༄༅། །ཕྱི་ལོ་ ༢༠༢༣ ཟླ་བ་ ༡༢ ཚེས་ ༠༧ ཉིན་རྒྱ་ནག་གི་རྒྱལ་ས་པི་ཅིང་དུ་ཡུ་རོབ་མཐུན་ཚོགས་དང་རྒྱ་ནག་བར་གྱི་ཆེས་མཐོའི་དཔོན་རིགས་ལྷན་ཚོགས་ཐེངས་ ༢༤ པ་འཚོགས་ཡོད་པ་རེད།

སྐབས་དེར་ཡུ་རོབ་ལྷན་ཚོགས་ཀྱི་ཚོགས་གཙོ་ཅར་ལི་སི་མི་ཀལ་ (Charles Michel) མཆོག་དང་། ཡུ་རོབ་ལྷན་ཁང་གི་ཚོགས་གཙོ་ཨུར་སུ་ལ་ཝོན་ཊེར་ལེ་ཡན་ (Ursula von der Leyen) མཆོག ཡུ་རོབ་མཐུན་ཚོགས་ཀྱི་ཕྱི་འབྲེལ་སྲིད་བྱུས་གཙོ་འཛིན་ཇོ་སོབ་བྷོ་རེལ་ (osep Borrell) མཆོག་ནས་རྒྱ་ནག་གི་སྲིད་འཛིན་ཞི་ཅིན་ཕིང་དང་། སྲིད་བློན་ལི་ཆང་གཉིས་དང་ཐུག་འཕྲད་གནང་ཡོད། ཚོགས་འདུའི་རྗེས་སུ་ཡུ་རོབ་མཐུན་ཚོགས་ཀྱི་དབུ་ཁྲིད་རྣམས་ནས་གསར་འགོད་གསལ་བསྒྲགས་གནང་སྐབས་ཚོགས་གཙོ་མི་ཅར་ལི་སི་མི་ཀལ་མཆོག་གིས་ཡུ་རོབ་མཐུན་ཚོགས་ནས་འགྲོ་བ་མིའི་ཐོབ་ཐང་དང་གཞི་རྩའི་རང་དབང་རྣམས་ནི་འཇིག་རྟེན་སྤྱི་ཡོངས་ཀྱི་རིན་ཐང་དུ་ངོས་འཛིན་བྱེད་ཀྱི་ཡོད་པས། འགྲོ་བ་མིའི་ཐོབ་ཐང་རྡོག་རོལ་བཏང་བའི་གནས་སྟངས་ལ་ཡུ་རོབ་མཐུན་ཚོགས་ནས་སྣང་མེད་ནམ་ཡང་གཏོང་གི་མ་རེད། ཅེས་དང་། དེ་བཞིན་ཁོང་གིས་རྒྱ་ནག་གི་འགོ་ཁྲིད་ལྷན་དུ་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཛ་དྲག་གནས་སྟངས་སྐོར་ཡང་གསལ་སྟོན་གནང་ཡོད་སྐོར་འགྲེལ་བརྗོད་གནང་ཡོད།

རྒྱ་ནག་དང་ཡུ་རོབ་མཐུན་ཚོགས་ཀྱི་ཆེས་མཐོའི་དཔོན་རིགས་ལྷན་ཚོགས་གྲུབ་པའི་རྗེས་ཚོགས་གཙོ་ཅར་ལི་སི་མི་ཀལ་མཆོག་གིས་གསར་འགོད་གསལ་བསྒྲགས་ཐོག་བོད་ནང་གི་འགྲོ་བ་མིའི་ཐོང་ཐང་སྐོར་རྒྱ་ནག་གི་འགོ་ཁྲིད་ལྷན་གླེང་སློང་གནང་སྐོར་གསུངས་པར་བྷེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་དགའ་བསུ་ཞུས་པ་དང་སྦྲགས། དེ་ལྟ་བུའི་གསལ་བསྒྲགས་འདིས་ཡུ་རོབ་མཐུན་ཚོགས་ཀྱིས་བོད་དོན་གལ་ཆེར་བརྩི་གི་ཡོད་པ་མ་ཟད། དེ་ཉིད་མུ་མཐུད་མཐུན་ཚོགས་ཀྱི་གྲོས་གཞི་གལ་ཆེ་ཞིག་ཏུ་ངོས་འཛིན་གནང་གི་ཡོད་པ་མཚོན་གྱི་ཡོད་ཅེས་གསལ་བཤད་གནང་ཡོད་པ་རེད།

དེ་སྔོན་ཡུ་རོབ་མཐུན་ཚོགས་ཀྱི་ཆེས་མཐོའི་དཔོན་རིགས་ཁག་རྒྱ་ནག་ཏུ་མ་ཕེབས་སྔོན་བྷེལ་ཇམ་སྐུ་ཚབ་དོན་གཅོད་འགན་ཁང་རིག་འཛིན་ཆོས་སྒྲོན་ལགས་ཀྱིས་དབུ་ཁྲིད་རྣམས་ལ་ཕྱག་བྲིས་ཕུལ་ཏེ་རྒྱ་ནག་གི་འགོ་ཁྲིད་ལྷན་དུ་བོད་དོན་གླེང་སློང་གནང་སྐྱོང་ཡོང་བའི་འབོད་སྐུལ་ཞུས་ཡོད།

དེ་སྔའི་ཡུ་རོབ་མཐུན་ཚོགས་དང་རྒྱ་ནག་གི་ཆེས་མཐོའི་དཔོན་རིགས་ལྷན་ཚོགས་ཕྱི་ལོ་ ༢༠༢༣ ཟླ་བ་ ༠༤ ཚེས་ ༠༡ ཉིན་དྲ་ཐོག་བརྒྱུད་འཚོགས་ཡོད་པ་བཅས།།