༄༅། །ཨ་རིའི་རོགས་ཚོགས་ (USAID) ངོས་ནས་རྒྱ་གར་དང་བལ་ཡུལ་གནས་སྡོད་སྐྱབས་བཅོལ་བོད་མིར་རོགས་དངུལ་རྒྱབ་སྐྱོར་གནང་ཕྱོགས་དང་འབྲེལ་ཏེ་ཞིབ་འཇུག་ལས་དོན་ཞིག་བརྩམས་ཡོད།

དེ་ཡང་བོད་མིའི་གནས་སྟངས་ཞིབ་འཇུག་འདིའི་དམིགས་ཡུལ་གཙོ་བོ་ནི་ཨ་རིའི་རོགས་ཚོགས་ཀྱི་ལས་གཞིའི་དམིགས་ཡུལ་དོན་ཁྱོལ་དང་། མ་འོངས་ལས་འཆར་དང་འབྲེལ་བའི་བསམ་ཚུལ་རྒྱུས་ལོན་ཡོང་ཐབས་སྐོར་ཡིན་ཞིང་། ཞིབ་འཇུག་ལས་དོན་དེ་ཉིད་ཨ་རིའི་རོགས་ཚོགས་ཀྱིས་རྒྱལ་སྤྱིའི་ཡར་རྒྱས་ཚན་པ་ (International Development Group) ལ་བསྐོ་མངགས་གནང་ཡོད་ལ། ཞིབ་འཇུག་དེ་ལ་མཚོན་ན་མ་འོངས་པར་ཨ་རིས་བོད་མིར་ (TSRR) རོགས་དངུལ་མཁོ་སྤྲོད་གནང་ཕྱོགས་ཐད་གལ་གནད་ཆེན་པོ་ཆགས་ཀྱི་ཡོད་པ་རེད།

ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༢ ཉིན་རྒྱལ་སྤྱིའི་ཡར་རྒྱས་ཚན་པའི་ལས་བྱེད་རྣམས་ཀྱིས་ཞིབ་འཇུག་ལས་དོན་དང་འབྲེལ་ཏེ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་གཙོས་པའི་ཚན་པའི་འགན་འཛིན་དང་ལས་འཆར་འགན་འཛིན་རྣམས་དང་ཐུག་འཕྲད་གནང་། ཞིབ་འཇུག་འདིའི་གྲུབ་འབྲས་ཀྱིས་ཨ་རིའི་རོགས་ཚོགས་ངོས་ནས་རྒྱ་བལ་གནས་སྡོད་བོད་མིར་རོགས་དངུལ་རྒྱབ་སྐྱོར་གནང་ཕྱོགས་ལ་ཤུགས་རྐྱེན་ཆེན་པོ་སྤྲོད་ངེས་ཡིན། ཞིབ་འཇུག་ལས་དོན་སྐབས་ཉམས་ཞིབ་པ་རྣམས་ནས་དོན་གནད་གཙོ་བོ་གསུམ་སྟེ། དཔལ་འབྱོར་ཡར་རྒྱས་དང་འཚོ་ཐབས་ཀྱི་གོ་སྐབས། བོད་ཀྱི་རིག་གཞུང་རྒྱུན་འཛིན། སྤྱི་ཚོགས་རྒྱུན་གནས་ཐོག་དོ་སྣང་གནང་གི་ཡོད་པ་བཅས།།