༄༅། །ཨིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཇིམ་ཤ་ནོན་ (Jim Shannon) ལགས་ཀྱི་གོ་སྒྲིག་དང་། གྲོས་ཚོགས་འཐུས་མི་ཕི་ཧོ་ན་བུ་རུ་སི་(Fiona Bruce) ལགས། ཇེ་ཀོབ་རི་སི་ (Jacob Rees-Mogg) ལགས། ཀེ་རི་མེག་ཀར་ཐི་ (Kerry McCarthy) ལགས། ཀེ་ཐི་རིན་ཝེ་སི་ (Catherine West) ལགས་ཀྱི་རྒྱབ་སྐྱོར་འོག་ཨིན་ཡུལ་གྲོས་ཚོགས་སུ་རྒྱ་ནག་གཞུང་གིས་བོད་དུ་ནང་པ་ཚོར་སྡུག་སྦྱོང་མནར་གཅོད་གཏོང་བཞིན་པའི་ཛ་དྲག་གནས་སྟངས་སྐོར་བགྲོ་གླེང་ཞིབ་ལྷུག་གནང་ཡོད་པ་རེད།

དེ་ཡང་གྲོས་ཚོགས་འཐུས་མི་ཇིམ་ཤེ་ནོན་ལགས་ཀྱིས་ངོ་སྤྲོད་གསུང་བཤད་ནང་རྒྱ་ནག་དམར་ཤོག་ཚོགས་པས་བོད་བརྒྱུད་ནང་བསྟན་ལ་ཐེ་བྱུས་སྟངས་འཛིན་བྱེད་ཐབས་རྩོམ་བཞིན་ཡོད། བོད་མི་རྣམས་ང་དང་སེམས་ཐག་ཉེ་པོ་ཡོད། དེར་བརྟེན་བརྗོད་གཞི་འདི་དམིགས་བསལ་གལ་ཆེན་པོར་བརྩི་གི་ཡོད། གྲོས་ཚོགས་འདི་ཡིས་ཉམ་ཆུང་བོད་མི་རྣམས་ཀྱི་འབོད་སྒྲ་མཚོན་ཐུབ་པ་བྱེད་དགོས་ཞེས་གསུངས་པ་མ་ཟད། ཁོང་གིས་ཨིན་གཞུང་བློན་ཆེན་རྣམས་ལ་བོད་མི་ཚོར་རྒྱབ་སྐྱོར་གནང་ཐབས་ཇི་དགེའི་སྐོར་ལམ་སྟོན་དོན་ཚན་ཁག་ཅིག་གནང་ཡོད།

དོན་ཚན་ཁག་ནི།

༡) བོད་མི་མང་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རང་རང་གི་ཆོས་ལུགས་ཀྱི་རྗེས་སུ་འབྲངས་ཏེ་༸གོང་ས་༸སྐྱབས་མགོན་སྐུ་ཕྲེང་བཅོ་ལྔ་པ་ཆེན་པོ་མཆོག་ངོས་འཛིན་གྱི་མཛད་སྒོའི་ནང་ཞུགས་རྒྱུའི་ཐོབ་ཐང་སྲུང་སྐྱོབ་བྱེད་དགོས།

༢) པཎ་ཆེན་རིན་པོ་ཆེ་སྐུ་འཁོར་ལྷན་རྒྱས་གློད་བཀྲོལ་ཡོང་ཐབས།

༣) དགེ་འདུན་པ་མཚོན་པའི་ཉེས་མེད་ཆབ་སྲིད་བཙོན་པ་རྣམས་གློད་བཀྲོལ་ཡོང་ཐབས།

༤) འཇིགས་སྣང་དང་བཙན་གནོན་མེད་པའི་ཐོག་ནས་ཆོས་དད་རང་དབང་ལོངས་སུ་སྤྱོད་རྒྱུ།

༥) བོད་བརྒྱུད་ནང་བསྟན་གྱི་བཀའ་འགྱུར་བསྟན་འགྱུར་གྱི་གཞི་མར་གྱུར་བའི་བོད་ཀྱི་སྐད་ཡིག་སྦྱོང་རྒྱུའི་ཐོབ་ཐང་ཡོད་པ།

