༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་གསར་ཚེས་ལ་འཚམས་འདྲི་སྩལ་ཡོད།
དེ་ཡང་འཚམས་འཕྲིན་ནང་མགོན་པོ་མཆོག་གིས། ལོ་གསར་གྱི་དུས་ཆེན་འདི་ལ་མཚོན་ན། ངོས་ལ་འཚམས་འདྲི་ཞུ་མཁན་ཚང་མར་ཐུགས་རྗེ་ཆེ་ཞུ་བ་དང་། འཛམ་གླིང་གི་ཡུལ་གྲུ་གང་སར་གནས་པའི་ཆོས་གྲོགས་ཕོ་མོ་རྣམས་ལ་འཚམས་འདྲི་ཞུ་རྒྱུ་ཡིན།
དེང་སྐབས་ང་ཚོར་དཀའ་ངལ་མང་པོ་ཞིག་འཕྲད་བཞིན་ཡོད་ཀྱང་། ང་ཚོ་ཚང་མ་ཕན་ཚུན་ཇི་ལྟར་འབྲེལ་ཡོད་པ་དང་། འགྲོ་བ་མི་རྣམས་གཅིག་པ་ཡིན་པའི་གོ་རྟོགས་ཆེ་རུ་སོང་བ་དང་། ང་ཚོ་ཚང་མས་འཚོ་བ་དོན་སྙིང་ལྡན་པ་ཞིག་སྐྱེལ་བ་དང་འཛམ་གླིང་ལེགས་པོ་ཞིག་སྐྲུན་ཐུབ་པའི་རེ་བ་བཟང་ས་ནས་རྒྱག་གི་ཡོད།
འགྲོ་བ་མི་ཡིན་པའི་ཆ་ནས་ང་ཚོར་སྡུག་བསྔལ་དང་བྲལ་ཞིང་བདེ་བ་འདོད་པའི་ཐུན་མོང་གི་མངོན་འདོད་ཅིག་ཡོད། ང་ཚོ་ནི་གཞན་གྱི་འཚོ་གནས་ལ་བརྟེན་དགོས་པའི་སྤྱི་ཚོགས་རང་བཞིན་གྱི་སེམས་ཅན་ཞིག་ཡིན། དེར་བརྟེན། ངས་རྒྱུན་དུ་བཤད་པ་ལྟར། ང་ཚོས་གཞན་གྱི་བདེ་སྡུག་གི་ཆེད་དུ་འབད་པ་བྱེད་དགོས། གལ་ཏེ་ང་ཚོས་གཞན་ལ་ཕན་མ་ཐོགས་ནའང་། མ་མཐར་ཡང་གཞན་ལ་འཚེ་བ་མི་བྱེད་པའི་ཁག་ཐེག་བྱེད་དགོས། ངས་གཞན་ལ་ཕན་འདོགས་པ་དེ་རང་ཉིད་ལ་ཞི་བདེ་དང་བདེ་སྐྱིད་སྐྲུན་པའི་ཐབས་ལམ་ཡག་ཤོས་དེ་ཡིན་པར་ཤེས་རྟོགས་བྱུང་།
ངས་ད་དུང་ནང་སེམས་ཀྱི་ཞི་བདེ་རྙེད་པའི་སྐབས་སུ་འཛམ་གླིང་ལ་ཞི་བདེ་རྙེད་ཐུབ་པར་ཡིད་ཆེས་བརྟན་པོ་བྱེད་ཀྱི་ཡོད། འགྲོ་བ་མི་ཚང་མར་སེམས་ཀྱི་ཞི་བདེ་གོང་འཕེལ་དུ་གཏོང་བ་དང་། དེ་ལྟར་བྱེད་པ་བརྒྱུད་ནས་གོ་ལའི་སྤྱི་ཚོགས་འདིའི་ཞི་བདེ་ལ་མཐུན་སྦྱོར་བྱེད་པའི་ནུས་པ་ཡོད་ལ། ང་ཚོས་ངེས་པར་དུ་རང་གི་རྒྱལ་ཁབ་དང་ཆོས་ལུགས་གང་ཡིན་ལ་མ་ལྟོས་པར་སེམས་ཀྱི་ཞི་བདེ་དང་སྙིང་རྗེ་གོང་འཕེལ་དུ་གཏོང་བར་འབད་བརྩོན་བྱེད་དགོས།
གལ་ཏེ་དུས་རབས་སྔོན་མ་ནི་མཚན་ཉིད་ངེས་མེད་ཀྱི་དྲག་སྤྱོད་ཀྱི་དུས་རབས་ཤིག་ཡིན་ན། དུས་རབས་འདི་གྲོས་མོལ་གྱི་དུས་རབས་ཤིག་ཏུ་འགྱུར་བར་བྱ་རྒྱུ་ནི་ང་ཚོའི་ལས་འགན་ཆགས་ཡོད། ཅེས་བཀའ་སྩལ་ཡོད་པ་རེད།
