༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཊོ་ནོལ་ཀྲོག་སི་ (Donald Tusk) མཆོག་པོ་ལེནྚ་གྱི་སྲིད་བློན་དུ་བསྐྱར་འདེམས་བྱུང་བར་འཚམས་འདྲི་མཛད་ཡོད་པ་རེད།
དེ་ཡང་མཚམས་འཕྲིན་ནང་མགོན་པོ་མཆོག་གིས། ལོ་ངོ་མང་པོའི་རིང་སྐུ་ཉིད་ཀྱི་རྒྱལ་ཁབ་ཀྱིས་མང་གཙོའི་རིན་ཐང་རང་ཡུལ་མ་ཟད། ཕྱི་རྒྱལ་དུའང་འབད་པ་ཆེན་པོས་དར་སྤེལ་བཏང་ཡོད། ངོས་རང་སྐུ་ཉིད་ཀྱི་མཛེས་སྡུག་ལྡན་པའི་རྒྱལ་ཁབ་ལ་ཐེངས་དུ་མར་ལྟ་སྐོར་དུ་བསྐྱོད་མྱོངས་བ་མ་ཟད། སྐུ་ཉིད་མཚོན་པའི་ང་ཚོའི་སྙིང་ཉེ་བའི་གྲོགས་པོ་ལི་ཆ་ཝ་ལེ་ས་ (Lech Walesa) མཆོག་དང་དབུ་ཁྲིད་གཞན་རྣམས་ལྷན་དུ་མཇལ་རྒྱུའི་གོ་སྐབས་བྱུང་།
ངོས་རང་པོ་ལནྚ་ལ་བསྐྱོད་པའི་སྐབས་སུ། སྤྱི་ཚོགས་ཀྱི་གྲལ་རིམ་འདྲ་མིན་ནས་ཡིན་པའི་མི་རྣམས་ཀྱིས་ངས་སྙིང་རྗེ་དང་། བཟོད་པ། ཆོག་ཤེས། རང་སྡོམ་སོགས་འགྲོ་བ་མིའི་གཞི་རྩའི་རིན་ཐང་རྣམས་གོང་འཕེལ་གཏོང་བ་དང་། ཆོས་ལུགས་མཐུན་སྒྲིལ་གོང་འཕེལ་གཏོང་བའི་འབད་བརྩོན་ལ་རྒྱབ་སྐྱོར་དང་དོ་སྣང་གནང་སོང་། ཁོང་ཚོས་ངོས་ལ་མཛའ་སེམས་བསྟན་པ་མ་ཟད། བོད་མི་ཚོར་གདུང་སེམས་མཉམ་སྐྱེ་གནང་བར་སེམས་གཏིང་ནས་རྗེས་སུ་ཡི་རང་ཞུ་གི་ཡོད།
དེང་སང་འཛམ་གླིང་ལ་དཀའ་ངལ་མང་དག་ཅིག་འཕྲད་བཞིན་ཡོད་པ་དེ་ལྟར་ཡང་། འགྲོ་བ་མི་རྣམས་གཅིག་པ་ཡིན་པ་དང་ང་ཚོ་ཕན་ཚུན་གཅིག་ལ་གཅིག་རྟེན་ཡིན་པའི་གནས་ཚུལ་ལ་ངོས་འཛིན་བྱེད་མཁན་ཇེ་མང་དུ་འགྲོ་བཞིན་འདུག དེར་བརྟེན། ངས་མ་འོངས་པར་བཟང་ཕྱོགས་ཀྱི་འགྱུར་བ་ཞིག་ཡོང་བའི་རེ་བ་རྒྱག་གི་ཡོད།
པོ་ལེནྚ་ལ་འཛམ་གླིང་གི་ཞི་བདེ་གོང་འཕེལ་དང་བདེ་འཇགས་སྲུང་སྐྱོབ་ཐད་ཞབས་འདེགས་སྒྲུབ་པའི་ནུས་པ་ཡོད། སྐུ་ཉིད་ལ་པོ་ལེནྚ་རྒྱལ་ཁབ་ཀྱི་སྲིད་བློན་དང་། ཡུ་རོབ་ལྷན་ཚོགས་ཀྱི་ཚོགས་གཙོ་གནང་བའི་ཉམས་མྱོང་ཡོད་སྟབས། ངོས་ཀྱིས་གདེང་ཚོད་ལྡན་པའི་ཐོག་སྐུ་ཉིད་ནས་འཛམ་གླིང་འདི་དྲག་སྤྱོད་དང་གོ་མཚོན་བྲལ་བའི་གནས་ཡུལ་བཟང་པོ་ཞིག་ཏུ་བསྒྱུར་བར་ཞབས་འདེབས་སྒྲུབ་ཐུབ་ཅེས་ཞུ་ཐུབ། ཅེས་དང་།
མཐར་མགོན་པོ་མཆོག་གིས་སྲིད་བློན་མཆོག་ནས་པོ་ལེནྚ་མི་མང་གི་དགོས་མཁོ་དང་མངོན་འདོད་བསྒྲུབ་པར་ཡོང་འགྱུར་གྱི་དཀའ་ངལ་མཐའ་དག་ལ་གདོང་ལེན་གནང་ཐུབ་པའི་ཐུགས་སྨོན་མཛད་ཡོད་པ་བཅས།།
