༄༅། །ཕྱི་ལོ་ ༢༠༢༤ ཟླ་ ༡ ཚེས་ ༡༨ ཉིན་ལྷ་དང་བཅས་པའི་འགྲོ་བ་ཡོངས་ཀྱི་མགོན་སྐྱབས་སྤྱི་ནོར་༸གོང་ས་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་སྔ་འགྱུར་རྙིང་མའི་ཆོས་བརྒྱུད་ཀྱི་བླ་ཆེན་ཁག་གིས་ཇི་ལྟར་གསོལ་བ་བཏབ་པ་ལྟར་རྡོར་གདན་དགའ་ལྡན་འཕེལ་རྒྱས་གླིང་ནས་ཀོར་ཧྥུ་རླངས་འཁོར་(Golf cart)ལ་བཞུགས་སྟེ་སྟོན་པ་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་པའི་གནས་མཆོག་རྡོ་རྗེ་གདན་གྱི་མཆོད་རྟེན་ཆེན་མོར་ཆིབས་བསྒྱུར་གྱིས་རྒྱལ་སྤྱིའི་སྔ་འགྱུར་རྙིང་མའི་སྨོན་ལམ་ཆེན་མོ་སྐབས་ ༣༥ པའི་ཚོགས་མགོན་དུ་དབུ་བཞུགས་དང་སྟོན་པའི་སྐུ་བརྙན་རིན་པོ་ཆེར་མཆོད་མཇལ་དང་ཐུགས་སྨོན་མཛད་ཡོད་པ་རེད།
དེ་ཡང་ཞོགས་པ་ཆུ་ཚོད་ ༧།༤༠ ཙམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་འཁོར་ལྷན་རྒྱས་དང་བཅས་རྡོར་གདན་བྱང་ཆུབ་མཆོད་རྟེན་ཆེན་མོར་ཆེད་ཕེབས་སྐབས་མཆོད་རྟེན་ཆེན་མོའི་ལྷོ་ཕྱོགས་ནས་སྔ་འགྱུར་རྙིང་མའི་བླ་ཆེན་ཁག་དང་སྤྱན་རྒྱ་སྤོས་སྣེས་ཕེབས་བསུ་ཞུས་པ་དང་། བཞུགས་ཁྲིར་༸ཞབས་སོར་འཁོད་མཚམས་སྔ་འགྱུར་སྨོན་ལམ་ཆེན་མོའི་ཚོགས་གཙོ་༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་གིས་མཎྜལ་རྟེན་གསུམ་སྐྱབས་ཐོ་འདེགས་འབུལ་དང་། གསོལ་ཇ་འབྲས་སིལ་རིམ་པར་ཕེབས་མཚམས་སྐར་མ་བཅོ་ལྔའི་རིང་དཀོན་མཆོག་རྗེས་དྲན་གྱི་མདོ་དང་། བཟང་པོ་སྤྱོད་པའི་སྨོན་ལམ་སོགས་གསུང་འདོན་གནང་རྗེས་བཀའ་སློབ་སྩལ་དོན། 
ཆོས་གྲོགས་རྣམ་པ་ལྷན་རྒྱས་ལ་ཞུ་རྒྱུར། དེ་རིང་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་མཛད་པ་མཛད་སའི་གནས་ཁྱད་པར་ཅན་འདིར་ང་ཚོ་རུབ་རུབ་བྱས་ཏེ་སྨོན་ལམ་རྒྱག་པའི་བསྐལ་བ་བཟང་པོ་བྱུང་བ་རེད། ང་ཚོའི་མི་ཚེ་གཅིག་ལ་འདི་ལྟ་བུའི་གོ་སྐབས་བཟང་པོ་ཞིག་བྱུང་ནས་བསོད་ནམས་བསགས་པས་ཚེ་རབས་ནས་ཚེ་རབས་སུ་ལས་བཟང་པོའི་འབྲས་བུ་སྨིན་པ་བརྒྱ་ཆ་བརྒྱ་ཐམ་པ་ཐག་གིས་ཆོད་པ་རེད། དེང་སང་སངས་རྒྱས་པའི་ཆོས་འདི། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་གསུངས་པ་ལྟར། དེ་སྔ་སངས་རྒྱས་པའི་ཆོས་མ་དར་བའི་ས་ལའང་དོ་སྣང་གསར་པ་བྱེད་བཞིན་ཡོད་པ་རེད། ང་ཚོ་ཕ་མེས་ནས་སངས་རྒྱས་བཅོམ་ལྡན་འདས་ཀྱི་རྗེས་འབྲངས་རེད།