སྐབས་དེར་གསུང་བཤད་གནང་མཁན་ཚང་མས་བོད་ནང་ལོ་རེ་བཞིན་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པའི་གནས་སྟངས་སྤྱི་དང་། ཡང་སྒོས་ཆོས་དད་རང་དབང་། ཁོར་ཡུག མི་སེར་སྤེལ་ཡུལ་གཏན་འཇགས་སློབ་གྲྭ རྒྱ་ནག་གིས་བོད་ཀྱི་རིག་གཞུང་ལག་ཆར་བཀོལ་སྤྱོད་བྱེད་བཞིན་པ། རང་ལུས་མེར་སྲེག་སོགས་ཀྱི་སྐོར་ནན་བརྗོད་གནང་བ་མ་ཟད། གསུང་བཤད་པ་རྣམས་ནས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་དཔར་འགྲེམས་གནང་བའི་དཔེ་དེབ་ ༼ ཕྱི་ལོ་ ༢༠༢༣ ནང་གི་བོད། ༽ དང་། གཞན་ཡང་རྒྱལ་སྤྱིའི་བོད་དོན་ལས་འགུལ་ཁང་སོགས་ནས་འདོན་སྤེལ་གནང་བའི་གནས་ཚུལ་མཁོ་འདོན་གནང་སྟེ་འགྲེལ་བརྗོད་གནང་ཡོད་པ་རེད།

གཞན་ཡང་བགྲོ་གླེང་ཐོག་ད་བར་བོད་ཐོག་ཨིན་གཞུང་གིས་དགོས་ངེས་ཅན་གྱི་རྒྱབ་སྐྱོར་གནང་ཐུབ་མེད་ཚུལ་དང་། རྒྱ་ནག་གིས་བོད་ནང་གི་གནས་ཚུལ་ལ་དམ་བསྒྲགས་ཆེན་པོ་བྱས་རྐྱེན་ཨིན་གཞུང་ནས་གནས་ཚུལ་ངོ་མ་རྟོག་ཞིབ་གནང་དཀའ་བར་གྱུར་ཚུལ་ངོས་ལེན་གནང་བ་མ་ཟད། ཨིན་གཞུང་ལ་རྒྱལ་སྤྱིའི་ཁྲིམས་ལུགས་དགོངས་དོན་རྒྱ་གཞུང་གི་བྱ་སྤྱོད་དེ་དག་ལ་སྐྱོན་བརྗོད་དང་འགྱུར་བ་གཏོང་ཐབས་བྱ་རྒྱུའི་བཟང་སྤྱོད་ཀྱི་འོས་འགན་ཞིག་ཡོད་པ་གསུངས་ཡོད། ཨིན་གཞུང་གི་རྒྱ་གར་ཞི་བདེ་རྒྱ་མཚོ་དང་འབྲེལ་བའི་བློན་ཆེན་ཨན་ནེ་མ་རི་ཊེ་རེ་བེ་ལེན་ (Anne-Marie Trevelyn) ལགས་ཀྱིས་གསུང་དོན་ལ། ཨིན་གཞུང་གིས་མུ་མཐུད་ནས་རྒྱ་ནག་གི་བྱ་སྤྱོད་དེ་དག་ལ་འགན་ལེན་འཁུར་འཇུག་རྒྱུ་ཡིན་པ་དང་། ང་ཚོས་མུ་མཐུད་ནས་ང་རང་ཚོའི་རིན་ཐང་གི་རྒྱབ་ཏུ་ལངས་ནས་བོད་དང་འཛམ་གླིང་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་དང་དར་སྤེལ་གཏོང་རྒྱུ་ཡིན། གྲོས་ཚོགས་འཐུས་མི་རྣམ་པས་རྒྱ་ནག་གི་དབང་འཛིན་པ་ཚོས་བཙན་གནོན་བྱེད་བཞིན་པའི་གནས་ཚུལ་དང་། བྱ་སྤྱོད་དེ་དག་ལ་སྐྱོན་བརྗོད་ཤུགས་ཆེ་གནང་བ་དེ་རིང་ང་ཚོས་ཐོས་སོང་། ང་ཚོས་མུ་མཐུད་ནས་ང་ཚོའི་ཕྱག་རོགས་རྣམ་པས་ཞེ་བསུན་དང་། དྲང་ཚུགས་ལྡན་པའི་ཁོང་ཁྲོའི་རྣམ་པ་བསྟན་པ་རྣམས་ཡིད་བཅངས་ཀྱིས་རྒྱ་ནག་ལྷན་སྐད་ཆ་ཤོད་སྐབས་སྐད་ཤུགས་ཆེ་རུ་གཏང་རྒྱུ་དང་། སྲིད་དོན་བཀའ་ཆད་མུ་མཐུད་གཏང་རྒྱུ་ཡིན་ཞེས་གསུངས།

