༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན། འདི་ལོའི་ཟླ་བ་ ༡༡ ནང་ད་ཡོད་ལྷོ་ཕྱོགས་ཁྲིམས་དྲུང་ཕུན་ཚོགས་དཔལ་ལྡན་ལགས་དང་། ཁྲིམས་ལུགས་རིག་པ་བ་ཆོས་སྐྱིད་ལགས་གཉིས་ས་གནས་ཁྲིམས་ཞིབ་པའི་ས་མིག་ཐོག་ཡིག་རྒྱུགས་འཕྲོད་པར། ཁྲིམས་ལུགས་རིག་པ་བ་ཕུན་ཚོགས་དཔལ་ལྡན་ལགས་ལྷོ་ཕྱོགས་ས་གནས་ཁྲིམས་ཞིབ་ཁང་གི་ཁྲིམས་ཞིབ་པ་དང་། ཁྲིམས་ལུགས་རིག་པ་བ་ཆོས་སྐྱིད་ལགས་བྱང་ཕྱོགས་ས་གནས་ཁྲིམས་ཞིབ་ཁང་གི་ཁྲིམས་ཞིབ་པ་བཅས་གསར་བསྐོ་ཞུས་ཡོད་པ་དང་འབྲེལ། ད་རིང་སྔ་དྲོ་ཆུ་ཚོད ༡༠།༠༥ ཐོག་ཁྲིམས་ལུགས་རིག་པ་བ་ཕུན་ཚོགས་དཔལ་ལྡན་ལགས་དང་། ཁྲིམས་ལུགས་རིག་པ་བ་ཆོས་སྐྱིད་ལགས་གཉིས་ནས་དཔལ་ལྡན་སྐོར་སྐྱོད་ཁྲིམས་ཞིབ་པ་ལྷ་འབྲུག་མཆོག་གི་མདུན་དུ་ས་གནས་ཁྲིམས་ཞིབ་པའི་ལས་འཁུར་དམ་བཅའ་འབུལ་བཞེས་གྲུབ་མཚམས་དཔལ་ལྡན་སྐོར་སྐྱོད་ཁྲིམས་ཞིབ་པས་ས་གནས་ཁྲིམས་ཞིབ་པ་གསར་བསྐོ་གཉིས་ལ་འཚམས་འདྲི་དང་རྟེན་བྱུང་མཇལ་དར་སྒྲོན་འབུལ་གནང་བ་དང་། དེ་བཞིན་བདེ་སྐྱིད་གླིང་ས་གནས་འགོ་འཛིན་མཆོག་དང་། ས་གནས་ཀྱི་གནད་ཡོད་མི་སྣ། དགོན་སྡེ་ཁག་གི་སྐུ་ཚབ་བཅས་ཕེབས་ཞུགས་ཀྱིས་ས་གནས་ཁྲིམས་ཞིབ་པ་རྣམ་གཉིས་ལ་རྟེན་འབྱུང་མཇལ་དར་སྒྲོན་འབུལ་ཞུས། དེའི་རྗེས་སྐོར་སྐྱོད་ཁྲིམས་ཞིབ་པ་མཆོག་ནས་ས་གནས་ཀྱི་གནད་ཡོད་མི་སྣ་རྣམས་ལ་ས་གནས་ཁྲིམས་ཞིབ་པ་གསར་པ་གཉིས་ཀྱི་ངོ་སྤྲོད་དང་། ཁྲིམས་ཞིབ་ཁང་གི་ངོ་སྤྲོད་མདོར་བསྡུས་ཤིག་གནང་སྟེ་དམ་འབུལ་གྱི་མཛད་སྒོ་གྲུབ་མཚམས་ས་གནས་ཁྲིམས་ཞིབ་པ་གསར་པ་ཆོས་སྐྱིད་ལགས་ནས་བྱང་ཕྱོགས་ས་གནས་ཁྲིམས་ཞིབ་པའི་ལས་འཁུར་འགོ་འཛུགས་ཞུས་པ་དང་། ས་གནས་ཁྲིམས་ཞིབ་པ་གསར་པ་ཕུན་ཚོགས་དཔལ་ལྡན་ལགས་ད་རིང་ཕྱི་དྲོ་སྡེ་ར་ལྡུན་ས་གནས་ནས་ཕེབས་ཐོན་གྱིས་སྦེལ་ཀོབ་ས་གནས་སུ་འབྱོར་མཚམས་ལྷོ་ཕྱོགས་ས་གནས་ཁྲིམས་ཞིབ་པའི་ལས་འཁུར་འགོ་འཛུགས་ཞུ་རྒྱུ་བཅས་ཀྱི་གནས་ཚུལ་དུ། །