ངོས་ནས་ཚེ་རབས་ནས་ཚེ་རབས་སུ་སངས་རྒྱས་བཅོམ་ལྡན་འདས་ཀྱི་རྗེས་འབྲངས་རྣལ་མ་ཞིག་ཡོང་ཐུབ་པའི་སྨོན་ལམ་རྒྱག་གི་ཡོད་ལ། ཆོས་གྲོགས་ཚོ་ཡང་དེ་ལྟ་བུ་ཞིག་ཏན་ཏན་ཡོང་གི་རེད། ཚང་མས་ཐུགས་སྨོན་ཡག་པོ་གནང་ཤོག དུས་དང་དུས་སུ་སྨོན་ལམ་རྒྱག་རྒྱུ་གལ་ཆེན་པོ་རེད། ཡིན་ནའང་། གཙོ་བོ་ཉིན་ཞག་ཕྲུགས་གཅིག་གི་རིང་ལ་སོ་སོའི་སེམས་དེ་བཅོམ་ལྡན་འདས་ཀྱི་དགོངས་པ་དང་མི་འགལ་བ་ཞིག་དང་། བསམ་པ་རྣམ་དག་གི་ཆོས་པ་ཞིག་བྱེད་དགོས་པ་རེད། དེ་ཚང་མས་ཐུགས་ལ་ཆོངས། གཞན་ཞུ་རྒྱུ་མི་འདུག ངོས་རང་ཧ་ཅང་བསྐལ་བ་བཟང་པོ་བྱུང་། ཚེ་རབས་ནས་ཚེ་རབས་སུ་སྟོན་པ་བཅོམ་ལྡན་འདས་ཀྱི་བསྟན་པ་ཉམས་པ་སོར་ཆུད་དང་། མི་ཉམས་གོང་འཕེལ་ཡོང་བར་སྨོན་ལམ་བརྒྱབ་ནས་སེམས་ཤུགས་བསྐྱེད་བཞིན་ཡོད། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་སྙིང་ཁུང་རུས་པའི་གཏིང་ནས་སེམས་ཤུགས་བསྐྱེད་དེ་སྨོན་ལམ་རྒྱག་གི་ཡོད། ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་བཞིན་ཡོད། དེ་ལྟར་ཟབ་པ་དང་རྒྱ་ཆེ་བའི་བསྟན་པ་འདི་ཇི་སྲིད་ནམ་མཁའ་མ་ཟད་ཀྱི་བར་དུ་ཉམས་པ་སླར་གསོ་དང་། མ་ཉམས་གོང་འཕེལ་ཡག་པོ་ཡོང་ཐུབ་པར་ཞབས་འདེགས་ག་རེ་སྒྲུབ་རྒྱུ་ཡོད་པ་དེ་སྒྲུབ་ཐུབ་པའི་སྨོན་ལམ་རྒྱག་གི་ཡོད། ཅེས་དང་། 
ཆོས་ནི་ཕྱི་ལོགས་ཀྱི་རྣམ་འགྱུར་གྱི་སྐད་ཆ་མིན་པར་ཆོས་ཀྱི་སྙིང་པོ་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ་བསམ་བློའི་ནང་ཉིན་ཞགས་ཕྲུགས་གཅིག་གི་རིང་མ་བརྗེད་པར་འཛིན་རྒྱུ་གལ་ཆེན་པོ་རེད། ངོས་རང་ལ་མཚོན་ན་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་འབྲེལ་ནས་སྟོང་ཉིད་ཀྱི་ལྟ་བ་སྒོམ་བཞིན་ཚེ་རབས་ནས་ཚེ་རབས་སུ་སྟོན་པའི་རྗེས་འབྲངས་རྣལ་མ་ཞིག་གི་ཐོག་ནས་ཇི་སྲིད་ནམ་མཁའ་མ་ཟད་ཀྱི་བར་དུ་འགྲོ་བ་མི་གཙོ་བོར་གྱུར་པའི་མཐའ་ཡས་པའི་སེམས་ཅན་མཐའ་དག་གི་དོན་བྱེད་ཐུབ་པའི་སྨོན་ལམ་རྒྱག་གི་ཡོད་། གནས་ཁྱད་པར་ཅན་འདི་འདྲ་ལ་སྨོན་ལམ་འདི་བརྒྱབ་པས་སྨོན་ལམ་འགྲུབ་པར་ཏན་ཏན་རྐྱེན་ཞིག་ཡོད་པ་རེད། ཚང་མར་ཐུགས་རྗེ་ཆེ། བཀྲ་ཤིས་བདེ་ལེགས། ཞེས་བཀའ་སློབ་སྩལ་གྲུབ་མཚམས་བླ་ཆེན་ཁག་དང་སྤྱན་རྒྱ་སྤོས་སྣེས་མདུན་བསུས་ཏེ་མཆོད་རྟེན་ཆེན་མོའི་རྟེན་གཙོ་སྟོན་པའི་སྐུ་བརྙན་རིན་པོ་ཆེའི་མདུན་དུ་བསྟན་འབར་མ་དང་བདེན་ཚིག་སྨོན་ལམ་གསུང་འདོན་སོགས་ཐུགས་སྨོན་གནང་རྗེས་དགའ་ལྡན་འཕེལ་རྒྱས་གླིང་དུ་ཆིབས་བསྒྱུར་བསྐྱངས་ཡོད།
ཐེངས་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་རྒྱལ་སྤྱིའི་དགེ་འདུན་པའི་གླེང་སྟེགས་དབུ་འབྱེད་མཛད་སྒོ་དང་། འཛམ་གླིང་ཞི་བདེའི་སྨོན་ལམ་ལ་དབུ་བཞུགས་ཀྱི་བཀའ་སློབ་བཀའ་དྲིན་སྩལ་བ་མ་ཟད། ཉིན་གསུམ་རིང་འཛམ་གླིང་ས་ཕྱོགས་གང་ས་ནས་ཆེད་ཕེབས་གནང་བའི་དད་ལྡན་ཁྲི་ཕྲག་མང་པོར་ཆོས་དབྱིངས་བསྟོད་པའི་གསུང་ཆོས། རྗེ་བཙུན་འཇམ་པའི་དབྱངས་ཀྱི་རྗེས་གནང་གི་ཆོས་འབྲེལ་བཀའ་དྲིན་སྩལ་བ་དང་། ཝཱ་རཱ་ཎ་སཱི་དབུས་བོད་ཀྱི་གཙུག་ལག་སློབ་གཉེར་ཁང་དང་ཝཱ་རཱ་ཎ་སཱི་སློབ་ཟུར་ཐུན་མོང་། སྤོན་ཊ་ཆོལ་གསུམ་བོད་མིའི་གཞིས་ཆགས་དང་དཔལ་ཞ་ལུ་དགོན་པ། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་དང་དགེ་ལྡན་སྤྱི་ལས་ཁང་བཅས་ནས་ཚེའི་ལྷ་མཆོག་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་དང་། གཞན་ཡང་། གདན་ས་གསུམ་དང་བཀྲ་ཤིས་ལྷུན་པོ། ར་སྟོད་གྲྭ་ཚང་བཅས་ཀྱི་དགེ་བཤེས་ལྷ་རམས་པའི་བསླབ་པ་མཐར་སོན་གྱི་ཕྱག་འཁྱེར་གནང་བའི་མཛད་སྒོར་དབུ་བཞུགས་ཀྱིས་བཀའ་སློབ་བཀའ་དྲིན་སྩལ་བཅས་ཀྱིས་མཛད་རིམ་ལེགས་པར་གྲུབ་སྟེ། ཚེས་ ༡༩ ཉིན་གནས་མཆོག་རྡོ་རྗེ་གདན་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱང་རྒྱུ་ཡིན་པ་བཅས།། 
