༄༅། །ཡུ་རོབ་གྲོས་ཚོགས་ཀྱིས་བཏོན་པའི་ཡུ་རོབ་མཐུན་ཚོགས་དང་རྒྱ་ནག་བར་གྱི་འབྲེལ་བའི་སྙན་ཐོ་གསར་པའི་ནང་ཡུ་རོབ་མཐུན་ཚོགས་ཀྱིས་རྒྱ་ནག་གཞུང་ནས་བོད་ནང་ལག་བསྟར་བྱེད་བཞིན་པའི་རིག་གཞུང་བཙན་སྒྱུར་གྱི་སྲིད་བྱུས་འོག་བོད་མིའི་ཤེས་རིག་དང་། ཆོས་དད། རིག་གཞུང་། སྐད་ཡིག་ཐོབ་ཐང་ལ་རྡོག་རོལ་གྱིས་བོད་ཀྱི་རིག་གཞུང་དང་ངོ་བོ་རྩ་མེད་གཏོང་བྱུས་བྱེད་བཞིན་པར་སྐྱོན་བརྗོད་དྲག་པོ་གནང་ཡོད།
དེ་ཡང་སྙན་ཐོའི་ནང་རྒྱ་ནག་དམར་ཤོག་གཞུང་གིས་བོད་ནང་ལག་བསྟར་བྱེད་བཞིན་པའི་རིག་གཞུང་བཙན་སྒྱུར་གྱི་སྲིད་བྱུས་འོག་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་འཕྲལ་དུ་མཚམས་འཇོག་དགོས་པའི་འབོད་སྐུལ་དང་འབྲེལ། དེ་ལྟ་བུའི་སྲིད་བྱུས་ལག་བསྟར་བྱེད་མཁན་འབྲེལ་ཡོད་རྒྱ་རིགས་འགོ་ཁྲིད་ཚོར་སྲིད་དོན་བཀའ་བཅད་གཏོང་དགོས་པའི་དགོས་འདུན་བཏོན་ཡོད་པ་རེད།
དེ་བཞིན་མུ་མཐུད་སྙན་ཐོའི་ནང་རྒྱ་ནག་གཞུང་གིས་འདི་ལོའི་ཕྱི་ཟླ་ ༠༩ ཚེས་ ༠༡ ནས་ལག་བསྟར་བྱེད་འགོ་ཚུགས་པའི་ཆོས་ཕྱོགས་བྱེད་སྒོའི་ཚོགས་གནས་འཛིན་སྐྱོང་ཁྲིམས་གཞིའམ་(Administrative Measures for Religious Activity Venues) བཀའ་ཁྱབ་ཨང་ ༡༩ ཞེས་པར་སྐྱོན་བརྗོད་གནང་ཡོད་ཅིང་། ཁྲིམས་གཞི་དེ་ནི་བོད་དང་རྒྱ་ནག་ནང་དུ་ཆོས་ཕྱོགས་ཀྱི་བྱེད་སྒོར་དམ་བསྒྲགས་སྔར་ལྷག་གཏོང་བར་དམིགས་ཏེ་གཏན་འབེབས་བྱས་པ་ཞིག་ཡིན། དེ་དང་འབྲེལ་ཏེ་ཡུ་རོབ་གྲོས་ཚོགས་ཀྱིས་རྒྱ་ནག་གཞུང་ལ་ཆོས་དད་རང་དབང་ལ་གུས་བརྩི་དང་། ཆོས་ལུགས་མི་སྣར་དངོས་ཤུགས་བརྒྱུད་གསུམ་ནས་བྱ་ར་དང་། བརྙས་བཅོས། འཛིན་བཟུང་བྱེད་མཚམས་འཇོག་དགོས་པའི་འབོད་སྐུལ་གནང་ཡོད།
གཞན་ཡང་ཡུ་རོབ་གྲོས་ཚོགས་ཀྱིས་བོད་ནང་གི་ཛ་དྲག་གནས་སྟངས་ཙམ་མ་ཡིན་པར་རྒྱ་གཞུང་གིས་བོད་ནང་ཁྲིམས་འགལ་གཏེར་ཁ་སྔོག་འདོན་བྱས་པར་ངོ་རྒོལ་བྱེད་མི་བོད་མི་ཁོར་ཡུག་སྲུང་སྐྱོབ་པ་དང་འགྲོ་བ་མིའི་ཐོབ་ཐང་ལས་འགུལ་བ་ཁག་ཅིག་འཛིན་བཟུང་བྱས་པ་ཚོའི་གནས་སྟངས་སྐོར་གནས་ཚུལ་མཁོ་སྤྲོད་དགོས་པའི་རེ་སྐུལ་གནང་ཡོད་པ་མ་ཟད། དེ་ལས་གལ་ཆེ་བར་སྙན་ཐོའི་ནང་རྒྱ་ནག་གཞུང་ནས་མཉམ་འབྲེལ་རྒྱལ་ཚོགས་ཐེ་བའི་རྒྱལ་སྤྱིའི་རང་དབང་ཅན་གྱི་རྟོག་ཞིབ་པ་ཁག་བོད་ནང་གི་གནས་སྟངས་རྒྱུས་ལོན་རྟོག་ཞིབ་གནང་བར་གཏོང་དགོས་པའི་རེ་འདུན་བཏོན་གནང་ཡོད་པ་རེད།
ཡུ་རོབ་མཐུན་ཚོགས་ཀྱི་སྙན་ཐོ་དེར་བེལ་ཇ་ཡམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་དགའ་བསུ་དང་སྦྲགས། ཡུ་རོབ་མཐུན་ཚོགས་ནས་བོད་མིའི་ཛ་དྲག་གནས་སྟངས་གླེང་སློང་གནང་བར་ཐུགས་རྗེ་ལེགས་འབུལ་ཞུས་པ་མ་ཟད། ཡུ་རོབ་མཐུན་ཚོགས་ལྟ་བུའི་མང་གཙོའི་སྒྲིག་འཛུགས་ཁག་གིས་བོད་རྒྱའི་དཀའ་རྙོག་སྐོར་མུ་མཐུད་གླེང་སློང་དང་། དཀའ་རྙོག་ཞི་འགྲིག་མ་བྱུང་བར་རྒྱ་ནག་གི་འགོ་ཁྲིད་ལྷན་གྲོས་མོལ་གནང་རྒྱུ་གལ་ཆེན་པོ་ཡིན་པ་གསུངས་ཡོད།
ཐེངས་འདིའི་ཡུ་རོབ་མཐུན་ཚོགས་དང་རྒྱ་ནག་བར་གྱི་འབྲེལ་བའི་སྙན་ཐོ་འདི་བཞིན་ཡུ་རོབ་མཐུན་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གིས་ཕྱི་ལོ་ ༢༠༢༣ ཟླ་བ་ ༡༡ ཚེས་ ༡༦ ཉིན་རྒྱབ་གཉེར་དང་། ཟླ་བ་ ༡༢ ཚེས་ ༡༣ ཉིན་གྲོས་ཚོགས་ནང་མང་མོས་ཀྱིས་གཏན་འབེབས་གནང་ཞིང་། སྙན་ཐོ་དེ་ཉིད་གྲོས་ཚོགས་འཐུས་མི་ཧིལ་ཊི་ཝུཊ་མན་ (MEP Hilde Vautmans) ལགས་ཀྱིས་ངོ་སྤྲོད་མཚམས་སྦྱོར་གནང་ཡོད་པ་བཅས།།
