སིཌ་ནིར་ལྷག་དཀར་སྒོར་གཞས་ཀྱི་དབུ་འབྱེད་མཛད་སྒོ་ཚོགས་པ།

གསར་ལས་ཁང་གི་གསར་འགོད་པས།

༢༠༢༤-༠༡-༡༢

༄༅། །འདི་གར་ཨོསྟྲེ་ལི་ཡཱ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། སིཌ་ནི་བོད་རིགས་མཐུན་ཚོགས་ཀྱིས་གོ་སྒྲིག་འོག་ཕྱི་ལོ་ ༢༠༢༤ ཟླ་བ་ ༡ ཚེས་ ༡༠ རེས་གཟའ་ལྷག་པ་༧རྒྱལ་བའི་སྐུའི་ལྷག་དཀར་ཉིན་སིཌ་ནིར་ལྷག་དཀར་སྒོར་གཞས་ཀྱི་དབུ་འབྱེད་མཛད་སྒོ་ཞིག་ཚོགས་གནང་ཡོད།

དེ་ཡང་མཛད་སྒོའི་སྐུ་མགྲོན་གཙོ་བོར་སྐུ་ཚབ་དོན་ཁང་གི་དྲུང་ཆེ་ལྷ་དབང་རྒྱལ་པོ་ལགས་ཆེད་ཕེབས་གནང་ཡོད། མཛད་སྒོའི་ཐོག་མར་སྐུ་མགྲོན་གཙོ་བོ་ནས་སྣང་གསལ་ཞལ་ཕྱི་གྲུབ་རྗེས་བཀྲ་ཤིས་པའི་སྨོན་ཚིག་དང་། ༧རྒྱལ་བའི་ཞབས་བརྟན། ཚད་མེད་ཡོན་ཏན་བཅས་འུར་འདོན་གནང་གྲུབ་རྗེས་སིཌ་ནི་བོད་རིགས་མཐུན་ཚོགས་ཀྱི་ཚོགས་གཙོ་རྔ་བ་ཆོས་འཛིན་ལགས་ཀྱིས་ལྷག་དཀར་སྒོར་གཞས་ཀྱི་བྱུང་རིམ་དང་། མ་འོངས་པར་ལས་འཆར་དེ་ས་གནས་སུ་རྒྱུན་སྐྱོང་གནང་ཕྱོགས་སོགས་སྐོར་གསུང་བཤད་གནང་།

དེ་རྗེས་ལྷག་དཀར་སྒོར་གཞས་ཀྱི་ལས་དོན་ཐོག་དང་བླངས་འགན་ཁུར་རྐང་བཞེས་མཁན་རྡོ་རྗེ་ལགས་དང་། བྱམས་པ་ཆོས་འཕེལ་ལགས་རྣམ་གཉིས་ལ་ལེགས་གསོལ་བསྔགས་བརྗོད་ཀྱི་མཇལ་དར་ཕུལ། དེ་ནས་སྐུ་མགྲོན་གཙོ་བོ་སྐུ་ཚབ་དོན་ཁང་གི་དྲུང་ཆེ་ལྷ་དབང་རྒྱལ་པོ་ལགས་ནས་ལྷག་དཀར་སྲུང་བརྩི་དང་། བོད་ཀྱི་ཐུན་མོང་མ་ཡིན་པའི་རིག་གཞུང་འཁྲབ་སྟོན་འདི་བརྒྱུད་ནས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱ་རྒྱུར་ཕན་ཐོགས་ཡོད་པ་སོགས་ཀྱི་གསུང་བཤད་གནང་། གཞན་ཡང་ཁོང་གིས་སྐབས་དེར་མང་ཚོགས་ལ་དཔྱ་དངུལ་ལག་དེབ་ཀྱི་གལ་ཆེའི་རང་བཞིན་དང། དཔྱ་དངུལ་དུས་ཐོག་འབུལ་ཐབས་གནང་གལ་སོགས་ཀྱི་སྐོར་ལའང་ལམ་སྟོན་གནང་ཡོད། དེ་ཉིན་སིཌ་ནིར་གནས་འཁོད་བོད་མི་ ༢༠༠ ཙམ་ནས་ལྷག་དཀར་སྒོར་གཞས་ལ་མཉམ་ཞུགས་གནང་ཡོད་བ་བཅས། །