོ་དགེ་རྩ་ལྷན་ཚོགས་ཀྱི་གོ་སྒྲིག་འོག་༸གོང་ས་མཆོག་རྟགས་ཅན་ལག་རྩེད་སྤོ་ལོ་སྦྱོང་བརྡར་གླིང་ཁ་དབུ་འབྱེད་ཀྱི་མཛད་སྒོ་ཞིག་ཐའེ་ཝན་དབུས་ཁུལ་ལན་ཐུའུ་རྫོང་ (Nantouxian) ཀའོ་ཞིང་གཞིས་གྲོང་( Gaoxing Xiang) དུ་བསྐོང་འཚོགས་གནང་ཡོད་པ་དང་། དབུ་འབྱེད་མཛད་སྒོར་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཆེད་བཅར་གྱིས་བོད་དང་༸གོང་ས་མཆོག་གི་མཛད་པ་འཕྲིན་ལས་སྐོར་ངོ་སྤྲོད་ཀྱི་གཏམ་བཤད་གནང་ཡོད་པ་རེད།
དབུ་འབྱེད་ཀྱི་མཛད་སྒོ་དེར་ཀའོ་ཞིང་གཞིས་གྲོང་གི་གཞིས་དཔོན་(Xiang Zhang)དང་། ཀའོ་ཞིང་སློབ་འབྲིང་གི་སློབ་སྤྱི། གཞན་ཡང་ཐའེ་ཝན་རྒྱལ་སྤྱིའི་བོད་རྒྱ་ཆོས་བརྒྱུད་ཤེས་ཡོན་སློབ་གསོ་དགེ་རྩ་ལྷན་ཚོགས་ཀྱི་ཆོས་དཔོན་ཐའེ་ཝན་བཙུན་མ་བསྟན་འཛིན་བྱམས་ཆོས་ལགས། དགེ་རྩ་ལྷན་ཚོགས་ཀྱི་འགན་འཛིན་གཙོས་སྦྱིན་བདག་རྣམ་པ། ལག་རྩལ་སྤོ་ལོ་སྦྱོང་བརྡར་གླིང་ཀར་མཉམ་ཞུགས་གནང་མཁན་ལོ་ན་ ༡༢ ནས་ ༡༦ བར་སློབ་ཕྲུག་གྲངས་ ༧༠ ཙམ་མཉམ་འཛོམས་གནང་ཡོད་པ་རེད།
འདི་ལྟ་བུའི་ལག་རྩེད་སྤོ་ལོ་སྦྱོང་བརྡར་གླིང་ཀ་ཞིག་བཙུགས་དགོས་པའི་དམིགས་ཡུལ་གཙོ་བོ་ནི་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་ཆོས་ལུགས་ལ་མ་བརྟེན་པའི་ཡ་རབས་བཟང་སྤྱོད་ཀྱི་སློབ་གསོ་ཆུང་བྱིས་པ་ཚོར་སྤེལ་ཐབས་དང་རྨང་གཞིའི་འདིའི་ཐོག་ནས་མ་འོངས་པར་༸གོང་ས་མཆོག་རྟགས་ཅན་གྱི་ལག་རྩེད་སྤོ་ལོའི་འགྲན་བསྡུར་ཞིག་གོ་སྒྲིག་ཞུ་ཐུབ་ཆེད་ཡིན་པ་རེད། ལས་འགུལ་གོ་སྒྲིག་པས་༸གོང་ས་མཆོག་གི་མཚན་གནས་ཐོག་ནས་ཐའེ་སྒོར་གཉིས་འབུམ་ཐམ་པ་ལས་གཞིའི་འདིའི་ཆེད་ཞལ་འདེབས་སུ་ཕུལ་ཡོད་པ་དང་། ལག་རྩེད་སྤོ་ལོ་སྦྱོང་བརྡར་གླིང་ཀ་འདི་ཉིན་གསུམ་རིང་སྤེལ་རྒྱུ་ཡིན་འདུག་ཅིང་། ཉིན་གསུམ་གྱི་རིང་ལ་ཕྲུ་གུ་ཆེ་བ་ཚོས་ཆུང་བར་ཆེད་འཁྲིད་དང་། ཞལ་ལག་སྐབས་སུ་མཆོད་འབུལ་དང་དགོང་མོར་ཞལ་འདོན། སྟབས་བདེའི་སྒོམ་སྒྲུབ་གང་ལྟར་བྱིས་པ་ཆུང་ཆུང་ཚོར་བྱམས་བརྩེའི་ས་བོན་འདེབས་ཐུབ་པའི་ལས་འགུལ་དོན་སྙིང་ལྡན་པ་ཞིག་སྤེལ་ཐུབ་ཡོད་པ་རེད།
གོང་གསལ་ཐའེ་ཝན་རྒྱལ་སྤྱིའི་བོད་རྒྱ་ཆོས་བརྒྱུད་ཤེས་ཡོན་སློབ་གསོ་དགེ་རྩ་ལྷན་ཚོགས་ཀྱི་ཆོས་དཔོན་བཙུན་མ་བསྟན་འཛིན་བྱམས་ཆོས་ལགས་ཡུན་རིང་ཨ་རིར་གནས་བཞུགས་གནང་ཡོད་པ་དང་། ཕྱི་ལོ་ ༢༠༢༢ ལོར་སྐུ་ཚབ་དོན་གཅོད་ལས་ཁུངས་ཀྱི་གོ་སྒྲིག་འོག་ཚ་བོ་མཉམ་དུ་བཞུགས་སྒར་དུ་བཅར་ཏེ་༸གོང་ས་མཆོག་མདུན་དུ་སྐྲ་ཕུད་ཕུལ་བ་མ་ཟད། ཚུར་ཐའེ་ཝན་དུ་ལོག་རྗེས་ཚ་བོ་དང་ནང་མི་ཚོའི་རོགས་འདེགས་དང་དོན་གཅོད་ལས་ཁུངས་ཀྱི་ལམ་སྟོན་འོག་༸གོང་ས་མཆོག་གི་མདུན་དུ་དམ་བཅའ་ཁས་ལེན་ཞུས་པ་གཞིར་བཟུང་དགེ་རྩ་ལྷན་ཚོགས་འདི་གསར་འཛུགས་གནང་ཡོད་པ་དང་། མ་འོངས་པར་ལས་འགུལ་མང་པོ་སྤེལ་རྒྱུའི་འཆར་གཞི་ཡོད་འདུག་པ་དང་བཅས།། 
