༄༅། །ཕྱི་ལོ་ ༢༠༢༤ ཟླ་བ་ ༠༡ ཚེས་ ༠༡ ཉིན་ཉི་འོང་གི་ནུབ་ཕྱོགས་ཉེ་བའི་གླིང་ཕྲན་ནོ་ཊོ་རུ་ས་འགུལ་ཚད་གཞི་ ༧།༦ ཅན་ཞིག་བརྒྱབ་རྐྱེན་མི་རྒྱུ་ཟོག་གསུམ་ལ་གནོད་སྐྱོན་ཚབས་ཆེ་འཕོག་པའི་ཡིད་སྐྱོའི་གནས་ཚུལ་བྱུང་བར་ཉི་འོང་སྐུ་ཚབ་དོན་ཁང་དང་ཉི་འོང་བོད་མི་ཐུན་མོང་ནས་གོད་ཆག་ཁྲོད་རྐྱེན་འདས་འགྲོ་མཁན་ཐེ་བའི་གནོད་སྐྱོན་ཕོག་མཁན་རྣམས་ལ་མྱ་ངན་གདུང་སེམས་མཚོན་ཆེད་ཉི་འོང་གི་རྒྱལ་ས་ཀྲོག་ཡོར་བསྔོ་སྨོན་གསུང་འདོན་གྱི་འདུ་འཛོམས་ཤིག་གོ་སྒྲིག་གནང་ཡོད།
སྐབས་དེར་ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་རང་བྱུང་གི་གོད་ཆག་ཁྲོད་རྐྱེན་འདས་འགྲོ་མཁན་རྣམས་དང་གནོད་སྐྱོན་འཕོག་མཁན་ཚོར་བོད་མི་རྣམས་ཀྱི་ཚབ་ཞུས་ཏེ་མྱ་ངན་གུས་འདུད་དང་གདུང་སེམས་མཉམ་སྐྱེ་ཞུས་པ་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་དགེ་འདུན་འདུས་པ་རྒྱ་མཚོ་ལྷན་ས་འགུལ་གྱི་གནོད་སྐྱོན་འཕོག་མཁན་ཡོངས་ལ་ཐུགས་སྨོན་རྒྱ་ཆེ་མཛད་ཡོད་པ་གསུངས་པ་དང་འབྲེལ། མགོན་པོ་མཆོག་ནས་ཉི་འོང་གི་སྲིད་བློན་ཕུ་མེའོ་ཀི་ཤི་ཊ་མཆོག་ལ་དེ་དོན་ཐུགས་གསོའི་གསུང་འཕྲིན་སྩལ་བ་དེ་སྒྲོག་སྦྱངས་གནང་ཡོད། དེ་ནས་མགོན་པོ་གང་ཉིད་མཆོག་ནས་སྩལ་བའི་ཐུགས་གསོའི་གསུང་འཕྲིན་དེ་ཉིད་ཉི་འོང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བརྒྱུད་སྲིད་བློན་མཆོག་གི་ལས་ཁུངས་སུ་ཕུལ་ཡུལ་ཡོད། དེ་བཞིན་སྐུ་ཚབ་དོན་གཅོད་ནས་རྒྱ་གར་ནང་རྟེན་གཞི་བྱས་པའི་རྒྱལ་སྤྱིའི་ནང་ལྷན་ཚོགས་ངོས་ནས་ཀྱང་ཉི་འོང་གི་ས་འགུལ་གོད་ཆག་ལ་ཐུགས་གསོ་མཛད་ཡོད་སྐོར་འགྲེལ་བརྗོད་གནང་ཡོད་པ་རེད།
ཐུགས་སྨོན་ཞལ་འདོན་སྐབས་དགེ་བཤེས་བསོད་ནམས་རྒྱལ་མཚན་ལགས་ཀྱིས་དབུ་མཛད་མཛད་དེ་བོད་མི་དང་། ཉི་འོང་བ། རྒྱ་རིགས་མི་མང་བཅས་ནས་སྒྲོལ་མའི་བསྟོད་པ་དང་། ཤེས་རབ་སྙིང་པོ། བཟང་སྤྱོད་སྨོན་ལམ། སྤྱན་རས་གཟིགས་ཀྱི་གཟུངས་བསྔགས་གསུང་འདོན་གནང་ཞིང། སྐབས་དེར་ཉི་འོང་གི་ཚོགས་བཅར་བ་རྣམས་ནས་ཉི་འོང་སྐུ་ཚབ་དོན་ཁང་དང་བོད་མི་རྣམས་ཀྱིས་ཉི་འོང་ལ་གདུང་སེམས་མཉམ་སྐྱེ་མཚོན་ཆེད་ཞལ་འདོན་གོ་སྒྲིག་གནང་བར་ཐུགས་རྗེ་ཆེ་ཞུས་པ་མ་ཟད། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ས་འགུལ་གྱི་གོད་ཆགས་འཕོག་མཁན་རྣམས་ལ་ཐུགས་སྨོན་སྐྱབས་འཇུག་གནང་བར་བཀའ་དྲིན་རྗེས་དྲན་ཞུས་ཡོད་པ་བཅས།། 