ཉེ་ལམ་རྒྱ་ནག་གཞུང་གིས་བོད་ཀྱི་ཨིན་སྐད་མིང་ཊི་བེཊ་ (TIBET) ནས་ཤི་ཙང་དུ་བརྗེ་འགྱུར་བཏང་བའི་གནས་ཚུལ་སྐོར་བཀའ་འདྲི་ཞུས་པར་བློན་ཆེན་མཆོག་ནས། ང་ཚོས་མུ་མཐུད་ནས་ཨིན་སྐད་དུ་ཊི་བེཊ་བེད་སྤྱོད་གཏོང་གི་རེད། གལ་ཏེ་དེ་ཉིད་འཕེལ་བཞིན་པའི་བཤད་ཚུལ་ཞིག་ཏུ་འགྱུར་གྱི་ཡོད་ན། ང་ཚོས་དོ་སྣང་གཟན་ནན་དང་གདོང་ལེན་བྱེད་དགོས། ཞེས་གསུངས་ཡོད།

དེ་བཞིན་གྲོས་ཚོགས་ནང་གྲོས་ཚོགས་འཐུས་མི་དང་རྒྱལ་སྤྱིའི་ཆོས་དད་རང་དབང་མཐུན་ཕྱོགས་ཀྱི་ཚོགས་གཙོ་ཟུར་པ་ཕི་ཧོ་ན་བུ་རུ་སི་ལགས་ཀྱིས་ཚོགས་མི་རྒྱལ་ཁབ་ ༤༢ ཡོད་པའི་རྒྱལ་སྤྱིའི་ཚོགས་པ་འདི་ཡིས་༸པཎ་ཆེན་སྐུ་ཕྲེང་བཅུ་གཅིག་པ་བསྟན་འཛིན་དགེ་འདུན་ཡེ་ཤེས་འཕྲིན་ལས་མཆོག་ཟླ་བ་ ༡༢ པའི་ཆབ་སྲིད་བཙོན་པར་བདམས་ཡོད་ཅེས་སྙན་སེང་ཞུས་ཡོད།

བགྲོ་གླེང་སྐབས་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། ནང་པའི་ལྷན་ཚོགས་ཀྱི་ཚོགས་གཙོ་ཊེས་སི་མོན་བིཊ་གྲུབ་ (Dr Desmond Biddulph) ལགས། ཨིན་ཡུལ་བོད་རིགས་ཚོགས་པའི་ཚོགས་གཙོ་བསྟན་འཛིན་ཀུན་དགའ་ལགས་ཆེད་བཅར་ཞུས་ཡོད་པ་བཅས།།