༄༅། །སྭི་ཌན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་སྭི་ཌན་གྲོས་ཚོགས་སུ་བོད་དོན་དང་འབྲེལ་བའི་གྲོས་འཆར་གསུམ་བཏོན་གནང་ཡོད་པ་རེད།
དེ་ཡང་གྲོས་གཞི་ཨང་ ༡༥༢༩ དང་། ༢༢༠༧། ༢༤༠༢ བཅས་ནི་སྭི་ཌན་ནང་དུ་བོད་དོན་རྒྱབ་སྐྱོར་དང་འབྲེལ་བའི་གྲོས་འཆར་གལ་ཆེ་གསུམ་ཡིན་ཞིང་། དེ་དག་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་གནད་དོན་དང་། སྭི་ཌན་གཞུང་ནས་རྒྱ་ནག་གཞུང་དང་ལྷན་དུ་བོད་ནང་གི་འགྲོ་བ་མིའི་ཐོབ་ཐང་དང་། མི་སེར་སྤེལ་ཡུལ་གྱི་གཏན་འཇགས་སློབ་གྲྭར་བོད་ཕྲུག་རྣམས་བཙན་འཇུག་བྱས་པ། བོད་མིའི་སྐུ་ཚབ་དང་ལྷན་དུ་གྲོས་མོལ་སླར་ཡང་མུ་མཐུད་རྒྱུར་འབྲེལ་མོལ་གནང་རྒྱུ། སྭི་ཌན་གཞུང་ནས་ཡུ་རོབ་མཐུན་ཚོགས་དང་མཉམ་ལས་ཀྱིས་ཡུ་རོབ་མཐུན་ཚོགས་ཀྱི་བོད་དོན་དམིགས་བསལ་འབྲེལ་མཐུད་པ་བསྐོ་གཞག་གནང་ཕྱོགས་སྐོར་ཡིན་པ་རེད།
འདི་ལོའི་ཕྱི་ཟླ་ ༠༩ ནང་སྭི་ཌན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མར་ག་རེ་ཊ་ (Margareta Cederfelt) ལགས་ཀྱི་སྣེ་ཁྲིད་འོག་གྲོས་ཚོགས་འཐུས་མི་བདུན་བོད་མིའི་མང་གཙོའི་དུས་ཆེན་གྱི་གཞུང་འབྲེལ་སྐུ་མགྲོན་དུ་བཞུགས་སྒར་རྡ་རམ་ས་ལར་ཆེད་ཕེབས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་ཡོད་པ་མ་ཟད། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་མཇལ་མོལ་གནང་ཡོད། ཕྱོགས་ཕེབས་དེ་བཞིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་ཨིན་ཡུལ་སྐུ་ཚབ་དོན་ཁང་ཟུང་སྦྲེལ་གྱིས་གོ་སྒྲིག་ཞུས་ཡོད་པ་རེད།
དེ་བཞིན་ཕྱི་ལོ་ ༢༠༢༢ ཟླ་བ་ ༡༠ ནང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཐེངས་དང་པོ་སྭི་ཌན་དུ་གཞུང་འབྲེལ་ཕྱོགས་ཕེབས་གནང་ཡོད་པ་དང་། སྐབས་དེར་སྭི་ཌན་གྱི་སྲིད་བློན་གསར་པ་བསྐོ་བཞག་དང་། སྭི་ཌན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་གནང་བའི་སྐབས་དང་འཁེལ་ཡོད། གཞན་ཡང་ཕྱི་ལོ་ ༢༠༢༢ ཟླ་བ་ ༡༡ རྒྱལ་སྤྱིའི་བོད་དོན་ལས་འགུལ་ཁང་གི་གོ་སྒྲིག་འོག་བོད་མི་མང་སྤྱི་འཐུས་རྣམ་པ་གསུམ་སྭི་ཌན་དུ་ཕྱོགས་ཕེབས་གནང་ཡོད་པ་རེད།
སྭི་ཌན་གྱིས་ཡུ་རོབ་ལྷན་ཚོགས་ཀྱི་ཚོགས་གཙོ་གནང་བའི་སྐབས་ཨིན་ཡུལ་སྐུ་ཚབ་དོན་ཁང་གིས་སྭི་ཌན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་རྒྱབ་སྐྱོར་འོག་ཕྱི་ལོ་ ༢༠༢༣ ཟླ་བ་ ༠༦ ནང་སྭི་ཌན་གྲོས་ཚོགས་སུ་བོད་ཀྱི་ཁོར་ཡུག་དང་། ཞི་འགྲིག་མ་བྱུང་བའི་བོད་རྒྱའི་དཀའ་རྙོག་སྐོར་གསུང་བཤད་ལས་རིམ་གོ་སྒྲིག་གནང་ཡོད།
ཨིན་ཡུལ་སྐུ་ཚབ་དོན་ཁང་གི་འབད་རྩོལ་ལ་སྭི་ཌན་ས་གནས་བོད་མི་དང་། ས་གནས་བོད་རིགས་སྤྱི་མཐུན་ཚོགས་པས་རྒྱབ་སྐྱོར་གང་ཐུབ་གནང་ཡོད་པ་བཅས།།
