༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ལོ་འཆར་ཅན་གྱི་ཟླ་བ་ ༡༢ ཚེས་ ༡༠ ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་འཛམ་གླིང་ནང་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་པའི་ཉིན་མོ་ཡིན་པ་དང་།  འདི་ལོ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ཧྲིལ་པོ་སོ་བཞི་འཁོར་གྱི་ཡོད། 

ཆེས་དམིགས་བསལ་གྱི་ཉིན་མོ་འདིར་བོད་མི་གནས་ཡུལ་ས་ཁུལ་གཞན་དང་འདྲ་བར་བྱང་ཨ་རིའི་ཁུལ་དུའང་བོད་རིགས་སྤྱི་མཐུན་ཚོགས་པ་ཁག་གིས་སྣེ་ཁྲིད་དེ།  སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟཌ་འབུལ་ལམ་ཞུས་ནས་མི་ལོ་ཧྲིལ་པོ་སོ་བཞི་འཁོར་བའི་དུས་དྲན་སྲུང་བརྩི་ཞུས་ཡོད། 

དེའི་དགོས་དམིགས་གཙོ་བོ་ནི་༧གོང་ས་༧སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་རྒྱུ་དང་།  བོད་མི་ཡོད་དོ་ཅོག་གིས་ད་ལྟའི་ཆེས་གཉན་འཕྲང་གི་དུས་འདིར།  བཀའ་དྲིན་བཀའ་དྲིན་དུ་བསམ་སྟེ་གང་ཉིད་ཀྱི་ཐུགས་བརྩེ་ཆེན་པོའི་བཀའ་སློབ་ལམ་སྟོན་ཁག་ཁ་ཞེ་གཉིས་མེད་ཀྱིས་ལག་བསྟར་དོན་འཁྱོལ་བྱེད་དགོས་པའི་དྲན་སྐུལ་བྱེད་རྒྱུ་དེ་རེད།  

བྱང་ཨ་རིའི་ས་གནས་ཁ་ཤས་ལ་ཚེས་ ༩ ཉིན་དང་།  ས་གནས་འགའ་རེར་ཚེས་ ༡༠ ཉིན་དུས་དྲན་སྲུང་བརྩི་ཞུས་ཡོད་པ་དང་།  འདི་ག་སྐུ་ཚབ་དོན་གཅོད་ཁང་ལ་ས་གནས་ནས་བཏང་འབྱོར་བྱུང་བའི་སྐུ་པར་ཆ་ཚང་འདོན་སྤེལ་ཐུབ་ཐབས་མེད་ཀྱང་།  རྒྱ་ཆེའི་ཀློག་པ་རྣམས་ཀྱི་མཁྱེན་རྟོགས་ཆེད་སྐུ་པར་ཁག་ཅིག་འདིར་འགོད་སྤེལ་ཞུས་ཡོད།།