༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་བསྐྱངས་ཏེ་ལོ་ངོ་ ༧༥ འཁོར་བའི་དུས་ཆེན་དང་སྟབས་བསྟུན་བྷིལ་ཀི་རི་ཡུ་ཐེབས་རྩའི་ (Rev. Bill Crews Foundation) གོ་སྒྲིག་འོག་སིཊ་ནིར་ཆོས་ལུགས་ནང་ཁུལ་མཁས་པའི་དབར་རང་དབང་དང་། འདྲ་མཉམ། དྲང་བདེན་ཞེས་པའི་བརྗོད་གཞིའི་ཐོག་བགྲོ་གླེང་འཚོགས་ཡོད།

བགྲོ་གླེང་ཚོགས་འདུའི་ཐོག་ཆོས་ལུགས་དང་། ཚོགས་སྡེ་འདྲ་མིན་གྱི་སྐུ་ཚབ་མཉམ་ཞུགས་གནང་ཡོད་པ་ལྟར། ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱང་ལྷན་ཞུགས་ཀྱིས་གསུང་བཤད་གནང་ཡོད། སྐབས་དེར་ཁོང་གིས་ཉིན་མོ་དེ་ནི་བོད་མི་རྣམས་ལ་མཚོན་ན་དགའ་སྐྱོ་ཟུང་སྦྲེལ་གྱི་ཉིན་མོ་ཞིག་ཡིན། ཕྱོགས་གཅིག་ནས་ཉིན་མོ་དེར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ཡོད་པ་དང་། ཕྱོགས་གཞན་ཞིག་ནས་འགྲོ་བ་མིའི་ཐོབ་ཐང་གི་ཉིན་མོར་བོད་མི་རྣམས་ཀྱིས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་མུ་མཐུད་རྡོག་རོལ་གཏོང་བཞིན་པར་ངོ་རྒོལ་བྱེད་ཀྱི་ཡོད་ཅེས་དང་།

དེ་བཞིན་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞི་ངོ་སྤྲོད་དང་འབྲེལ་མགོན་པོ་མཆོག་གི་བཀའ་སློབ་ནང་དུ་འགྲོ་བ་མི་རིགས་གཅིག་གྱུར་གྱི་འདུ་ཤེས་གོང་མཐོར་གཏོང་ཐབས་སྐོར་ཐུགས་བརྩོན་གནང་གི་ཡོད་པ་གསུངས། དེ་མཚུངས་སྐུ་ཚབ་དོན་གཅོད་ཀྱིས་རྒྱ་ནག་གཞུང་གིས་བོད་ཀྱི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་བཞིན་ཡོད་པ་དང་། རྒྱ་ནག་གཞུང་གིས་བླ་སྤྲུལ་རྣམ་པའི་ཡང་སྲིད་དེ་ཆབ་སྲིད་ཀྱི་དགོས་མཁོར་བེད་སྤྱོད་ལོག་པ་གཏོང་གི་ཡོད་པ་གསལ་སྟོན་གནང་རྗེས་མཐར་བྷིལ་ལགས་ནས་མཛད་སྒོ་གོ་སྒྲིག་གནང་བར་ཐུགས་རྗེ་ལེགས་འབུལ་ཞུས།

སྤྱིར་བྷིལ་ལགས་ནི་ཆོས་ལུགས་ཕན་ཚུན་བར་གྲོས་མོལ་ཡོང་བར་འབད་རྩོལ་གནང་མཁན་ཞིག་ཡིན་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛའ་གྲོགས་ཤིག་ཀྱང་ཡིན་པ་བཅས།།