༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་ཧྲིལ་པོ་སུམ་ཅུ་སོ་བཞི་འཁོར་བའི་དུས་ཚིགས་ཁྱད་པར་ཅན་གྱི་ཉིན་མོ་དང་བསྟུན། ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག་བོད་ཀྱི་ཟློས་གར་དུ་ཧི་མ་ལ་ཡའི་དུས་སྟོན་ཐེངས་ ༢༧ པ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༤ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ཆེད་བསྟོད་སྐུ་མགྲོན་དུ་ཕེབས་པ་དང་། སྐུ་མགྲོན་གཙོ་བོར་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ར་གྷུ་བིར་སིངྒ་བཱ་ལཱ་མཆོག དམིགས་བསལ་སྐུ་མགྲོན་དུ་དྷ་ས་གྲོང་སྡེའི་སྤྱི་ཁྱབ་ལྕམ་སྐུ་ནི་ནུ་ཤར་མ་མཆོག དྷ་ས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇིཏ་ནེ་རི་ཡ་ལགས། དྷ་ས་ས་གནས་འགོ་འཛིན། དེ་བཞིན་གཞུང་དང་གཞུང་ཁོངས་མིན་པའི་མི་སྣ་ཁག་མཉམ་འཛོམས་ཐོག་མཛད་སྒོ་དབུ་འབྱེད་གནང་སོང་།
མཛད་སྒོའི་ཐོག་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇིཏ་ནེ་རི་ཡ་ལགས་ཀྱིས་གོང་དུ་དྷ་ས་བོད་མི་རྣམས་ཀྱི་ཚབ་ཞུས་ཏེ་སྐུ་མགྲོན་གཙོ་བོ་སྐུ་ཞབས་བཱ་ལཱ་མཆོག་ལ་ཞུས་པའི་འབོད་སྐུལ་རྣམས་ལ་བཀའ་ལན་མྱུར་པོ་གནང་བ་དེར་བསྔགས་བརྗོད་གནང་བ་མ་ཟད། དམིགས་བསལ་སྐུ་མགྲོན་དྷ་ས་གྲོང་སྡེའི་སྤྱི་ཁྱབ་ལྕམ་སྐུ་ནི་ནུ་ཤར་མ་མཆོག་ད་རེས་འོས་འདེམས་ཐོན་པར་དགའ་བསུ་དང་འབྲེལ་འཚམས་འདྲི་ཞུས་གནང་ཡོད། དེ་ནི་བུད་མེད་ནུས་སྟོབས་གོང་འཕེལ་མཚོན་གྱི་ཡོད་ལ་བོད་མིའི་སྒྲིག་འཛུགས་ལ་ཆ་མཚོན་ནའང་བཀའ་བློན་བཞི་ལས་མེད་པ་དང་། བཀའ་བློན་གསུམ་བུད་མེད་ཡིན་པས་སྤོབས་པ་སྐྱེ་དགོས་པའི་གནས་ཚུལ་ཞིག་ཡིན་པ་གསལ་བཤད་གནང་།
དེ་ནས་འཕགས་བོད་གཉིས་ཀྱི་འབྲེལ་བ་དེ་ལོ་ཉི་སྟོང་ཉི་བརྒྱ་ལྷག་སྔོན་ནས་ཡོད་པའི་སྐོར་དང་། འཕགས་བོད་གཉིས་ཀྱི་འབྲེལ་བ་དེ་ལོ་རྒྱུས་རང་བཞིན་ལྡན་པ་ཞིག་ཡིན་པ་ངོ་སྤྲོད་གནང་ཡོད། དེ་རྗེས་དཔལ་ལྡན་སྲིད་སྐྱོང་མཆོག་གིས་ཧིན་བོད་མཛའ་འབྲེལ་ཚོགས་པས་ལོ་ལྟར་མཛད་སྒོ་འདི་ལྟ་བུ་གོ་སྒྲིག་གནང་བར་རྗེས་སུ་ཡི་རངས་ཞུས་པ་དང་ཆབས་ཅིག དེང་སང་རྒྱ་གར་མི་མང་རྣམས་ནས་ཀྱང་བོད་དོན་ཐོག་དོ་སྣང་དང་རྒྱབ་སྐྱོར་གནང་བར་བཀའ་དྲིན་ཆེ་ཞུ་གནང་ཡོད།
དེ་མཚུངས་དཔལ་ལྡན་སྲིད་སྐྱོང་མཆོག་གིས་ད་ལྟའི་བོད་ནང་གི་ཛ་དྲག་གནས་སྟངས་སྐོར་དང་འབྲེལ་རྒྱ་ནག་གཞུང་གིས་འཛིན་སྐྱོང་བྱེད་ཚུལ་དེ་རྩོམ་པ་པོ་ཇོར་ཇི་ཨོར་ཝེལ་ལགས་གྱིས་བརྩམས་པའི་ ༡༩༨༤ དང་གཅིག་མཚུངས་ཡིན་པའི་དཔེ་མཚོན་གནང་། མཐའ་དོན་དུ་རྒྱ་ནག་གིས་བོད་ས་བཙན་བཟུང་བྱས་པ་དེ་ཡིད་སྐྱོའི་གནས་ཚུལ་ཞིག་ཡིན་ཀྱང་དེའི་རྐྱེན་གྱིས་འཛམ་གླིང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐོབ་ཡོད་པ་དང་། བཙན་བྱོལ་དུ་བོད་མི་རྣམས་ལ་བོད་མིའི་སྒྲིག་འཛུགས་ཐོབ་ཡོད་པས་དགའ་སྤོབས་སྐྱེ་དགོས་པ་ཞིག་ཡིན་པ་གསུང་བཤད་གནང་།
ཧི་མ་ལ་ཡའི་དུས་སྟོན་དེ་ཕྱི་ཚེས་ ༡༠ དང་ ༡༡ བཅས་ཉིན་གཉིས་རིང་ཚོགས་ཀྱི་ཡོད་པ་བཅས།།
