༄༅། །བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༤་་་་༢༠༢༥ ལོའི་ལོ་འཁོར་སྔོན་རྩིས་འཆར་འབུལ་ལ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཐུགས་ཞིབ་དང་བཀའ་ཤག་གིས་མཐའ་མའི་བཀའ་འཁྲོལ་རྒྱབ་གཉེར་གནང་རྒྱུའི་ལས་རིམ་དེ་བཞིན་ཕྱི་ལོ་ ༢༠༢༣ ཟླ་བ་ ༡༢ ཚེས་ ༢༡ ཉིན་མཇུག་བསྒྲིལ་གནང་སོང་།
དེ་ཡང་སྔོན་རྩིས་འཆར་འབུལ་ནང་བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་། དེ་བཞིན་རང་དབང་ཅན་གྱི་སྡེ་ཚན་ཁག་གིས་བོད་མིའི་ཆོས་རིག་འཛིན་སྐྱོང་སྤེལ་གསུམ་གྱི་ལས་གཞི་ཙམ་མ་ཟད། བཙན་བྱོལ་བོད་མིའི་གཞིས་ཆགས་གཙོ་བོར་གྱུར་བའི་བོད་མི་འདུས་སྡོད་ཀྱི་ས་ཁུལ་ཁག་དང་། བོད་ནས་གསར་དུ་ཕེབས་པ་བཅས་ཀྱི་བདེ་དོན་ཆེད་འགྲོ་གྲོན་སྔོན་རྩིས་དང་། གཞན་ཡང་བོད་པའི་སློབ་ཕྲུག་རྣམས་ཀྱི་ཤེས་ཡོན་དང་། མཐོ་སློབ་ཁག་ཏུ་སློབ་ཡོན་གྱི་མཐུན་འགྱུར། བོད་མིའི་སྤྱི་ཚོགས་ཁྲོད་མང་གཙོའི་རིང་ལུགས་གོང་མཐོར་དང་། བུད་མེད་ནུས་སྟོབས་གོང་སྤེལ་ལས་གཞི། རྒྱལ་སྤྱིའི་འབྲེལ་ལམ་དང་དྲིལ་བསྒྲགས་ལས་དོན། དེ་བཞིན་འཕྲོད་བསྟེན་ལས་གཞི་བཅས་ཀྱི་ཆེད་འགྲོ་གྲོན་འཆར་གཞི་ཕུལ་བ་རྣམས་ལ་བཀའ་ཤག་གིས་རྒྱབ་གཉེར་གནང་གི་ཡོད།
དེ་ནས་ཕྱོགས་བསྡོམས་ལོ་འཁོར་སྔོན་རྩིས་དེ་ཚོགས་གཙོ་སྦྲེལ་པོས་བསྐོ་གཞག་གནང་བའི་བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་ཚོགས་ཆུང་ལ་དབུལ་རྒྱུ་དང་། དེ་རྗེས་མཐའ་མར་ཕྱི་ཟླ་ ༣ པའི་གྲོས་ཚོགས་ནང་ལོ་འཁོར་སྔོན་རྩིས་ཐོག་བགྲོ་གླེང་དང་བཅས་བཀའ་འཁྲོལ་གནང་གི་ཡོད་པ་བཅས།།
